«Կարգին հաղորդումը» անցյալ է դառնում

Դրա փոխարեն հեռարձակվում է «Կարգին հաղորդում-Նոստալգիա» հաղորդաշարը, որն իրենից ներկայացնում է «Կարգին հաղորդման» արդեն ցուցադրված մանրապատումների կրկնություն: Հաղորդաշարի դերասան-հաղորդավար Մկրտիչ Արզումանյանը` նույն ինքը` Մկոն, երեկ մեզ հետ զրույցում նոր «Կարգին հաղորդում»-ների բացակայությունը պատճառաբանեց այն հանգամանքով, որ իրենց ստեղծագործական խումբը մտադիր է հեռուստատեսային այլ` նոր ու թարմ նախագիծ իրականացնել: Միեւնույն ժամանակ, սակայն, Մկրտիչ Արզումանյանը չի կարծում, որ արդեն 7 տարվա պատմություն ունեցող «Կարգին հաղորդումը» սպառել է իրեն: ««Կարգին հաղորդումը» այնպիսի պրոյեկտ է, որ միշտ էլ կարելի է իրականացնել, որովհետեւ այն շատ հետաքրքիր, զվարճալի եւ տարբեր կերպարներով լի հաղորդումներից է, եւ հումորն էլ է շատ հաղորդման մեջ, ու ցանկացած պահի կարող ենք վերսկսել այն»,- հույս է հայտնում նա: Այժմ հաղորդաշարի ստեղծագործական խումբը, մի քանի այլ դերասանների հետ մասին սերիալ է նկարահանելու, որը դարձյալ հումորային կլինի: «Կարգին հաղորդման» վրա իրականացվող աշխատանքները դրա ստեղծողներին արդեն հոգնեցրել էին: «Ճիշտն ասած` շատ բարդ էր մեզ համար, որովհետեւ կյանքի գնով էինք ապահովում եթերը, ֆիզիկապես մենք ուղղակի չէինք հասցնում այդ 20 րոպեն 7 տարի շարունակ նկարահանել, իսկ հիմա, թեեւ նորից դժվար բան ենք պատրաստվում անել, բայց տաղավարային պայմաններում, որը համեմատաբար հեշտ է: Բայց ընդհանուր որակով եւ սցենարի առումով, կարող եմ ասել, այն ավելի դժվար, եւ ավելի հետաքրքիր կարող է լինել»,- կարծում է Մկոն: Իսկ թե ինչպես է կոչվելու հումորային սերիալի տեսքով նոր նախագիծը, դեռեւս որոշված չէ: Մկրտիչ Արզումանյանը վստահեցնում է, որ «Կարգին հաղորդում» հաղորդաշարի դադարեցումը որեւէ կապ չունի Հեռուստատեսության եւ ռադիոյի ազգային հանձնաժողովի չափորոշիչների հետ, որոնք արգելում են քարոզել, ասենք, օրինազանցություն, հանցագործ կենսակերպ, հանցագործների հերոսացում եւ ռոմանտիզացիա, թմրամոլների նմանակում, գռեհկաբանություն եւ այլն: Իսկ չլինի՞ մեր շատ իշխանավորների վրա, ովքեր չգիտեն` ինչ բան է օրենքը կամ այնքան էլ հեռու չեն հանցագործությունից, հեռուստատեսությունն է բացասական ազդեցություն գործել: Այս հարցին ի պատասխան, Մկոն ուղղակի ծիծաղում է` հավելելով` չգիտեմ ինչ ասել: Իսկ անդրադառնալով հումորին ու չափորոշիչներին` մեր զրուցակից կարգինագետը կարծիք է հայտնում, որ հումորը պետք էլ լինի ազատ ու անկաշկանդ: «Համենայնդեպս, այդ տեսակետը մեզ մոտ կա, որ, ասենք, հումորը մի քիչ ուրիշ ժանր է, իսկ այն, ինչ որ լուրջ ձեւով կարելի է ասել, պրոպագանդվում է, դա այլ է: Այսինքն` մենք մեր հաղորդումներում ծաղրում ենք, չէ՞, այդ վատ երեւույթները, ոչ թե ասում` էրեխեք ջան, այս տեսակի մարդիկ լավն են, կամ թմրամոլ լինելը լավ է: Բնականաբար ոչ... Մերը ուսումնական ծրագիր չէ, մերը հումորային ծրագիր է, իսկ հումորը ամբողջ աշխարհում էրոտիկայի վրա է հիմնված, հիմնված է քաղաքականության վրա եւ այլն, եւ այլն: Այսինքն` հումորի ասպարեզում այդ թեմաներն են ամենահետաքրքիրը եւ պահանջվածը ամբողջ աշխարհում»,- տարակուսում է Մկոն: Ու թեեւ վերջինս պնդում է, որ չափորոշիչները այստեղ որեւէ կապ չունեն, այնուամենայնիվ, նրա խոսքերից տպավորություն է ստեղծվում, որ իրենց մեղադրել են նմանատիպ երեւույթներ ներկայացնող հաղորդումներ հեռուստաեթեր բերելու մեջ: Ու քանի որ այդ հաղորդումներում հեռուստադիտողը ոչ հազվադեպ է քաղաքական ենթատեքստեր տեսնում, դերասան-հաղորդավարից հետաքրքրվեցինք` հնարավո՞ր է «Կարգին հաղորդման» դադարեցումը մի քիչ էլ քաղաքական դրդապատճառ ունի: Մկոն դա բացառում է, նշելով, որ իրենք փորձում են ակտուալ լինել ու շարժվել ժամանակին համընթաց, հայտարարում է, որ ուղղակի համընկան նոր նախագիծ ներկայացնելու իրենց որոշումն ու ՀՌԱՀ-ի չափորոշիչները: Իսկ «Կարգին հաղորդումը» դադարեցնելու եւ հեռուստադիտողին նոր նախագծով ներկայանալու որոշումն, ըստ նրա, կայացվել է «Արմենիա» հեռուստաընկերության հետ համատեղ: Իսկ թե նշված որոշումն ինչպես է պատճառաբանում հեռուստաընկերության ղեկավարությունը, մեզ պարզել չհաջողվեց, քանի որ նրանց բջջային հեռախոսներն անհասանելի էին, քաղաքայիններով չէին պատասխանում: Նրանց մոտ կանգնած մեր աղբյուրները, սակայն, պնդում են, որ հաղորդաշարի դադարեցումը պայմանավորված է ՀՌԱՀ-ի չափորոշիչներին չհամապատասխանելով: Իսկ չեն համապատասխանում հատկապես սարսափ ներշնչող եւ էրոտիկ բնույթի տեսարաններ ներկայացնելու համար: Ու թեեւ Մկոն հույս էր հայտնում, որ մի որոշ ժամանակ անց հնարավոր է «Կարգին հաղորդումը» «վերադառնա», մեր աղբյուրների փոխանցմամբ, դա, ըստ ամենայնի, տեղի չի ունենա: «Հիմա «Կարգին հաղորդում- Նոստալգիան» է եթերում: Դա նշանակում է, որ «Կարգին հաղորդումը» աստիճանաբար հուշ է դառնում»,- նկատում են նրանք: