Հովիկ Աբրահամյանի մութ գործարքը կամ ինչպես խրախուսել կոռուպցիան

ՀՀ վարչապետի 2016 թվականի հունվարի 13-ի N 5-Ա որոշմամբ ստեղծված ՀՀ Արտահանման աջակցման խորհուրդը այս տարվա մայիսի 1-ի դրությամբ մշակել և հավանության է արժանացրել վերոնշյալ որոշմամբ գերակա համարվող արտադրատեսակների արտադրությամբ և արտահանմամբ զբաղվող ՀՀ տնտեսվարող սուբյեկտներին աջակցության տրամադրման մեխանիզմը: Աջակցության մեխանիզմի վերաբերյալ տեղեկատվությունը աշխատանքային կարգով տրամադրվել է ՀՀ տնտեսվարող սուբյեկտներին և մի շարք քննարկումների ժամանակ վերջիններիս իրազեկվել է մեխանիզմից օգտվելու ընթացակարգի վերաբերյալ: Այս մասին Armtimes.com-ի հարցմանն ի պատասխան տեղեկացրեցին ՀՀ էկոնոմիկայի նախարարությունից: Խորհուրդը ղեկավարում է անձամբ վարչապետ Հովիկ Աբրահամյանը:

Արտահանման աջակցման խորհուրդն իր գործունեության 5 ամիսների ընթացքում  գումարել է ընդամենը 2 նիստ: ՀՀ Արտահանման աջակցման խորհրդի աջակցության մեխանիզմից օգտվելու նպատակով առ այսօր ՀՀ տնտեսվարող 15 սուբյեկտներ հայտ են ներկայացրել ՀԱԱԳ, ՀԱԱԳ-ի կողմից հաստատվել են 9 ընկերության սահմանաչափերը: Նշված ընկերություններն արդեն իսկ կարող են դիմել ՀՀ առևտրային բանկերին` հաստատված սահմանաչափերի հիման վրա նախաարտահանման ֆինանսավորում կամ արտահանման ապահովագրության միջոցով ֆակտորինգ ստանալու համար, որից հետո կարող են դիմել Հայաստանի զարգացման հիմնադրամին` բանկերի կողմից տրամադրված վարկերի տոկոսադրույքների սուբսիդավորման և ՀԱԱԳ-ի կողմից ապահովագրության համար գանձվող ապահովագրավճարների փոխհատուցման համար:

Տեղական արտադրանքի արտահանման աջակցության գերակա տեսակներ սահմանաված գինու, մրգային օղիների, պահածոների, մսամթերքի, ձկնատեսակների և ձկնամթերքի ցանկը փոփոխության չի ենթարկվել, սակայն մասնավոր հատվածի կողմից ներկայացվել են առաջարկություններ, մասնավորապես` դեղամիջոցները և պատվաստանյութերը ցանկում ներառելու վերաբերյալ, ինչը ներկայումս քննարկվում է: Գերակա համարվող արտադրատեսակների ցանկում ներառելու վերաբերյալ առաջարկությունը ներկայացվել է Հայաստանի դեղ արտադրողների և ներմուծողների միության կողմից:

Armtimes.com-ը միայն մեծ ջանքերի գնով կարողացավ էկոնոմիկայի նախարարությունից ստանալ այն 9 ընկերությունների ցանկը, որոնք կարող են աջակցություն ստանալ: Դրանց մեծ մասը գինեգործական ընկերություններ են:«Վանսեվան» ՍՊԸ-ի մասին տեղեկատվություն գտնելը գրեթե անհաս է: Այս ընկերության մասին որեւէ նշում չկա ՀՀ ԱՆ իրավաբանական անձանց պետական ռեգիստրի գրանցամատյանում: Մեզ հայտնի դարձավ միայն, որ ընկերությունը Երեւանի սուպերմարկետներում վաճառում է իր արտադրած «Voskeni» գինիները:

Նշված կազմակերպություններից ամենակասկածելին սակայն «Համլետ Հովսեփյան» ԱՁ-ն է (անհատ ձեռներեց): ՀՀ ԱՆ իրավաբանական անձանց պետական ռեգիստրի գրանցամատյանում այս իրավաբանական սուբյեկտը գրանցվել է 2012 թվականին, իսկ այսօրվա դրությամբ հաշվառումից հանված է: Մեզ հայտնի դարձավ, որ ԱՁ-ն գրանցված է ք.Ապարան, Բաղրամյան 45/24 հասցեում:

ՀՀ վերահսկիչ պալատի 2013 թվականի հաշվետվության մեջ հիշատակվում է «Համլետ Հովսեփյան» ԱՁ-ն: «Դանինին» եւ «Համլետ Հովսեփյան» Ա/Ձ-ն մասնակցել են մրցույթի ՔԿՀ-ների համար 88 տոննա մսի պահածո մատակարարելու համար: «Դանինին» առաջարկել է 1 կգ-ի համար 1596 դրամ, իսկ «Համլետ Հովսեփյանը» 1650 դրամ: Հաղթել է «Դանինին», բայց այդ պահածոն նա գնել է «Համլետ Հովսեփյանից» 1420 դրամով եւ մատակարարել 1596 դրամով: Նման սխեմաներ բազմիցս են կիրառվել: Թե ում են պատկանում կամ ում հետ են փոխկապակցված այս երկու ընկերությունները, ՎՊ-ն, բնականաբար, չի էլ փորձել պարզել: Պետական գնումների մրցութային հանձնաժողովներից մեկի փաստաթղթերում«Համլետ Հովսեփյան» Ա/Ձ-ի կոնտակտային հեռախոսահամարին զանգահարեցինք, որպեսզի հասկանանք, թե ինչպես է կարողացել հաշվառումից հանված ընկերությունը նման բարձր մակարդակի աջակցություն ստանալ, սակայն հեռախոսահամարը չէր սպասարկվում:

Շատ չի անցել Հովիկ Աբրահամյանի՝ կոռուպցիային «մարտահրավեր» նետած ելույթից, իսկ սա կոռուպցիայի ցայտուն օրինակի է: Մնում է պարզել, թե այս ընկերությունն ինչ կապ ունի հենց վարչապետ Հովիկ Աբրահամյանի հետ: