Ֆուտբոլ. Հայաստանի ազգային հավաքական. Շալանդը սկսում է

Ֆուտբոլի Հայաստանի ազգային հավաքականը առաջիկա 2 շաբաթների ընթացքում 3 ընկերական հանդիպումներ է անցկացնելու, ինչին նախապատրաստվելու նպատակով երեկ Երեւանում սկսել է ուսումնամարզական հավաքը:

Հիշեցնեմ, որ մեր ընտրանին մայիսի 27-ին Ժնեւում մրցելու է Արաբական Միացյալ Էմիրությունների, մայիսի 31-ին Շվեյցարիայի մեկ այլ քաղաքում՝ Սիոնում հանդիպելու է Ալժիրի, իսկ հունիսի 6-ին Մայնցում՝ Գերմանիայի ընտրանիների հետ: Այս հանդիպումներն առաջինն են լինելու մեր հավաքականի համար նոր մարզիչ Բեռնար Շալանդի գլխավորությամբ: Շվեյցարացի մասնագետը ուսումնամարզական հավաքի է հրավիրել 30 ֆուտբոլիստների, այդ թվում՝ արտերկրում հանդես եկող 20 խաղացողների: Կարելի է ասել, Շալանդը հրավիրել է արտերկրում հանդես եկող գրեթե բոլոր հայազգի ֆուտբոլիստներին: Այս անգամ ընտանեկան խնդիրների պատճառով հավաքական չի հրավիրվել մեր «բրազիլացի հայը»՝ Մարկոս Պիզելին: Ղազախստանի «Ակտոբեում» հանդես եկող Մարկոսի կինը պատրաստվում է անդրանիկ երեխայի ծնունդին ու ֆուտբոլիստը խնդրել է իրեն չկանչել, ինչին Շալանդը համաձայնվել է:

Ներկայացնեմ Հայաստանի ազգային հավաքական հրավիրված, արտասահմանում հանդես եկող ֆուտբոլիստների ցանկը. Ռոման Բերեզովսկի («Դինամո» Մ. Ռուսաստան), Արտակ Եդիգարյան («Ժալգիրիս», Լիտվա), Լեւոն Հայրապետյան («Պրիբրամ», Չեխիա), Արտյոմ Խաչատուրով («Տիրասպոլ», Մոլդովա), Արթուր Եդիգարյան («Կայրաթ», Ղազախստան), Ռոբերտ Արզումանյան («Ակտոբե», Ղազախստան), Կառլեն Մկրտչյան («Անժի», Ռուսաստան), Հենրիխ Մխիթարյան («Բորուսիա» Դ., Գերմանիա), Էդգար Մանուչարյան («Ուրալ», Ռուսաստան), Գեւորգ Ղազարյան («Մետալուրգ» Դ., Ուկրաինա), Արթուր Սարկիսով («Վոլգա», Ռուսաստան), Արաս Օզբիլիս, Յուրա Մովսիսյան (2-ն էլ՝ «Սպարտակ» Մ. Ռուսաստան), Նորայր Ասլանյան («Վիլեմ» Հոլանդիա), Ալեքսանդր Թումասյան («Յարո», Ֆինլանդիա), Մաուրո Գեւգեոզյան («Ալիանսա», Պերու), Արթուր Միրանյան («Շախտյոր» Դ., Ուկրաինա), Վահագն Միլիտոսյան («Լավալ», Ֆրանսիա), Արտյոմ Սիմոնյան («Զենիթ», Ռուսաստան), Արմեն Համբարձումյան («ԲԿՄԱ», Ռուսաստան): Բնականաբար, այս ֆուտբոլիստներից ոչ բոլորը կարող են հենց հիմա դառնալ մեր ընտրանու անդամներ, ընդ որում` վերջին 6-ը առաջին անգամ են հրավիրվել հավաքական: Ուղղակի Շալանդը ցանկացել է իր աչքով տեսնել բոլորի հնարավորությունները, ինչը խրախուսելի է: Հայաստանի առաջնությունում հանդես եկողներից Շալանդը հավաքական է հրավիրել 10 ֆուտբոլիստների. Արսեն Բեգլարյան («Գանձասար»), Հրայր Մկոյան («Շիրակ»), Գեւորգ Կասպարով, Ալեքս (2-ն էլ՝ «Միկա»), Վարազդատ Հարոյան, Տարոն Ոսկանյան, Արթուր Յուսպաշյան (3-ն էլ՝ «Փյունիկ»), Հովհաննես Համբարձումյան, Գագիկ Դաղբաշյան, Ռումյան Հովսեփյան (3-ն էլ՝ «Բանանց»): Վերջինս նույնպես առաջին անգամ է հրավիրվում հավաքական:

Երեկ Ավանի ակադեմիայում կայացավ մեր ընտրանու առաջին մարզումը, որին մասնակցեցին հրավիրված 30 ֆուտբոլիստներից 24-ը: Իրենց թիմերի հետ կապված խնդիրների հետեւանքով հավաքին չեն ժամանելու 19-ամյա Արտյոմ Սիմոնյանն ու 20-ամյա Արմեն Համբարձումյանը: Այս ֆուտբոլիստները առայժմ հանդես են գալիս իրենց թիմերի փոխարինողների կազմերում ու Հայաստանի հավաքականի կազմում հանդիպումներ անցկացնելու հետեւանքով Ռուսաստանում կհամարվեն լեգեոներներ ու հետագայում կարող են խաղալ միայն առաջին թիմերում (Ռուսաստանի երիտասարդական կամ փոխարինողների առաջնությունում այլ երկրների ֆուտբոլիստներ իրավունք չունեն հանդես գալ): Ղազախստանի առաջնությունում մայիսի 31-ին հանդիպումներ կան, ինչի պատճառով Ռոբերտ Արզումանյանն ու Արթուր Եդիգարյանը հավաքականին կմիանան հունիսի 3-ին ու կկարողանան հայտավորվել միայն Գերմանիայի դեմ խաղին: Մայիսի 25-ին Ժնեւում հավաքականին են միանալու Մաուրո Գեւգեոզյանն ու Արտակ Եդիգարյանը:

Դժվար է լավ արդյունքներ սպասել մեր թիմից այս ընկերական խաղերում. նախ` մեր մրցակիցները, հատկապես Աշխարհի առաջնությանը պատրաստվող Ալժիրն ու Գերմանիան «նվեր» թիմեր չեն, եւ 2-րդ.` ինչ-որ տեղ սրանք փորձարարական խաղեր են, որոնց ընթացքում մեր մարզիչը պետք է ծանոթանա ֆուտբոլիստների հնարավորություններին, իսկ ֆուտբոլիստները՝ մարզչի պահանջներին:

Ամեն դեպքում, ընթացող հավաքն ու առաջիկա 3 խաղերը շատ կարեւոր են մեր հավաքականի համար մի քանի այլ պատճառներով: Նոր գլխավոր մարզիչ Բեռնար Շալանդը պետք է ցույց տա, թե ինչ կարող է տալ մեր ընտրանուն՝ նոր մարտավարություն, խաղային նոր լուծումներ, մոտիվացիա եւ այլն: Հավաքական հրավիրված ֆուտբոլիստներն էլ պետք է ապացուցեն, որ արժանի են կրելու ազգային հավաքականի ֆուտբոլիստի մարզաշապիկը: