Սեֆիլյանը ձերբակալվել է. ծրագրել էր զենքի գործադրմամբ զավթել շենքեր. ՏԵՍԱՆՅՈՒԹ

14:48 Այս պահին խուզարկություն է կատարվում Ժիրայր Սեֆիլյանի բնակարանում։ Ներս են ներթափանցել դուռը կոտրելու միջոցով։ Մեր թղթակիցը փոխանցում է, որ այնտեղ է նաեւ «Ժառանգություն» խմբակցության պատգամավոր Զարուհի Փոստանջյանը, որին չեն թույլատրել մասնակցել խուզարկությանը: Նանոր Սեֆիլյանը ոստիկաններին խնդրել է փաստաբանի ներկայությամբ խուզարկել բնակարանը, սակայն վերջիններս մերժել են եւ սկսել խուզարկությունները: Մեր թղթակցի հետ զրույցում Փոստանջյանը իրավապահների գործողություններն անօրինական է որակել: 

14:10 Նոր Հայաստան հանրային փրկության ճակատի անդամ Կարո Եղնուկյանը քիչ առաջ մեր զրույցում ասաց, որ Ժիրայր Սեֆիլյանը բերման է ենթարկվել «Սարդարապատ» գրասենյակից: «Իմ տեղեկություններով, սկզբում տուն են գնացել, որովհետեւ տան դուռը ջարդված է եղել, հետո գնացել են գրասենյակ»,- ասաց Եղնուկյանը: Նա նաեւ ասաց, որ սա քաղաքական հետապնդում է Ժիրայր Սեֆիլյանի նկատմամբ: Իսկ թե ովքեր են սույն գործով կալանավորվածները, Եղնուկյանն ասաց, որ չգիտի:

13:50 Մեր տեղեկություններով, Ժիրայր Սեֆիլյանին դեռ Ձերբակալվածների պահման վայր չեն տեղափոխել, նա գտնվում է ՀՀ քննչական կոմիտեում:

13:25 2016թ. մայիսի 20-ին Երևան քաղաքի Ծիծեռնակաբերդի խճուղու սկզբնամասում տեղի ունեցած ճանապարհատրանսպորտային պատահարի դեպքի վայր ժամանած ոստիկանության ծառայողները պատահարի մասնակցի ավտոմեքենայից հայտնաբերել են ԱԿ-74 տեսակի երկու ինքնաձիգ՝ 120 փամփուշտ, հայտնում են ՔԿ մամլո ծառայությունից:

Նշվում է, որ հիշյալ ավտոմեքենայի վարորդն ու ուղևորն ապօրինի կերպով զենք և ռազմամթերք պահելու և փոխադրելու կասկածանքով բերման են ենթարկվել ոստիկանություն:

Հաղորդվում է, որ դեպքի առթիվ հարուցվել է քրեական գործ՝ ՀՀ քրեական օրենսգրքի 235-րդ հոդվածի 2-րդ մասով: ՀՀ քննչական կոմիտեի ՀԿԳ քննության գլխավոր վարչությունում իրականացված քննչական գործողությունների արդյունքում պարզվել է վարորդի, ուղևորի ինքնությունը, ինքնաձիգների շրջանառության հանգամանքները:

«Մասնավորապես՝ քրեական գործի շրջանակներում համատեղ կատարված քննչական և օպերատիվ-հետախուզական մեծածավալ միջոցառումների արդյունքում պարզվել է, որ Ժիրայր Սեֆիլյանը մի խումբ անձանց հետ ծրագրել էր զինված խմբավորումների միջոցով, զենքի գործադրմամբ զավթել շենքեր, շինություններ, հաղորդակցության և կապի միջոցներ, այդ թվում՝ Երևանի հեռուստաաշտարակը, ինչի ընթացքում էլ վերջինս կազմակերպել է մի խումբ անձանց կողմից ապօրինի կերպով զենք և ռազմամթերք ձեռք բերելը, փոխադրելը և տարբեր վայրերում դրանք ապօրինի կերպով պահելը:

Ընդ որում, խմբի անդամները որոշ հանցավոր գործողություններ ծրագրել էին իրականացնել ապրիլյան պատերազմին հաջորդող ժամանակահատվածում»,- ասվում է ՔԿ հաղորդագրությունում:

Նշվում է, որ 2016թ. մայիսի 20-ին տեղի ունեցած վերը նկարագրված ճանապարհատրանսպորտային պատահարի վայրում էլ հայտնաբերվել են Ժիրայր Սեֆիլյանի կազմակերպմամբ խմբի կողմից ապօրինի կերպով շրջանառվող երկու միավոր զենքն ու ռազմամթերքը:

Ըստ ՔԿ հաղորդագրության, քրեական գործի նախաքննությամբ ձեռք բերված ապացույցների հիման վրա, մի խումբ անձանց կողմից ապօրինի կերպով զենք և ռազմամթերք ձեռք բերելու, փոխադրելու և պահելու համար, ութ անձի առաջադրվել է մեղադրանք, նրանցից վեցը կալանավորվել են, մեկի նկատմամբ հայտարարվել է հետախուզում:

«Առաջադրված մեղադրանքները հիմնավորվել են ինչպես գործով ձեռք բերված բազմաթիվ ապացույցնելով, այնպես էլ՝ խմբի անդամների խոստովանական ցուցմունքներով:

Մի խումբ անձանց կողմից ապօրինի կերպով զենք և ռազմամթերք ձեռք բերելը, փոխադրելը և պահելը կազմակերպելու կասկածանքով 2016թ. հունիսի 20-ին Ժիրայր Սեֆիլյանը ձերբակալվել է»,- հայտնում են ՔԿ-ից: