Այսօր պատմական ռեկորդի ականատես ենք լինելու՝ Լիոնել Մեսսիի կատարմամբ

Այսօր կայանալիք 8 հանդիպումներով մեկնարկում է ֆուտբոլի Չեմպիոնների լիգայի խմբային փուլի 5-րդ տուրը, ու հավանականությունը մեծ է, որ պատմական ռեկորդի ականատեսն ենք լինելու, բնականաբար՝ արգենտինացի Լիոնել Մեսսիի կատարմամբ:

Հանգստյան օրերին Իսպանիայի առաջնության հերթական խաղում «Բարսելոնայի» հարձակվող Մեսսին 3 գոլ խփեց ու դարձավ Իսպանիայի առաջնությունների բոլոր ժամանակների լավագույն ռմբարկուն. ներկա պահին Մեսսիի հաշվին գրանցված է 253 գոլ: Մինչ այդ Իսպանիայի առաջնությունների բոլոր ժամանակների լավագույն ռմբարկու էր համարվում Տելմո Սարրան, որը 1940-55 թվականներին Բիլբաոի «Ատլետիկի» կազմում անցկացրած 271 խաղերում դարձել էր 251 գոլի հեղինակ: Լիոնել Մեսսին իր նորամուտը Իսպանիայի առաջնությունում նշել է 2004 թվականին ու մինչ այժմ անցկացրած 289 խաղերում խփել է 253 գոլ: Արգենտինացի հարձակվողը մոտ է նաեւ դառնալու Չեմպիոնների լիգայի բոլոր ժամանակներ լավագույն ռմբարկու. իսպանացի լեգենդար հարձակվող Ռաուլի հետ միասին՝ Մեսսին Լիգայի խաղարկություններում արդեն դարձել է 71 գոլի հեղինակ, ու եթե արգենտինացուն այսօր հաջողվի Կիպրոսի «Ապօելի» հետ արտագնա խաղում աչքի ընկնել, ապա կգրանցվի եւս մեկ պատմական ռեկորդ: Ընդհանուր առմամբ, այսօր Չեմպիոնների լիգայում կայանալիք հանդիպումներից կարելի է առանձնացնել գերմանա-անգլիական 2 դիմակայություն՝ «Բավարիա» - «Մանչեսթեր Սիթի» եւ «Շալկե» - «Չելսի». առաջին դեպքում մրցելու են եվրոպական 2 գրանդ ակումբներ, իսկ 2-րդ խաղում իտալացի մասնագետ Ռոբերտո Դի Մատեոյի ներկա ու նախկին թիմերը: Հիշեցնեմ, որ ներկայումս «Շալկեի» գլխավոր մարզիչ Դի Մատեոյի գլխավորությամբ «Չելսին» 2 տարի առաջ հասավ իր պատմության ամենամեծ նվաճմանը՝ հաղթեց Չեմպիոնների լիգայի խաղարկությունում:

Վերադառնանք Մեսսիին ու նրա գրանցած պատմական ռեկորդին, որի մասին գրեցին գրեթե բոլոր եվրոպական մարզական թերթերը. արգենտինացին դարձավ Իսպանիայի բոլոր ժամանակների լավագույն ռմբարկու: Առաջին հայացքից մի փոքր տարօրինակ էր, որ մշտապես գոլառատ համարվող Իսպանիայի առաջնությունների պատմության մեջ 1 ֆուտբոլիստի խփած գոլերի հաշվարկով ռեկորդային էր համարվում 251 գոլի սահմանը: Համեմատության համար նշեմ, որ ոչ առաջնակարգ համարվող Հայաստանի առաջնությունների համար ռեկորդային է համարվում հիմնականում «Փյունիկում» հանդես եկած Արսեն Ավետիսյանի ցուցանիշը՝ 197 գոլ, ընդ որում՝ այս ցուցանիշը կարող էր շատ ավելի մեծ լինել, եթե Արսենը խաղար միայն Հայաստանում (6 տարի Ավետիսյանը հանդես է եկել արտասահմանում): Մեսսիի գրանցած նոր ռեկորդը դարձավ ընդհանրապես աշխարհի տարբեր երկրների, մասնավորապես՝ եվրոպական առաջատար առաջնությունների լավագույն ռմբարկուններին անդրադառնալու պատճառ, ու բավական հետաքրքրիր «նրբություններ» բացահայտվեցին: Գրեթե բոլոր երկրներում ռեկորդային ցուցանիշներ գրանցվել են 40-50 տարի առաջ, ու սա պարզ պատճառաբանություն ունի. նախկինում դեռ մեծ տարածում չունեին ֆուտբոլիստների տեղափոխությունները, ու նույն ֆուտբոլիստը ամբողջ կարիերան անցկացնում էր նույն երկրում: Ժամանակակից ֆուտբոլում այլ իրավիճակ է. հաճախակի են տեղափոխությունները, ու Մեսսիի նման ֆուտբոլիստներ, ովքեր ամբողջ կարիերան անցկացնում են նույն երկրում, առավել եւս՝ մեկ թիմում, շատ քիչ են: Իհարկե, այս գործոնը ամենեւին չի ստվերում արգենտինացու ռեկորդը, ով կարող է ապագայում դառնալ անգամ համաեվրոպական ռեկորդի հեղինակ: Աղյուսակում ներկայացվում են եվրոպական տարբեր երկրների առաջնություններում ռեկորդակիր ֆուտբոլիստների լավագույն տասնյակները (ֆուտբոլիստի անունից հետո նշված է երկիրը, որի առաջնությունում հանդես է եկել ֆուտբոլիստը, անցկացրած խաղերի քանակը՝ Խ, խփած գոլերի քանակը՝ Գ): Եվրոպական երկրների համար բացարձակ ռեկորդային է համարվում գերմանացի Գերդ Մյուլերի ցուցանիշը՝ 395 գոլ: Մեսսիին այս ցուցանիշին հասնելու համար անհրաժեշտ է խփել եւս 142 գոլ, ու հաշվի առնելով արգենտինացու միջին արդյունավետությունը՝ անհրաժեշտ է Իսպանիայում անցկացնել եւս 4-6 մրցաշրջան, ինչը այնքան էլ անհավանական չէ:

Լավագույն ռմբարկուների աղյուսակ

                                    երկիր                          տարի              Խ         Գ           
1. Գերդ Մյուլեր         Գերմանիա                 1964-82           476      395         
2. Յոզեֆ Բիկան         Չեխիա                        1929-48           451      393        
3. Ջիմի Գրիվս           Անգլիա                       1957-71           516      357        
4. Իմրե Շլոսեր           Հունգարիա                 1906-27           401      351        
5. Ջեֆ Մերմանս        Բելգիա                       1941-57           384      343        
6. Թոմաս Մավրոս    Հունաստան               1970-91           549      337        
7. Ջիմի Ջոնս              Հս. Իռլանդիա                        1947-64           285      332        
8. Պեյրատեո              Պորտուգալիա            1937-50           197      331        
9. Ռոբերտ Դինստ     Ավստրիա                   1943-62           351      323        
10. Մարկ Ուիլյամս   Ուելս                          1992-   468      319