Պատասխան եք տալու այ դավաճաններ. Արմեն Վիրաբյանն արձագանքում է Բաքու գնալու մասին լուրերին

«Ժառանգություն» կուսակցության մամուլի խոսնակ Դավիթ Սանասարյանը երեկ ֆեյսբուք սոցցանցի միջոցով զրուցել է Արմեն Վիրաբյանի հետ, որն ըստ ադրբեջանական Haqqin.az  կայքի՝ պատրաստվում է Բաքու մեկնել եւ միանալ խաղաղության հարթակին: Վերջինս երեկ հարցազրույց էր տվել Haqqin.az –ին՝ նշելով, որ «Էլեկտրիկ Երեւանի» նախաձեռնողներից է եւ Րաֆֆի Հովհաննիսյանի համակիրը: «Էլեկտրիկ Երեւանի» նախաձեռնողներից երկուսը հերքեցին նրա կապը այդ ակցիաների հետ: Դավիթ Սանասարյանն էլ պնդում է, որ նա «Ժառանգության» անդամ չէ:

Սանասարյանը մեզ հետ զրույցում ասաց, որ Վիրաբյանի հետ զրույցից ինքը հասկացել է, որ նա չի մեկնելու Բաքու, ուղղակի նրան մոլորության մեջ են գցել:

«Ես պարզապես կարող եմ ասել, որ խոսել եմ հետը: Ասաց, որ տեսաուղերձով հանդես կգա, կասի, թե ինչն ինչոց է: Այս պահին նա Գերմանիայում է, վստահեցրեց, որ չի պատրաստվում գնալ Բաքու: Ինչքան հասկացա՝ իրեն գցել են մոլորության  մեջ, ասել են, որ պետք է ինչ-որ հայտարարության միանա, որով խաղաղություն է քարոզվում Հայաստանի եւ Ադրբեջանի միջեւ: Արմենի հայրը ղարաբաղյան պատերազմի մասնակից է, իրենք հայկական Չարդախլու գյուղից են, նա դեմ է պատերազմներին, բայց նաեւ դեմ է հող հանձնելուն: Այսքանը կարող եմ ասել:

- Դավիթ, Արմեն Վիրաբյանը ինչո՞ւ է Գերմանիա գնացել:

- Աշխատում է, չգիտեմ ինչ խնդիրներ ունի, բայց գնացել է Գերմանիա՝ աշխատելու:

- Նա «Ժառանգութուն» կուսակացության անդամ եղե՞լ է:

- Ոչ, «Ժառանգության» անդամ չի եղել, համակիր է եղել:

- Բայց նաեւ Երեւանի ավագանու 2013-ի ընտրություններին «Ժառանգության» ցուցակում է եղել:

- Երեւի: Նա զարգացած տղա է, սրիկա չի: Ամեն դեպքում, ինչքան որ ճանաչել եմ այդ կարճ ընթացքում՝ նորմալ մարդ է: Հավանաբար սխալվել է haqqin.az-ին հարցազրույց տալով, որովհետեւ այդ կայքը ոչ թե խաղաղություն է ուզում, ոչ թե ճշմարտություն է հետապնդում, այլ կոնկրետ բիզնես քարոզչական մեքենա է, ու այդ բիզնեսն անում է նաեւ զինվորների արյան հաշվին: Այնպես որ իմ կոչն է բոլորին՝ այդ լրատվամիջոցին որեւէ բառ մի ասեք:

- Ո՞վ է մոլորեցրել Արմեն Վիրաբյանին, ո՞ւմ հետ է նա կապի մեջ եղել, տեղյա՞կ եք:

- Որքան հասկացա Վահան Մարտիրոսյանը եւ նրանք, որ Բաքվում են հայտնվել:

- Փաստորեն, այդ մարդիկ աշխատում են ուրիշներին ներգրավելու ուղղությամբ:

- Այո, կոնկրետ միջոցառումներ են իրականացնում: Ես վստահ եմ, որ նրանք փորձել են այլ մարդկանց էլ այնտեղ տանել: Խոպան են գնացել, փող են աշխատում:

- Իսկ իրենք գումար առաջարկո՞ւմ են: Կոնկրետ Արմենին առաջարկե՞լ են:

- Ինչքան հասկացա՝ Արմենի դեպքում նման բան չի եղել, բայց այլ դեպքերում առաջարկում են: Ես նման մեկի հետ էլ եմ խոսել, նման առաջարկներ են եղել:

Ի դեպ, Արմեն Վիրաբյանը դեռ տեսաուղերձով հանդես չի եկել, սակայն ժամեր առաջ գրառմամբ է հանդես եկել ֆեյսբուքում՝ դավաճաններ համարելով իրեն քննադատողներին:

«Հատուկ պարապ-կարապների ու մեգա ԲՏ-երի համար:
Նախ դուք ով եք, այ տզրուկներ եւ ներվակերներ։ Ո՞վ ա Բաքվում. Իմ համար Եվրոպայում եմ: Չեք հավատում կարամ նկար ուղարկեմ, այ խավարասերներ!!! Ո՞վ ա դավաճան, ինչը դավաճանել... Այ Հուդաի ծնունդներ, Պատասխան եք տալու այ ԴԱՎԱՃԱՆՆԵՐ: Ամոթ ձեզ!!! Աղոթեք ուղղակի, որ չխաչվեն մեր ճանապարհները:
Կանխավ ուրախ եմ իմ ընկերների համար, այս կգբ-ական եւ գեբբելսյան սուտն ու հերյուրանքը տարածողներին կանգնեցնելու համար!»:

Մինչ այդ haqqin.az-ը նոր հոդված է հրապարակել Վիրաբյանի մասին՝ այս անգամ նշելով, որ Արմեն Վիրաբյանը ՀՀ պաշտպանության փոխնախարար Դավիթ Տոնոյանի ազգականն է:

Նոր հրապարակման մեջ, որտեղ Վիրաբյանը դիմում է Իլհամ Ալիեւին, հրապարակված են նաեւ երիտասարդի անձնագրի էջերի պատճենները:

Ալիեւին ուղղված նամակում Վիրաբյանը նշում է, որ բավական ժամանակ է՝ պայքարում է Սերժ Սարգսյանի դեմ, ով կեղծում է ընտրությունները, խախտում մարդկանց իրավունքները: Նշում է, որ Հայաստանում վտանգված է եղել իր կյանքը, այդ իսկ պատճառով արտագաղթել է: Վիրաբյանն ընդգծում է, որ ստիպված է եղել լքել Հայաստանը, քանի որ եղել է ՀՀ նախագահի ընդդիմադիր թեկնածու Րաֆֆի Հովհաննիսյանի համակիրը եւ մասնակցել հետընտրական բողոքի ակցիաներին:

«Խնդրում եմ այսուհետ ապահովել իմ անվտանգությունը եւ օգնել միջազգային իրավունքների շրջանակներում երրորդ երկրում ստանալ ապաստան»: