Հանրապետականը դեռ կտա վարչապետի գնահատականը. ԱԺ ՀՀԿ խմբացկության ղեկավար

Հանրապետական խմբակցության ղեկավար Վահրամ Բաղդասարյանը թեեւ պատահական, բայց  խորհրդանշական ու հիշարժան է համարում այն հանգամանքը, որ Անկախության 25-ամյակի տոնակատարությունը համընկավ կառավարության ու վարչապետի փոփոխության հետ:

«Ինձ թվում է, հաջորդ 25-ամյակը նոր գործելաոճով, նոր գործիքներով մենք նոր Հայաստան պիտի կարողանանք կերտել»,- մեզ հետ զրույցում հույս հայտնեց նա: Վահրամ Բաղդասարյանի հետ զրուցեցինք կառավարությունում տեղի ունեցած եւ տեղի ունենալիք նոր փոփոխությունների մասին:

- Պարոն Բաղդասարյան, տրանսպորտի եւ կապի, էներգետիկայի ու գյուղատնտեսության նախարարներ նշանակվեցին հանրությանն ու քաղաքական դաշտին  անհայտ մարդիկ: Ո՞րն է երաշխիքը, որ նրանք կհաջողեն այդ ոլորտներում:

- Նրանք բավականին փորձառություն եւ պատրաստակամություն ունեցող մարդիկ են: Ինձ նաեւ թվում է, որ թե՛ կառավարությունը, թե՛ հանրությունը նոր դեմքերի կարիք ունեն: Իհարկե, նրանք դեռ պետք է դրսեւորվեն իրենց աշխատանքով, բայց ես չեմ ցանկանում ժամանակից շուտ գնահատականներ տալ: Պետք է սպասել, մինչեւ նրանք ներկայացնեն իրենց ծրագրերը եւ որոշ ժամանակ աշխատեն այդ ուղղությամբ:

- Նույնը վերաբերում է նաեւ նորանշանակ վարչապետ Կարեն Կարապետյանին: Կարծիք կա, որ նա «Հայռուսգազարդ» ընկերությունում լավ տնօրեն եւ հաջողակ մենեջեր է եղել, բայց այդ ընկերությունը, ինչպես ասում են՝ փողի վրա նստած հիմնարկ է եղել: Իսկ ֆինանսական միջոցների առկայությունը բիզնեսում հաջողություն ունենալու գրավականներից մեկն է: Մինչդեռ ՀՀ կառավարությունը փողի լուրջ խնդիր ունի, եւ ինչպես վարչապետն ինքն էր ասում՝ ՀՀ տնտեսությունը գտնվում է չափազանց ծանր վիճակում:

- Եկեք դեպքերից առաջ չընկնենք: Կ.Կարապետյանը բավականին լուրջ մոտեցումներով, լուրջ ծրագրերով է մտնում քաղաքական դաշտ: Եվ կարծում եմ, որ այն պատասխանատվությունը, որ նա գիտակցաբար ստանձնել է, պատվով ու հաջողությամբ կկատարի: Բնականաբար, մենք բոլորս էլ նրան պետք է սատար կանգնենք, որ այդ ծրագրերը կյանքի կոչվենք: Եվ աշխատանքի որոշակի ժամանակ հետո, մենք նրանց աշխատանքի գնահատականը կտանք:

- Սերժ Սարգսյանը Կարապետյանին ներկայացնելիս հայտարարեց, որ նա ունենալու է գործունեության ու կադրային քաղաքականություն վարելու ազատություն, բայց նոր նշանակումներից արդեն իսկ ակնհայտ է դառնում, որ տրված ազատությունն այդքան էլ մեծ չէ:  Վերանշանակվեցին Դավիթ Հարությունյանն ու Վաչե Գաբրիելյանը: Վարդան Արամյանը նախագահականից գործուղվեց: Նաեւ կարելի է վստահաբար ասել, որ Կարեն Կարապետյանը որեւէ ազդեցություն չի ունենա ուժային նախարարների ու արտգործնախարարի նշանակման հարցում: Ստացվում է, որ այս վարչապետի ազդեցությունը նույնպես կառավարության վրա խիստ սահմանափակ է լինելու:

- Ձեզ ինչու է թվում, որ Կարեն Կարապետյանը նախագահի կամ մեր հին կադրերին դեմ է ու չի ցանկանում աշխատել նրանց հետ: Նա Հայաստանում աշխատած տարիներին փորձառություն է ձեռք բերել ու նրանց  բոլորին ճանաչում է: Իսկ այդ նշանակումները կատարվում են հանրապետության նախագահի հետ համաձայնության դաշտում:

- Նորից մեջբերեմ վարչապետի այն հայտարարությունը, թե ՀՀ տնտեսությունը գտնվում է շատ ծանր, չափազանց ծանր վիճակում, ինչն արդեն դուք էլ եք ընդունում: Ի վերջո, նոր կառավարությունը կունենա՞ տնտեսության բոլոր ոլորտներում հավասար խաղի կանոններ հաստատելու հնարավորություն, ինչը թույլ կտա զարգացնել մեր երկիրը, եւ ինչը չստացվեց նախկին վարչապետ Հովիկ Աբրահամյանի մոտ:

- Այդ ամենը համեմատության դաշտում պետք է դիտարկել: Եթե մենք Անկախության ամբողջ 25 տարիների հետ ենք համեմատության մեջ մտնում, ապա կան բավականին ձեռքբերումներ: Կան նաեւ բավականին բացթողումներ ու դանդաղեցումներ: Եվ եթե Կ. Կարապետյանը գնահատելով ու գիտակցելով, որ մեր տնտեսությունը ծայրահեղ ծանր վիճակում է եւ եկել է այն շտկելու ծանր պատասխանատվությունը ստանձնելու, ուրեմն նա ունի դա անելու տեսլականն ու գործիքները, ունի այդ դեղատոմսը: Իսկ մենք պետք է սպասենք նրա ծրագրերին ու աշխատանքին, պետք է  սատար կանգնենք, որ նա կյանքի կոչի այդ ծրագրերը:

- Նա, կարծես թե, խնդիրներ ունի ձեր կոալիցիոն գործընկեր «Դաշնակցություն» կուսակցության հետ:

- Քաղաքական դաշտում ամեն ինչ էլ հնարավոր է, բայց մեծ խնդիրներ չկան: Կառավարությունը կամ վարչապետը, բնականաբար, կարող են դիտողություններ անել կամ հակադարձել այլ քաղաքական ուժերին: Բայց դրանք ընդամենը փոքրիկ դետալներ են, եւ մեր կոալիցիոն գործընկերոջ հետ հարաբերություններում որեւէ խանգարող հանգամանք չի կարող լինել:

- Իսկ հնարավո՞ր է, որ ՀՅԴ-ի պորտֆելների քանակը պահպանվեն, բայց նախարարությունները փոխվեն:

- Խնդրում եմ սահմանափակվել առայժմ կատարված նշանակումներով, զինվեք համբերությամբ ու սպասեք մյուս փոփոխություններին:

- Իսկ նոր ի՞նչ փոփոխություններ են նախատեսվում, իրենց պաշտոնները նոր լքողներ եւ նրանց փոխարեն նոր նշանակումներ լինելո՞ւ են:

- Բնականաբար, եթե կան չնշանակված նախարարներ, ապա պետք է լինեն նաեւ նոր նշանակումներ: Համբերությամբ սպասեք մնացած նշանակումներին ու կառուցվածքային փոփոխություններին:

- Կարծիք կա, որ կփոխվեն նաեւ ուժային կառույցների ղեկավարները, հատկապես պաշտպանության նախարար Սեյրան Օհանյանը:

- Ոչ բոլոր տեղեկությունները կարելի է ժամանակից շուտ հրապարակել ու տալ լրատվամիջոցներին: Այդ տեղեկությունները կտրվեն միայն այն ժամանակ, երբ այդ ուղղությամբ կլինի նախագահի հրամանագիրը: