Ոստիկանությունը պատրաստվում է սադրանք հրահրել Ազատության հրապարակում. Վարուժան Ավետիսյան

Ոստիկանությունը պատրաստվում է սադրանք հրահրել Ազատության հրապարակում: Այդ կարծիքին է «Նոր Հայաստան» շարժումը, որ արդեն 87 օր է՝ նստացույց-հավաքներ է անցկացնում հրապարակում:

Շարժման ներկայացուցիչ Վարուժան Ավետիսյանը այսօր Ազատության հրապարակում հրավիրված հավաքի ընթացքում հայտարարեց, որ այդ սադրանքը կանխելու նպատակով այսօր երեկոյան ժամը 22:00-ին Ազատության հրապարակում կավարտվի «Նոր Հայաստան» շարժման կազմակերպած նստացույցը՝ իր տեղը զիջելով «Մենք ենք տերը մեր երկրի» նախաձեռնության ինքնաբուխ ակցիային:

Ոստիկանությունն այսօր հաղորդագրություն է տարածել՝ տեղեկացնելով, որ Երեւանի քաղաքապետարանը սահմանափակել է փետրվարի 25-ից մինչեւ մարտի 25-ը ընկած օրերին «Նոր Հայաստանի» հրավիրած նստացույցը: «Նոր Հայաստանին թույլ է տրվել միայն ցերեկային ժամերին միջոցառում անցկացնել Ազատության հրապարակում: Ուստի, ոստիկանությունը նախաձեռնությանը հորդորել է երեկոյան դադարեցնել նստացույցը:

«Հաշվի առնելով, որ ոստիկանությունում իրավաբանական մտքի եւ առհասարակ մտքի ճգնաժամ կա, ես տեղեկացնում եմ, որ ինչպես որ նախատեսված է լիազոր մարմնի որոշմամբ՝ ժամը 22:00-ին ես ավարտելու եմ իմ կազմակերպած հավաքը, բայց նաեւ տեղեկացնում եմ, որ ինձ դիմել է «Մենք ենք տերը մեր երկրի» նախաձեռնությունը, նրա ներկայացուցիչները խնդրել են այստեղ գտնվող գույքը, նաեւ պաստառները, որոնք ամբողջությամբ արտահայտում են իրենց գաղափարներն ու նպատակները, օգտագործման իրավունքով թողնել իրենց, որպեսզի իրենք ժամը 22:00-ից մինչեւ 08:00-ն օգտագործեն այս գույքը իրենց հավաքը պատշաճ կերպով անցկացնելու նպատակով»,- հայտարարեց Ավետիսյանը:

«Մենք ենք տերը մեր երկրի» նախաձեռնությունից Գագիկ Եղիազարյանը նշեց, որ իրենց նախատեսած հավաքը կլինի 100 հոգուց պակաս մասնակիցների թվով, ուստի, ըստ «Հավաքների ազատության մասին» օրենքի 24-րդ հոդվածի՝ իրազեկման կարիք չունի: Եղիազարյանը տեղեկացրեց, որ գիշերը Ազատության հրապարակում նախատեսում են քաղբանտարկյալ Գեւորգ Սաֆարյանի գործունեության, քրեական գործի մասին քննարկումներ անցկացնել:

Վարուժան Ավետիսյանն էլ, կարծելով, որ ոստիկանները կարող են Ազատության հրապարակում հերթապահության մնացող քաղաքացիների նկատմամբ բռնություն կիրառել՝ լրատվամիջոցներին խնդրեց գիշերը այնտեղ լինել:

Մի քանի հարց ուղղեցինք Վարուժան Ավետիսյանին.

-Պարոն Ավետիսյան, երեկ երեկոյան «Նոր Հայաստանը» հայտարարություն տարածեց, որ «կեսգիշերին ռեժիմի կողմից կազմակերպված սադրիչ գործողություններ են ակնկալվում Ազատության հրապարակում ամիսներ շարունակ նստացույցի մասնակցող քաղաքացիների նկատմամբ»: Ինչի՞ մասին էր խոսքը: Ինչպե՞ս կանխվեց դա եւ ինչո՞ւ եք կարծում, որ այսօր կլինի:

-Երեկ կանխվեց զուտ այն պատճառով, որ մեր գրագետ գործողությունները եւ իրավաչափ վարքը խախտեցին ոստիկանության պլանները: Իրենք երեկ ամբողջ օրը քննարկել-մտածել են՝ ինչ տարբերակ կարող են գտնել՝ շրջանցելու համար մեր գործողությունները: Չգտնելով որեւէ տարբերակ՝ մնացել են իրենց դավադրական պլանի շրջանակներում՝ անտեսել տարբեր հավաքների առկայությունը եւ փորձել հանրային կարծիք ձեւավորել, թե մեկ հավաք է տեղի ունենում Ազատության հրապարակում, դա անօրինական է, կարող ենք կիրառել օրենքով մեզ տրված լիազորություններ, այդ թվում՝ համակարգված բռնություն ակցիայի մասնակիցների նկատմամբ:

-Ըստ ձեզ՝ ինչո՞ւ է այդ օրերին արգելվում Ազատության հրապարակում ձեր գործողությունները:

-Իրենք արդեն տեղյակ էին մարտի 1-ի մեր հանրահավաքի մասին: Ենթադրաբար էլ կարող էին իմանալ, որ մարտի 1-ին ակտիվություն կցուցաբերենք: Դա կանխելու նպատակավ փորձել են շուրջօրյա բողոքի առկայությունը վերացնել: Դրա համար իրենց պետք էր պլանավորել, աշխատել, սադրանքներ անել եւ չակերտավոր հիմքեր ստեղծել ինչ-որ գործողություն անելու համար:

-Այսօ՞ր են սպասվում այդ սադրանքները:

-Երեկ էլ էին սպասվում, այսօր էլ են սպասվում: Այսօրվա հայտարարությունից առավել քան ակնհայտ է, որ նման բան լինելու է: Իրենք դարանակալ գազանի նման սպասում են, թե երբ, որ պահն է ավելի հարմար, որ կարողանան իրենց պլանը իրագործել: