Tsu.co սոցիալական ցանց. եկամուտ պարապ մարդկանց համա՞ր

Համացանցում լայն թափով սկսում է տարածում գտնել դեռեւս 2014թ.-ի աշնանից ստեղծված Tsu.co (Ցու) նոր սոցիալական ցանցը: Այն շատ արագ ընդլայնում է իր օգտատերերի շրջանակը եւ արդեն հասցրել է 1 միլիոնից ավելի օգտատեր գրանցել, որոնց թվում են նաեւ մի շարք հայտնի դեմքեր:

Ի՞նչն է մարդկանց գրավում դեպի նոր ցանցը եւ ինչո՞վ է այն տարբերվում մյուսներից: Մարդկանց համար ամենագրավիչն այն է, որ ցանցը գովազդից ստացված եկամուտների 90%-ը տրամադրում է իր օգտատերերին՝ նրանց ստեղծած կոնտենտին համապատասխան: Այսինքն՝ մարդիկ հնարավորություն ունեն ցանցում գովազդ տեղադրելու շնորհիվ որոշակի գումար աշխատել: Հետո էլ՝ այստեղ հնարավոր է գրանցվել միայն մեկ այլ գրանցված օգտատիրոջ կողմից հրավեր ստանալու դեպքում:

Հիշեցնենք, որ YouTube-ի օգտատերերը նույնպես հնարավորություն ունեն ստանալու եկամտի մի մասը, եթե իրենց տեսանյութի էջում գովազդ է տեղադրվում: Հակառակ սրա՝ մյուս ինտերնետ-հսկաները միլիարդներ են աշխատում գովազդի միջոցով եւ այդ ամենն իրենց օգտատերերի շնորհիվ:

Բայց նրանք, ովքեր շտապում են իրենց անունն ավելացնել Tsu.co-ի օգտատերերի շարքում, խորհուրդ է տրվում նախ լավ ուսումնասիրել եւ հասկանալ՝ արժե՞ արդյոք, թե ոչ:

Վեբ ծրագրավորող Մոմիկ Վարդանյանը խորհուրդ է տալիս մեծ հույսեր չկապել ցանցի միջոցով խոշոր գումար աշխատելու հեռանկարի հետ: Ըստ նրա, ի սկզբանե սոցիալական ցանցը հակասում է նման տնտեսական մեխանիզմին. «Սա եւս գումար աշխատելու մի ձեւ է: Ասում են՝ տարեկան մոտ 900 միլիոն դոլար գումարի մասին է խոսքը, որը հավասարապես բաշխվելու է օգտատերերի միջեւ: Բայց այստեղ չի կարող հավասարություն լինել, քանի որ ի սկզբանե գաղափարը հակասում է նման տնտեսական մեխանիզմին: Մոտավոր հաշվարկների, տարբեր տվյալների համաձայն՝ օգտատերերը ամսական կարող են միջինը 4 դոլար ստանալ: Սա մարքեթինգ է, որը պարզապես չի կարող աշխատել»:

Իսկ ինչ վերաբերում է ամենակարեւորին՝ անձնական տվյալների գաղտնիությանը, ապա պիտի շտապենք տեղեկացնել, որ ցանցը չի ապահովում HTTPS, ինչը նշանակում է, որ ձեր տվյալները կարող են շատ հեշտությամբ գողանալ: Մ.Վարդանյանի խոսքով, ապահովություն չկա առհասարակ ողջ համացանցային տիրույթում, որեւէ կայք չի կարող չօգտագործել անձնական տվյալների հետ կապված ինֆորմացիան. «Եթե մարդիկ առհասարակ օգտվում են ինտերնետից, նշանակում է՝ իրենց անձնական ինֆորմացիան արդեն պատկանում է էլի ինչ-որ մեկին՝ բացի իրենցից: Եթե անգամ նրանք ասեն, որ օգտատերերի անձնական տվյալները չեն հրապարակվելու, ապա, միեւնույնն է, ցանկացած պահի կկարողանան փոխել իրենց օգտագործման պայմանները, այսինքն՝ ապահովություն առհասարակ ինտերնետում չկա: Նման ցանցերի դեպքում պարտադիր պայման է նաեւ ապահովել HTTPS, որն իրենից տեխնիկական անվտանգություն է ներկայացնում, բայց եթե չի ապահովվում, ապա այդտեղից ինֆորմացիա գողանալը, վերցնելն ավելի հեշտ է լինելու»:

Ինչպես հայտնի է, բոլոր խոշոր սոցիալական ցանցերն էլ ժամանակի ընթացքում կորցնում են իրենց պահանջարկը, հետաքրքրությունն իրենց ծառայությունների նկատմամբ: Ըստ մասնագետի, նույն ճակատագիրն է սպասվում նաեւ Tsu.co-ին. «Բոլոր ցանցերն էլ ստիպված են լինում հաճախակի փոփոխություններ կատարել իրենց ծրագրերում՝ օգտատերերին նորից գրավելու եւ պահելու համար: Ընդհանրապես՝ ակնկալվում է, որ 2015 թվականը սոցիալական ցանցերի տարի է լինելու: Գուցե հայտնվի ինչ-որ նոր ցանց, որ ավելի նպաստավոր պայմաններ կստեղծի, ավելի հետաքրքիր եւ օգտակար ծառայություններ կառաջարկի: Այնուամենայնիվ՝ կգա մի ժամանակ, երբ մարդկանց այլեւս չեն հետաքրքրի սոցիալական ցանցերը, այդ թվում նաեւ Tsu.co-ն, որը մնայուն ոչինչ չի առաջարկում, տեխնիկապես որեւէ առավելություն չունի, գովազդային գաղափարախոսությունն էլ կապիտալիստական է, հավասարություն չկա»:

Մ.Վարդանյանը խորհուրդ է տալիս բոլոր հայ օգտատերերին պարզապես քիչ օգտվել սոցիալական ցանցերից եւ չշտապել եւս մեկ ցանցում ժամանակն անիմաստ սպանել, եթե, իհարկե, չկա որեւէ բան գովազդելու կարիք. «Ամեն ինչից էլ պետք է չափավոր եւ տեղին օգտվել: Եթե փորձենք կոնկրետ խորհուրդ տալ, ապա պետք է հորդորենք բոլոր ցանցերից պարզապես դուրս գալ եւ համեստորեն Twitter-ն օգտագործել կամ էլ Google-ը, որոնք թե՛ տեխնիկապես, թե՛ գաղափարապես ավելի հարուստ են եւ նպատակահարմար: Բայց եթե մարդիկ առհասարակ սոցիալական ցանցերը չկարեւորեն, իրենց փողն ինքնըստինքյան կշատանա, որովհետեւ ժամանակը կծախսեն ավելի կոնկրետ աշխատանքի վրա»:

Աստղիկ Իսկանդարյան