Վանաձորում ընդդիմությունը ՀՀԿ-ին միացյալ ուժերով չի ջախջախի-2

«Լուսավոր Հայաստանը», «Բարգավաճ Հայաստանը» եւ «Հայկական վերածնունդը» (ՕԵԿ) Վանաձորի քաղաքային իշխանությունը ՀՀԿ-ից վերցնելու ռեալ հնարավորություն են ստացել: Ավագանու ընտրությունների արդյունքներով, եթե այս ուժերը միավորվեն քաղաքապետի մեկ թեկնածուի շուրջ, ապա հաջորդ շաբաթվանից հանրապետության երրորդ քաղաքի ավագանիում ՀՀԿ-ն ընդդիմություն կդառնա, իսկ իշխանությունը կստանձնի վերոնշյալ երեք կուսակցությունների դաշինքը:

Արդեն մի քանի օր է՝ այս հարցով թեժ բանակցությունների են Արթուր Բաղդասարյանը եւ Էդմոն Մարուքյանը: Մարուքյանը համարում է, քանի որ ավագանիում ստացած մանդատների թվով իրենք ՀՀԿ-ից հետո երկրորդն են, ապա ՀՎ-ն եւ ԲՀԿ-ն պետք է միանան իրենց եւ Վանաձորի քաղաքապետ ընտրեն ԼՀ-ի ցուցակի առաջին համար Քրիստ Մարուքյանին՝ իր եղբորը: Նախկին ՕԵԿ-ում համաձայն չեն այս մոտեցման հետ: Նրանք էլ համարում են, քանի որ հանրապետության մասշտաբով իրենք շատ ավելի մեծ թվով հաղթանակներ են գրանցել ՏԻՄ ընտրություններում եւ շատ ավելի մեծ կուսակցություն են, ապա ոչ թե իրենք պետք է միանան ԼՀ-ին, այլ հակառակը` Լուսավոր Հայաստանը պետք է միանա իրենց:

Էդմոն Մարուքյանը հրապարակավ մերժել է այս առաջարկը, ասելով` ինչպես կարող է 10 մանդատ ստացած ուժը միանա  5 մանդատ ունեցող ուժին: Արթուր Բաղդասարյանն էլ ասում է` ինչպես կարող է հանրապետության մի քանի համայնքներում հաղթած, երկու խոշոր քաղաքների ավագանու երրորդ տեղը զբաղեցրած ուժը միանալ միայն Վանաձորում լոկալ հաղթանակ տարած նորաստեղծ փոքրիկ ուժին: Այսինքն, ստեղծվել է մի իրավիճակ, երբ երկու կողմի պատճառաբանություններն էլ հիմնավոր են: Սա նշանակում է, որ տեսակետների մոտեցումը դժվար կլինի:

Դեռ ժամանակ կա եւ հավանական է՝ բանակցությունները կշարունակվեն: Բայց Վանաձորում ստեղծված վիճակը հերթական անգամ ապացուցում է, որ ՀՀԿ-ին իշխանությունից հեռացնելը, ամբողջ Հայաստանում կամ առանձին որեւէ քաղաքում իշխանափոխություն անելը ինքնանպատակ չէ եւ չի կարող միավորման հիմք լինել քաղաքական ուժերի համար: Ենթադրենք՝ Վանաձորում ՀՀԿ-ի արբանյակ ընդդիմադիր ուժերի փոխարեն լինեին իսկապես ընդդիմադիր կուսակցություններ: Հավանականությունը, որ նրանք ընդհանուր հայտարարի կգային եւ ՀՀԿ-ին իշխանությունից կզրկեին, միեւնույն է, շատ փոքր է: Իշխանական կոալիցիա կազմելու եւ քաղաքի կառավարում իրականացնելու համար անհրաժեշտ է ընդհանուր մոտեցում, գաղափարներ եւ տվյալ դեպքում` քաղաքին վերաբերող ընդհանուր տեսլական ունենալ: Ի վերջո, միայն ՀՀԿ-ին փոքրամասնություն սարքելով քաղաք չես կառավարի:

Երեկ հայտնի դարձավ, որ Վանաձորում Արթուր Բաղդասարյանի կուսակցության քաղաքապետի թեկնածուն ծեծի է ենթարկել Հայ Ավետարանական եկեղեցու առաջնորդ Ռաֆայել Գրիգորյանին: Ակա մականունով թեկնածուն, ինչպես ծեծվածն է ներկայացնում՝ քաղաքում խուլիգանի համբավ ունի, նախկինում դատված է եւ այլն: Հիմա եթե Էդմոն Մարուքյանը եւ Արթուր Բաղդասարյանը, այնուամենայնիվ, քաղաքական պայմանավորվածության գան, ինչպե՞ս են Վանաձորում ԼՀ-ի ուսյալ երիտասարդները աշխատելու ՀՎ-ի`մարդ ծեծող երիտասարդի հետ: Էլ չենք խոսում ԲՀԿ-ի մասին, որի ցուցակում հաստատ մականունավոր թաղային հեղինակություններ կգտնվեն, որոնք կոնֆլիկտի մեջ կմտնեն ԼՀ-ի համանման կադրերի հետ: Մենք թերեւս ականատես չենք լինի, թե այս խնդիրն ինչպես են լուծում երեք կուսակցությունները, որովհետեւ ավելի հավանական է, որ  քաղաքական համաձայնությունն ի սկզբանե չկայանա:

Այս դեպքում էլ «Լուսավոր Հայաստանը», ԲՀԿ-ն եւ «Հայկական վերածնունդը» մեկ այլ փորձության առաջ կկանգնեն: ՀՀԿ-ն եւ ՀՅԴ-ն միասին Վանաձորում ստացել են 15 մանդատ, եւ որպեսզի ՀՀԿ-ի թեկնածուն ձայների մեծամասնությամբ քաղաքապետ ընտրվի, ավագանու եւս 3 անդամ պետք է կողմ քվեարկի նրան: Երեկ Նաիրա Զոհրաբյանն ու Հեղինե Բիշարյանը բացառել են, որ ՀՀԿ-ին ձայն կտան: «Լուսավոր Հայաստանն» առավել եւս ՀՀԿ-ին ձայն չի տա, քանի որ ընդհուպ մոտեցել է Վանաձորում քաղաքապետ ունենալու նպատակին:

Ամբողջ խնդիրը, սակայն, այն է, որ քաղաքապետն ընտրվելու է փակ գաղտնի քվեարկությամբ: Սա նշանակում է, որ Մարուքյան-Բաղդասարյան-Զոհրաբյան բանակցություններին զուգահեռ, այս օրերին ՀՀԿ-ն էլ բանակցում է պոտենցիալ ավագանու անդամների հետ՝ իրենց թեկնածուին պակասող երեք ձայնը ձեռք բերելու համար: Կարծում ենք,  ՀՀԿ-ականները սեփական ազարտի համար կաշխատեն մեկական ձայն ստանալ ԼՎ-ից, ԲՀԿ-ից եւ ՀՎ-ից: Կախված իրադարձությունների զարգացումից, կարող են, իհարկե, ոչ թե 3, այլ 13 ձայն վերցնել այս կուսակցություններից: Սա, սակայն, այն դեպքում, եթե վերջիններս շատ ոգեւորվեն եւ իրենց համար սահմանված գծերից անզգուշաբար դուրս գան: Դրանից հետո այս երեք ուժերին այլ բան չի մնա, քան «վհուկների որս» սկսել գտնելու համար, թե ովքեր են ՀՀԿ-ի թեկնածուի օգտին քվեարկած դավաճանները: