Զրույց ԱԱԾ-ում. ինչո՞ւ է երաժիշտ Վահան Արծրունին հայտնվել ԱԱԾ տեսադաշտում

Երաժիշտ Վահան Արծրունին երեկ ՀՀ Ազգային անվտանգության ծառայություն է հրավիրվել, որտեղ ոմն Գրիգոր նրան հարցեր է տվել Հիմնադիր խորհրդարանի անդամների հետ կապերի, Խորենացի փողոցում ամռանն անցկացվող բողոքի ակցիաներին մասնակցության, ապրելու միջոցների, ընտանիքի մասին:

Արծրունին չի կարողացել պարզել, թե ինչ գործի շրջանակներում է հրավիրվել ԱԱԾ. նրան ասել են, որ «ուղղակի զրույց է»: Այս «ուղղակի զրույցից» հետո երգչի ֆեյսբուքյան էջն ընկերների համար արգելափակվել է: Այդ մասին նա հայտնեց մեզ հետ զրույցում.

- Երեկվանից իմ բոլոր գրառումները եւ հրապարակումներն արգելափակվել են: Ես գրում եմ, բայց իմ ընկերները չեն կարողանում էջս տեսնել: Իմ խոսքի ազատությունը սահմանափակվում է ֆեյսբուքյան էջը բլոկ անելով:

- Պարոն Արծրունի, փորձե՞լ եք պարզել որն է ձեզ ԱԱԾ հրավիրելու, ձեր էջն արգելափակելու պատճառը:

- Ոչ, ես ո՞նց կարող եմ պարզել, երեկվա իմ ԱԱԾ-ի հանդիպումից հետո այդպես է: Մեկը մյուսի հետ կապված է, ըստ երեւույթին: Առաջին հարցը, որ տվել եմ ԱԱԾ-ում, եղել է հետեւյալը. մեր հանդիպումն արդյո՞ք Սահմանադրության խախտում չէ: Պատասխանը եղել է հետեւյալը. սա ընդամենն ընկալեք որպես զրույցի հրավեր: Ես դա կարող եմ զրույցի հրավեր ընդունել լրագրողից, եւ ինձ պարզ կլինի այդ զրույցի բնույթը, բայց երբ ինձ հրավիրում են զրույցի եւ դա տեղի է ունենում ԱԱԾ-ում, սա սկսում է ինձ լուրջ անհանգստացնել:

- Ի՞նչն է անհանգստացնող:

- Իմ հիմնական անհանգստությունն անկախ ՀՀ քաղաքացու անհանգստություն է: Իմ քաղաքական իրավունքներից, խոսքի ազատությունից սկսած կոպիտ ոտնահարվում է, որովհետեւ իմ ֆեյսբուքյան էջն ինձ համար առնչվելու, իմ կարծիքը հանրայնացնելու առաջին միջոցն է, ես չգիտեմ սա ինչ ընթացք է, ինչի պետք է բերի: Ես այսօր Մարդու իրավունքների գրասենյակ եմ այցելելու, կփորձեմ պարզաբանումներ ստանալ:

- ԱԱԾ-ում Խորենացի փողոցում ամռանը տեղի ունեցած դեպքերի վերաբերյալ որեւէ  քրգործ չի քննվում: Դուք չկարողացա՞ք պարզել՝ ձեզ ինչ գործի շրջանակներում էին կանչել:

- Հանդիպման բնույթն ինձ համար անհասկանալի էր, որովհետեւ ինձ հրավիրել էին հեռախոսազանգով: Ծանուցագիր ոչ ոք ինձ չի ուղարկել: Փաստորեն ոչ պաշտոնական հանդիպում էր, բայց պաշտոնական վայրում:

- Ո՞ւմ հետ էր հանդիպումը:

- Ես ոչ պաշտոնը գիտեմ, ոչ կոչումը: Գիտեմ՝ Գրիգոր է անունը: Ես նրա հետ հանդիպել եմ ԱԱԾ-ում եւ ունեցել եմ 40 րոպեանոց զրույց, որի հիմնական հանգույցը այդ 3-4 հարցն էր. իմ կապը Հիմնադիր խորհրդարանի հետ, եղե՞լ եմ արդյոք ես Խորենացի փողոցում, իմ եկամուտները որտեղից են գոյանում, ապրում եմ այս հասցեում, ում հետ:

- Այդ պաշտոնյան գրառո՞ւմ էր ձեր խոսքերը, թե՞ ուղղակի լսում:

- Ես կարծում եմ, որ նման հաստատություններում եւ տեսանկարահանվում է եւ ձայնագրվում զրույցը: Չեմ կարծում, որ այդ չափի մասնավոր զրույց էր, որ չարձանագրվեր: Իմ ներկայությամբ որեւէ գրառում չի արվել, շատ սիրալիր, հարգալից զրույց էր: Այլ հարց է, որ դրա բնույթն անհասկանալի էր, որովհետեւ կողքից եթե դուք ներկա լինեիք՝ ձեզ կթվար, որ երկու հոգով շատ ընկերական զրուցում են քաղաքական թեմաներով:

- Չէի՞ք կարող հրաժարվել այդ հանդիպումից:

- Կարող էի հրաժարվել, բայց ինձ հետաքրքիր էր: Առաջին առանց ծանուցագրի հրավերը եղել է 25 տարի առաջ, երբ ես բժշկականի ուսանող էի, եւ ուսանողական «Ղարաբաղ» կոմիտեի նախաձեռնողներից: 25 տարի հետո ինձ նորից կանչում են այդ հաստատությունը եւ նորից անհեթեթ հարցեր են տալիս: Այն ժամանակ ինձ հարցնում էին ինչպիսին են իմ կապերն ազգայնական խմբերի հետ, որոնք քայքայում են սովետական պետության հիմքերը: Իսկ հիմա ինձ հարց են տալիս, թե ինչպիսին են իմ կապերը եւ կապերի բնույթը Հիմնադիր խորհրդարանի նախաձեռնողների հետ եւ արդյոք ես եղել եմ Խորենացի փողոցում վերջին իրադարձությունների ժամանակ:

- Պարոն Արծրունի, ներողություն այս հարցի համար. իրականում կապ ունե՞ք «Սասնա ծռերի» կամ Ժիրայր Սեֆիլյանի հետ:

- Ոչ եւ խորենացու փողոցում չեմ եղել վերջին իրադարձությունների ժամանակ: Անձնապես ծանոթ եմ գրեթե բոլորի հետ, որովհետեւ ե՛ւ բանակում եմ ծառայել, ե՛ւ 25 տարվա իմ երկրի պատմությունը ինձանից եւ ձեզանից անբաժան է: Ճանաչում եմ Դաշնակցության եւ «Ժառանգության» եւ ՀՀԿ-ի վերնախավին եւ զինվորականության մեջ անձնական հարաբերություններ ունեմ: Քաղաքականացնել այս ոլորտը ես որեւէ մեկին թույլ չեմ տա:

- Նկատի ունեմ բանտում եղած ժամանակ, վերջին շրջանում, նրանց հետ զրույց, խոսակցություն ունեցե՞լ եք:

- Ոչ, ամռանը Սեֆիլյանի ծննդյան օրվան նվիրված համերգ կար հրավիրված Թատերական հրապարակում, որին ես իմ մասնակցությունը բերել եմ: Բայց ես նույնկերպ իմ մասնակցությունը բերել եմ Աշոտ Նավասարդյանի հիշատակի համերգին, Լեոնիդ Ազգալդյանի ծննդյան օրվա առթիվ կազմակերպված համերգին եւ մեծ քանակությամբ այլ համերգների, որոնք առնչություն ունեն մեր կյանքի հետ: Դա եւս թույլ չեմ տա քաղաքականացնել: Համերգը՝ համերգ, քաղաքական հարթակը՝ քաղաքական հարթակ, քաղաքացիական իրավունքները՝ քաղաքացիական իրավունքներ:

Ընդգծենք, որ ԱԱԾ-ում Խորենացի փողոցում տեղի ունեցած դեպքերի վերաբերյալ որեւէ գործ չի քննվում, հետեւաբար այդ իմաստով անհասկանալի է Վահան Արծրունու մասնակցության վերաբերյալ հետաքրքրասիրությունը: Մենք փորձեցինք այդ կառույցից պարզել, թե ինչ գործով է զրույցի հրավիրվել Արծրունին: Պատասխան դեռեւս չունենք: