ՀՀԿ-ն աշխատում է, որ 2017թ. խորհրդարանական երկրորդ ուժը լինի իր հսկողության տակ

Իշխող Հանրապետական կուսակցությունը ոչ միայն պատրաստվում է 2017թ. խորհրդարանական ընտրությունների արդյունքում հնարավորինս մեծ տեղ գրավել հաջորդ Ազգային ժողովում, այլեւ զուգահեռաբար փորձում է լուծել նաեւ երկրորդ ուժի խնդիրը:

ՀՀԿ-ն կարծես թե հասկացել է, որ այլեւս չի կարող մեծամասնություն կազմել հաջորդ խորհրդարանում: Ամեն դեպքում, վերջին ՏԻՄ ընտրությունները ցույց տվեցին, որ ՀՀԿ-ի ակնկալած ձայների օպտիմալ թիվը 35 տոկոսը չի անցնում: Իսկ կառավարություն ձեւավորելու համար անհրաժեշտ է կայուն մեծամասնություն, որն ավելին է: Եվ եթե որեւէ ուժ կայուն մեծամասնություն ապահովելու համար անհրաժեշտ ձայների քանակ չի հավաքել, ապա դա կարող է անել կոալիցիա կազմելու միջոցով: Սահմանադրության եւ Ընտրական օրենսգրքի տրամաբանության համաձայն՝ կոալիցիա կարող են կազմել միայն առավելագույն ձայներ ստացած երկու ուժերը: Երրորդ կամ մի կերպ անցողիկ շեմը հաղթահարած կուսակցությունները կամ դաշինքները զրկված են այդ հնարավորությունից:

Եվ հիմա ՀՀԿ-ն մտահոգված է ոչ միայն ԱԺ ընտրություններին հնարավորինս շատ ձայներ հավաքելու խնդրով, այլեւ պետք է պայքարի նաեւ երկրորդ ուժի համար: Այսինքն, այդ կուսակցության համար շատ կարեւոր է լինելու, թե ով կդառնա երկրորդ ուժը, եթե իհարկե այս անգամ էլ կարողանա առաջինն ինքը լինել: Ամեն դեպքում, եթե ՀՀԿ-ն դառնա առաջինը, իսկ երկրորդ տեղը զբաղեցնի իր ազդեցությունն անմիջականորեն չկրող ուժերից որեւէ մեկը, ապա դա իշխանության համար մեծ խնդիր է լինելու: ՀՀԿ-ի ազդեցությունն անմիջականորեն չկրող ուժերը կարող են հենց իրենք նախաձեռնել կայուն մեծամասնություն ձեւավորելու գործընթացն ու, ինչու չէ, հաջողել: Այս պարագայում արդեն ՀՀԿ-ն կկորցնի իշխանությունը: Այնպես որ, այսօր իշխող կուսակցությանը խիստ անհրաժեշտ է, որ երկրորդ տեղում հայտնվող ուժը կրի իր ազդեցությունը, որպեսզի հանկարծ իրավիճակը դուրս չգա իր հսկողությունից:

Ամենավառ երեւակայության դեպքում անգամ դժվար է ակնկալել, որ ՀՀԿ-ի հետ այսօր կոալիցիոն գործընկերության մեջ գտնվող «Դաշնակցությունը» կկարողանա զբաղեցնել երկրորդ տեղը, որպեսզի իշխանությունների համար խնդիրներ չառաջանան: Ուրեմն այդ տեղը պետք է զբաղեցնեն ՀՀԿ-ի նախկին կոալիցիոն գործընկերներ «Օրինաց երկիր» կամ «Բարգավաճ Հայաստան» կուսակցությունները, որ ԱԺ-ն եւ իշխանությունը նորից մնա ՀՀԿ-ի վերահսկողության ներքո:

Իր ներկա հնարավորություններով ու վարկանիշով ԲՀԿ-ն չի կարողանա ԱԺ-ում նորից երկրորդ տեղը զբաղեցնել: Դա կարող է հնարավոր լինել միայն այն դեպքում, եթե Գագիկ Ծառուկյանը նորից գլխավորի ԲՀԿ-ն եւ ընտրություններին մեծ գումարներ ծախսի: Իսկ թե Ծառուկյանն ինքն ինչպես է վերաբերվում իր հնարավոր վերադարձին կամ ովքեր են կազմակերպել այդ վերադարձին ուղղված համաժողովրդական շարժումները, այդ մասին՝ հաջորդ դասին: Վերը նշված խնդիրների շուրջ զրուցեցինք ՀՀԿ խմբակցության ղեկավար Վահրամ Բաղդասարյանի հետ:

- Պարոն Բաղդասարյան, տեսակետ կա, որ Գագիկ Ծառուկյանի վերադարձը իշխանություններին է ձեռնտու:

- Խորհրդարանական ընտրությունների մասին ժամանակից շուտ պետք չէ ենթադրություններ անել: Բնականաբար, յուրաքանչյուր քաղաքական ուժ եթե իր առջեւ նպատակ չի դնում, որ մեծամասնություն կազմի, ուրեմն նա վստահ չէ իր ուժերի վրա: Մենք վստահ ենք մեր ուժերի վրա, սակայն դա ինքնավստահություն չէ: Մենք նաեւ որեւէ մեկին չենք թերագնահատում: Այն բոլոր քաղաքական ուժերը, որոնք կմասնակցեն ԱԺ ընտրություններին, մենք բոլորին կվերաբերենք շատ լուրջ, բայց մենք կատարելու ենք մեր գործը, մեր ընտրարշավն ենք կազմակերպելու: Մենք չենք բացառում, որ կոալիցիոն գործընկերության միջոցով պետք է ձեւավորվի կայուն մեծամասնությունը, բայց մինչեւ ընտրությունները չի կարող նման որոշում կայացվել:

- Բայց մտահոգություն ունեք, չէ՞, որ ստիպված եք լինելու կոալիցիա կազմելով՝ ձեւավորել կայուն մեծամասնություն:

- Ես լուրջ չեմ համարի այն քաղաքական ուժին, որն առանց մտահոգության գնա ընտրությունների: Անհանգստությունը միշտ կա, եւ մեր հաջողության հիմնական գրավականը հենց այդ անհանգստության մեջ է, որ մենք ավելի զգոն լինենք: Մտահոգություն եւ անհանգստություն չունենալը նշանակում է հանգստացնել թիմին, իսկ երբ թիմը հանգիստ է լինում, հետեւանքը լուրջ բացթողումներն են լինում: Իսկ մենք մեր թիմի բոլոր անդամներին հորդորել ենք, որ գնալու ենք առավելագույնս անխոցելի ընտրությունների: Եվ ԸՕ-ի փոփոխությունները ընտրությունների նկատմամբ հանրության վստահության բարձրացման նպատակ ունի, ինչի համար էլ մենք զիջումների գնացինք: Մեր թիմը պետք է լինի զգոն, որպեսզի կարողանա իր ուժերը ճիշտ բաշխել, որ մենք կարողանանք հասնել հաջողության: Եթե մենք այս պահից ասենք, թե խնդիր չունենք, դա նշանակում է՝ սառեցնել թիմին այդ մրցապայքարից:

- Բայց դուք անհանգիստ չե՞ք նաեւ այն առումով, թե ով կարող է լինել երկրորդ ուժը: Եթե լինի մի այնպիսի ուժ, որի հետ համագործակցելը դժվար է, դա խնդիր կառաջացնի:

- Քաղաքական դաշտում որեւէ բան հավերժական չէ: Կոնկրետ այդ տեսանկյունից մենք հանգիստ ենք, թե երկրորդ կամ երրորդ ուժը ով կլինի եւ նման հաշվարկներ չենք կատարում: Ես դեռ չգիտեմ, մենք առաջի՞նն ենք լինելու, թե ոչ: Համենայնդեպս, մենք մեր ուժերը չենք թերագնահատում, բայց նաեւ չենք գերագնահատում: Իսկ մնացածը ցույց կտան քաղաքական զարգացումները: Հատկապես որ քաղաքականության մեջ չկան մշտական թշնամիներ կամ բարեկամներ:

- ՀՅԴ-ն երկրորդ ուժը լինելու հեռանկար չունի, հավանաբար ձեզ ձեռնտու կլինի Գագիկ Ծառուկյանի վերադարձն ու նրա հետ կրկին համագործակցելը:

- Այդ հարցի պատասխանը կտա Գագիկ Ծառուկյանը, մենք նման միջնորդություններով չենք զբաղվում: Յուրաքանչյուր քաղաքական գործիչ կամ նախկին քաղաքական գործիչ ինքն է որոշում իր ճակատագիրը: