Ինչ հուշեց դատավորը ԲՀԿ-ական պատգամավորի որդու դատական գործով

Կրտսեր Գուրգեն Արսենյանը

Արսենյանի ընկերը՝ Գուրգեն Գրիգորյանը

Կենտրոն եւ Նորք-Մարաշ վարչական շրջանների ընդհանուր իրավասության դատարանում այսօր մեկնարկեց Միացյալ ազգային կուսակցության (ՄԱԿ) նախագահ, ԱԺ ԲՀԿ խմբակցության պատգամավոր Գուրգեն Արսենյանի որդու՝ Գուրգեն Արսենյանի մասնակցությամբ այս տարվա ապրիլի 17-ին տեղի ունեցած միջադեպի վերաբերյալ գործով առաջին դատական նիստը:

Հիշեցնենք. միջադեպը տեղի է ունեցել ժամը 01:00-ի սահմաններում: Երեւան քաղաքի Աբովյան փողոցում գործող «Կրիստալ» գիշերային ակումբում 5 անձանց միջեւ չնչին առիթից՝ ուսով դիպչելու պատճառով ծագած վիճաբանությունը շարունակվել էր ակումբից դուրս, որտեղ այն վերածվել էր կռվի: Վիճաբանող կողմերից մեկում եղել է պատգամավորի որդին՝ իր երկու ընկերների հետ: 

Սույն քրեական գործով կալանքի տակ են գտնվում 21-ամյա Գուրգեն Արսենյանի երկու ընկերները՝ Գուրգեն Գրիգորյանը եւ Արմեն Ներսիսյանը: Արսենյանը նախաքննության սկզբում կալանավորվել է, սակայն նրա նկատմամբ ավելի ուշ խափանման միջոց է ընտրվել չհեռանալու մասին ստորագրությունը:

Այսօրվա դատական նիստի ընթացքում տեղեկացանք, որ վիճաբանության հակառակ կողմի երկու երիտասարդների նկատմամբ քրեական հետապնդումը դադարեցվել է արարքներում հանցակազմի բացակայության հիմքով:

Գործով նախագահող դատավոր Գագիկ Պողոսյանը հետաքրքրվեց ամբաստանյալների կենսագրական տվյալներով: Արսենյանի որդին հայտնեց, որ նախկինում դատապարտված չի եղել, բնակվում է Երեւանում, ներկայումս էլ սովորում է Երեւանի մանկավարժական համալսարանի 4-րդ կուրսում: Ամբաստանյալներից Գուրգեն Գրիգորյանն էլ հայտնեց, որ նախկինում դատապարտված է եղել. վերջինս, սակայն, չհիշեց, թե քանի անգամ է դատապարտվել: Գործով մյուս ամբաստանյալ Արմեն Ներսիսյանն էլ դատավորի հարցին ի պատասխան նշեց, որ առողջական խնդիրներ ունի՝ թոքի հետ կապված:

Այնուհետեւ դատավոր Գագիկ Պողոսյանը դատավարության կողմերից հետաքրքվեց, թե մինչ դատաքննությանն անցնելը միջնորդություններ ունե՞ն ներկայացնելու, ինչին պաշտպանական կողմը բացասական պատասխան տվեց: Նիստի մեկնարկից դեռ կես ժամ էլ չէր անցել, երբ Գագիկ Պողոսյանը 10 րոպե ընդմիջում հայտարարեց: Հետաքրքիրն այն է, որ այդ ընդմիջումից հետո պաշտպանական կողմը «հիշեց», որ արագացված դատական քննություն անցկացնելու միջնորդություն ունեն ներկայացնելու, ինչն էլ հիմք է տալիս ենթադրելու, որ այդ «հուշումն» արվեց դատավորի կողմից:

Ամբաստանյալ Գուրգեն Արսենյանը հանդես եկավ միջնորդությամբ՝ խնդրելով արագացված դատաքննության կարգ կիրառել: «Օգտվելով մեր դատավարական իրավունքներից խնդրում ենք կիրառել արագացված դատաքննության կարգ: Գիտակցում եմ իմ միջնորդության բնույթն ու դրա հետեւանքները»,-ասաց Արսենյանը, որին միացան նաեւ նրա ընկերները՝ Գուրգեն Գրիգորյանը եւ Արմեն Ներսիսյանը: Գործով մեղադրող դատախազ Նալբանդյանը մինչ ներկայացված միջնորդության վերաբեյալ դիրքորոշում հայտնելը հետաքրքրվեց, թե սա արդյո՞ք նշանակում է, որ ամբաստանյալները ընդունում են իրենց առաջադրված մեղադրանքը, ինչին ի պատասխան նրանք ասացին, որ մեղադրանքում իրենց մեղավոր են ճանաչում: Նշենք, որ նախաքննության ընթացքում մեղադրողը դեմ է եղել արագացված դատաքննության կարգ կիրառելուն, այսօր էլ նա դատարանից ժամանակ խնդրեց՝ արագացված դատաքննության կարգի վերաբերյալ դիրքորոշում հայտնելու համար: Չի բացառվում, սակայն, որ մեղադրողն այնուամենայնիվ փոխի իր դիրքորոշումը:

Նշենք, որ դատարանը արագացված կարգով դատական քննություն անցկացնելիս քրեական գործով ձեռք բերված ապացույցների ընդհանուր կարգով սահմանված հետազոտություն չի կատարում, սակայն ուսումնասիրում է ամբաստանյալի անձը բնութագրող տվյալները, պատասխանատվությունը եւ պատիժը մեղմացնող ու ծանրացնող հանգամանքները: Դատարանը արագացված կարգով դատական քննության արդյունքում մեղադրական դատավճիռ կայացնելիս նշանակում է պատիժ, որը չի կարող գերազանցել կատարված հանցագործության համար նախատեսված առավել խիստ պատժի երկու երրորդը: Այսինքն, պատիժը մեղմացվում է:

Երբ Գուրգեն Արսենյանի որդին կալանավորվել էր, նա մեր զրույցում ասել էր, թե որդին առաջադրված մեղադրանքը չի ընդունում: Նա նաեւ կարծիք էր հայտնել, որ տեղի ունեցածը ոչ թե խուլիգանություն է, այլ՝ սովորական վիճաբանություն: Այսօր, սակայն, դատարնում նա չցանկացավ պատասխանել լրագրողների հարցերին:

Կրտսեր Գուրգեն Արսենյանի եւ Արմեն Ներսիսյանի պաշտպան Արտակ Քոչարյանը մեր զրույցում ասաց, որ գործով տուժողներ չկան: Մեր հարցին, թե ի՞նչ փոխվեց, որ ամբաստանյալները որոշեցին ընդունել իրենց առաջադրված մեղադրանքները, Քոչարյանը պատասխանեց. «Իրենք սկզբում հայտարարել են իրենց կարծիքը, հետո, խորհրդակցելով փաստաբանների հետ, փորձեցին օգտվել այդ հնարավորությունից, որը օրենքով իրենց ընձեռնված է: Սպասում ենք դատախազի դիրքորոշմանը: Եթե մենք դատաքննությամբ գնանք, ապա մենք ապացույցների հետ կապված մեծ աշխատանք ունենք անելու, բայց մենք որոշեցինք  պաշտպանական մարտավարությունը փոխել»:

21-ամյա Գուրգեն Արսենյանին եւ նրա երկու ընկերներին մեղադրանք է առաջադրվել ՀՀ քրեական օրենսգրքի 258-րդ հոդվածի 4-րդ մասով (Խուլիգանությունը, որը կատարվել է զենքի կամ որպես զենք օգտագործով առարկաների գործադրմամբ): 

Այս գործով հաջորդ դատական նիստի տեղի կունենա 2017 թվականի հունվարի 19-ին: