Ես ոչ միայն ԱՄՆ-ն, այլև աշխարհն եմ առաջնորդում, ամեն ինչ նոր է սկսվում. Թրամփն ամփոփել է պաշտոնավարման 100 օրը

Միչիգանում ելույթի ժամանակ ԱՄՆ նախագահ Դոնալդ Թրամփը հայտարարել է, որ իր պաշտոնավարման առաջին 100 օրերը ամենահաջողն են եղել երկրի պատմության մեջ և իր կոշտ ներգաղթային քաղաքականությունն անվանել է իր գլխավոր ձեռքբերումներից և նախընտրական խոստումներից մեկը։

«Մենք նոր ենք սկսել, դուք դեռ ոչինչ չեք տեսել, ամեն ինչ նոր է սկսվում»,- իր կողմնակիցներին ասել է նա։

Թրամփը ելույթ է ունեցել Ուորեն քաղաքում, որը գտնվում է Դեթրոյթից հյուսիս՝ ամերիկյան ավտոարդյունաբերության կենտրոնում և Կանադայի հետ սահմանի մոտ։

Թրամփը հայտարարել է, թե ավտոմոբիլային ընկերությունները «շարվում են» Միչիգանում՝ նոր գործարաններ բացելու համար:

Իր ելույթում նա կրկին քննադատել է դեմոկրատներին և նախորդ վարչակազմին, ինչպես նաև նշել այն որոշումները, որոնք արդեն կայացրել է պաշտոնավարման ընթացքում և ասել, որ «խելագարությունն ու տրանսգենդերային գաղափարախոսությունը դուրս է մղում կառավարությունից»՝ արժանանալով ժողովրդի ծափահարություններին:

«Մենք Ամերիկան կրկին հզոր ենք դարձնում, և մենք դա անում ենք արագորեն»,- հավելել է նա։

Խոսելով ներգաղթի մասին՝ Թրամփը մեղադրել է նախկին նախագահ Ջո Բայդենի (որին նա մի քանի անգամ հիշատակել է իր ելույթում) վարչակազմին՝ անօրինական ներգաղթյալներին «բռնաբարել և սպանել» թույլ տալու համար, որոնք, ըստ նրա, ներել են ամերիկացիներին։

«Կարող եմ հայտնել, որ այս նողկալի դավաճանությունն ավարտվել է»,- ասել է նա։

Թրամփը նշել է, որ Վաշինգտոնն արդեն ապահովել է ամերիկյան սահմանը, սակայն «դատարանները հետապնդում են» և փորձում են կանխել «անհավանական վատ» մարդկանց արտաքսումը Միացյալ Նահանգներից։

«Վատագույններից վատագույնները բանտ են նստելու Էլ Սալվադորում»,- ասել է Թրամփը՝ նկատի ունենալով մեգաբանտը, որը դարձել է մարդու իրավունքների ոտնահարման մասին զեկույցների առարկա:

Քաղաքացիներին ցուցադրվել է նաև տեսագրություն, թե ինչպես են արտաքսված միգրանտները կապանքներով կապված, և նրանց ստիպողաբար մտցնում են խցերը Սալվադորի բանտում:

Թրամփի ելույթը տևել է մոտ մեկուկես ժամ։ Դրանում նա հազիվ անդրադարձել է արտաքին քաղաքականությանը՝ նշելով միայն, որ պատրաստվում է առևտրային համաձայնագիր կնքել Չինաստանի հետ։

Իրականում Թրամփի առաջին 100 օրերը նշանավորվել են նախագահական լիազորությունների լայնածավալ օգտագործմամբ ներմուծման մաքսատուրքեր սահմանելու, կառավարության ծրագրերի կրճատման, զանգվածային արտաքսումների և այլ միջոցների համար:

Թրամփի շատ կողմնակիցներ ողջունում են այս նախաձեռնությունները, սակայն հարցումները ցույց են տալիս, որ նախագահի քննադատներին անհանգստացնում է այն ուղղությունը, որով ընթանում է երկիրը։

Դոնալդ Թրամփը հայտնել է, որ չի հավատում հարցումներին, որոնք, իր կարծիքով, ցույց են տալիս ավելի շատ դեմոկրատների, քան հանրապետականների կարծիքները, և գնահատում է, որ իր վարկանիշն ամերիկացիների շրջանում 60-70% է:

Ըստ Gallup-ի՝ Թրամփը Երկրորդ համաշխարհային պատերազմից ի վեր ԱՄՆ միակ նախագահն է, որին 100 օր պաշտոնավարելուց հետո աջակցում է բնակչության կեսից էլ պակասը. ըստ հարցումների՝ նրա վարկանիշը 44% է։

Ելույթը նման է եղել տասնյակ այլ միջոցառումների, որոնք Թրամփն անցկացրել է նախընտրական քարոզարշավի ընթացքում, դրանք բացվել են կրկին «YMCA» և «God Bless The USA» երգերով: Նախագահն այնուհետև քարկոծել է իր քննադատներին՝ դեմոկրատներին, հանրապետականներին, որոնք ամեն ինչում համաձայն չեն նրա հետ, լրատվամիջոցներին, սոցիոլոգներին, պետական պաշտոնյաներին և Չինաստանին:

Թեմայից թեմա ցատկելով՝ նա ներգաղթի վերաբերյալ մեկնաբանությունները ուղեկցել է «արյունարբու ավազակախմբերի», «դաժան վայրենիների», «բռնաբարությունների և ջարդերի» պատկերավոր նկարագրությամբ։

Միացյալ Նահանգների նախագահ Դոնալդ Թրամփը չի մոռացել ինքնագովեստը և հայտարարել է, որ ինքը ղեկավարում է ոչ միայն երկիրը, այլև աշխարհը պետության ղեկավարի պաշտոնում իր երկրորդ ժամկետում։

Թրամփն իր պաշտոնավարման առաջին 100 օրն ամփոփող հանրահավաքը Միչիգանում եզրափակել է արդեն ավանդական դարձած պարով: