Նոր նախապայման. Մարուքյանը պատասխանում է Սերժ Սարգսյանի իմպիչմենտ նախաձեռնելու առաջարկին

ԱԺ պատգամավոր «Լուսավոր Հայաստան» կուսակցության նախագահ Էդմոն Մարուքյանը, որի եղբայրը գլխավորում է հոկտեմբերի 2-ին Վանաձորում կայանալիք ավագանու ընտրություններում «Լուսավոր Հայաստանի» ցուցակը, ֆեյսբուքյան իր էջում պատասխանել է «Քաղաքացիական պայմանագիր» կուսակցության առաջարկներին:

Մարուքյանը նշել է, որ «Քաղաքացիական պայմանագիր» կուսակցության հայտարարություն-առաջարկը կրում է ոչ թե համագործակցային բնույթ, այլ իր մեջ պարունակում է քաղաքական շանտաժի տարրեր:

«Վանաձորում արդեն իսկ սկսվել է Հանրապետական կուսակցությանն իշխանությունից զրկելու անկասելի գործընթաց եւ այդ գործընթացի առաջամարտիկը Լուսավոր Հայաստան կուսակցությունն է: Եթե Հայաստանի երրորդ ամենախոշոր քաղաքում, ՀՀԿ-ին միասնաբար հաղթելու համար, ՔՊ-ին խանգարող միակ հանգամանքը իմ՝ Սերժ Սարգսյանի իմպիչմենտի նախագծին միանալու մեջ է, ապա, առանց վարանելու պաշտոնապես հայտարարում եմ՝ եթե մինչև այսօր՝ ժամը 18:00-ն, ՔՊ-ն ի պաշտպանություն Լուսավոր Հայաստանի ինքնաբացարկ հայտարարի Վանաձորի ՏԻՄ ընտրություններում, ապա անմիջապես դրանից հետո՝ ցանկացած պահի, պատրաստ եմ միանալ Նիկոլ Փաշինյանի հեղինակած իմպիչմենտի նախագծի տակ (ինչպես առաջարկվել է ՔՊ-ի կողմից): Այս պահին մեր գլխավոր խնդիրը պետք է լինի միասնաբար հաղթանակ տանել Հանրապետական կուսակցության նկատմամբ, և մեր բոլորի գործողությունները պետք է միտված լինեն այդ նպատակին: Հավատում եմ, որ այս քայլով մենք սկիզբ կդնենք միասնաբար առավել լայն քաղաքական համագործակցության մեր նպատակների և թիմերի միջև»,- գրել է Մարուքյանը։

Հիշեցնենք, որ երեկ Էդմոն Մարուքյանը ֆեյսբուքյան իր էջում կատարված գրառման միջոցով դիմեց Վանաձորի ՏԻՄ ընտրություններին մասնակցող բոլոր ընդդիմադիր ուժերին՝ առաջարկելով միավորել ջանքերը և համատեղ ուժերով ՀՀԿ-ի նկատմամբ հաղթանակը դարձնել առավել աներկբա և վերջնական:

Այս գրառմանն արձագանքեց «Քաղաքացիական պայմանագիր» կուսակցությունը: Կուսակցության վարչության անդամ Ռուբեն Ռուբինյանը ֆեյսբուքյան իր էջում գրեց, որ անհասկանալի է, թե ում նկատի ունի պարոն Մարուքյանը՝ ասելով «ընդդիմություն». «ՕԵԿ-ի՞ն, Վարդան Օսկանյանի՞ն, ԲՀԿ-ի՞ն։ ՔՊ-ն երբեք չի միավորվել և չի միավորվելու հանցագործների և խաբեբաների հետ»,- նշում էր Ռուբինյանը։

Այնուհետեւ, Ռուբինյանը կուսակցության անունից Մարուքյանին հետեւյալ առաջարկները ներկայացրեց.

«1. Հայտարարել, որ Սերժ Սարգսյանն անձամբ պատասխանատվություն է կրում Մարտի 1-ի ոճրագործության համար։
2. Սերժ Սարգսյանն ընտրվել է կեղծված ընտրություններով և չի հանդիսանում լեգիտիմ նախագահ։

3. Վաղը (այսօր-խմբ.) ողջամիտ ժամկետում Ազգային Ժողովին ներկայացնել Սերժ Սարգսյանի իմպիչմենտի նախագիծ։

Վերոնշյալ պայմանների կատարման դեպքում ՔՊ-ն կստորագրի իմպիչմենտի նախագծի տակ և Վանաձորում ինքնաբացարկ կանի հօգուտ ԼՀ-ի՝ ակնկալելով բանակցությունների սկիզբ ԼՀ-ի հետ մեկ կուսակցության մեջ միաձուլվելու շուրջ՝ հանուն մեկ, ուժեղ, իսկական ընդդիմության ձևավորման։

Հ.Գ. Եթե իմպիչմենտի նախագիծ գրելու ժամանակ չունեք, կարող ենք ձեզ փոխանցել 2014 թվականին Նիկոլ Փաշինյանի կողմից գրված և ձեր կողմից չստորագրված իմպիչմենտի նախագիծը»»:

Հիշեցնենք, որ այսօր ժամը 18:00-ին, լրանում է Վանաձորի ՏԻՄ ընտրությունների ինքնաբացարկի վերջնաժամկետը: Առավոտից մեզ չէր հաջողվում կապ հաստատել Մարուքյանի հետ՝ ճշտելու` ընդունո՞ւմ է նա «Քաղաքացիական պայմանագրի» առաջարկը: Մենք նաեւ հարցում էինք ուղարկել նրան ֆեյսբուքյան իր էջի միջոցով: 

Այս պահին հայտնի չէ նաեւ`արդյո՞ք այլ կուսակցություններից Մարուքյանն արձագանքներ ստացել է իր առաջարկի հետ կապված: