«Աշտարակ կաթի» նախկին տիրոջ ունեցվածքը գրավի տակ է. նոր տերը նախկինի պարտքի 30%-ը մարել է

Գործարարներ Վահրամ Միրաքյանն ու Հարություն Մնացականյանը «Աշտարակ կաթ» ընկերության Ճամբարակի մասնաճյուղում մնացած ռոքվոր պանրից արդեն շուրջ 3 տոննա վաճառել են: 

ԵՊՀ դասախոս Վահրամ Միրաքյանը մեզ հայտնեց, որ պահանջարկն ավելի մեծ է, ուղղակի այդքանն են հասցրել: Նա տեղեկացրեց, որ իրենց նախաձեռնությունը վարակիչ է դարձել, շատերն են իրենցից հետո Ճամբարակ գնացել, պանիր գնել: Ընդգծեց, որ նույնիսկ ՌԴ ուղարկողներ են եղել: Բացի այդ, «Նոր Զովք» սուպերմարկետների ցանցն է համաձայնել իր խանութներում Ճամբարակի ռոքվորը վաճառել:

Հիշեցնենք, որ «Աշտարակ կաթ» ընկերությունը սնանկանալուց հետո ընկերության Ճամբարակի մասնաճյուղի աշխատակիցների եւ կաթ մատակարարած գյուղացիների պարտքը որոշել էր փակել ռոքվոր պանրով: Ճամբարակցիները ստիպված որոշել էին 70 միլիոն պարտքի դիմաց վերցնել 40 տոննա պանիրը, բայց չգիտեին ինչպես իրացնել այն: Հարություն Մնացականյանը եւ Վահրամ Միրաքյանը «Ֆեյսբուք» սոցիալական ցանցում հայտարարեցին, որ կիլոգրամը 3000 դրամով պանիր են վաճառում: Համացանցում բազմաթիվ արձագանքողներ եղան:

Ճամբարակի քաղաքապետ Յուրա Ավալյանը մեր զրույցում ասաց, որ իր իմանալով Գյուղատնտեսության նախարարությունը եւս որոշել է աջակցել ճամբարակցիներին. «Ասել են, հնարավոր է, 8-10 տոննա էլ իրենց միջոցով իրացվի: Տեսնենք, կամաց-կամաց իրացվում է»,- ասաց Ավալյանը:

Քաղաքապետը տեղեկացրեց, որ պանիրը վաճառում են մատակարարները, որոնք գումարը ստանալուց հետո վճարում են իրենց աշխատակիցներին:

Ինչ վերաբերում է «Աշտարակ կաթ» ընկերությանը. ընկերությունը շարունակում է արտադրանք տալ, իսկ դրան զուգահեռ նախկին սեփականատեր Աշոտ Ափոյանի հետ բանակցություններ անցկացնել նրա սեփականությունը գնելու, գույքը գրավից հանելու մասին: Պարզվում է՝ գրավի տակ է նույնիսկ Ափոյանի սեփականությունը: Մեր հարցերին պատասխանել է «Աշտարակ կաթ» ընկերության առողջացման ծրագրի ղեկավար Արտակ Ավագյանը:

- Պարոն Ավագյան, ի՞նչ փուլում է գործարանի առքուվաճառքի գործընթացը:

- Գույքագրումն արվում է, հիմա հասել ենք բրենդի առքուվաճառքին:

- Նախկին սեփականատերը վաճառո՞ւմ է իր բրենդը:

- Բա, եթե «Աշտարակ կաթը» ամբողջովին գնում ենք, բրենդը չվերցնե՞նք: Եթե չեն վաճառում՝ մեր ինչի՞ն են պետք այս մաշված շենքերը, քանդուքարափ եղած մեքենաները, անիմաստ է:

- Անունը եւ բրենդը մնալո՞ւ են նույնը սեփականատիրոջ փոփոխությունից հետո:

- Ամեն ինչ մնալու է, ուղղակի հիմա շատ խառը ժամանակներ են՝ Ամանորով պայմանավորված:

- Արտադրանքի վաճառքի ծավալը չի նվազե՞լ, պահանջարկն ի՞նչ վիճակում է նոր սեփականատերերի պարագայում:

- Ոչ, ոչ, չի նվազել: Մենք շատ բարձր որակի ապրանք ենք արտադրում, որակի վերահսկողությունը շատ ուժեղ է, դրա պատճառով վաճառքն օր-օրի ավելանում է:

- Ինչպե՞ս է ընկերության անունը, որը Հայաստանում իրականացնելու է «Աշտարակ կաթի» արտադրությունը:

- Այդ ընկերության անունը կհրապարակենք առքուվաճառքի ժամանակ:

- Ընկերության նախկին աշխատավարձերի եւ գյուղացիների պարտքերի մարումը ո՞ր փուլում է:

- Գյուղացիների հետ շարունակվում են անհատական պայմանավորվածությունները՝ պարտքերի վերադարձի մասով: Մոտավորապես 25-30 տոկոս մարել ենք հին պարտքերը՝ պայմանով, որ կաթ մթերեն: Դա առաջին պայմանն է, որովհետեւ եթե կաթ չմթերեն՝ մենք չենք կարողանա աշխատել: Ովքեր համաձայնվել են մթերում ենք, պարտքը տալիս, ովքեր չեն համաձայնվել, կամաց-կամաց համաձայնվում են, որովհետեւ, կոպիտ ասած, այլ տարբերակ չկա: Ասում ենք, որ կարճ ժամանակահատվածում կփակենք պարտքը:

Իսկ հին աշխատողների աշխատավարձերի մասով սպասում ենք առքուվաճառքին, դա կախված է նրանից, թե ինչ պայմաններով կլինի առքուվաճառքը, քանի որ գրավադրված է ոչ միայն «Աշտարակ կաթի» գույքը, այլեւ նախկին սեփականատիրոջ ամբողջ ունեցվածքն է գրավի տակ: Այսինքն՝ աշխատակիցների պարտքերի մարումը պայմանավորված է նրանով, թե առքուվաճառքի ժամանակ ինչը գրավից կազատվի, ինչը կգնա իր տնօրինության տակ, ինչը կմնա մեզ:

Հիշեցնենք, որ կուտակված պարտքերի պատճառով «Աշտարակ կաթ» ընկերությունը դադարեցրեց գործունեությունը: Ավելի ուշ հայտնվեց գնորդ՝ ամերիկյան «Ադրա Ռեմար» ընկերությունը, որն էլ ներկայումս իրականացնում է առողջացման ծրագիր եւ, ըստ պայմանավորվածության՝ փակում ընկերության նախկին ղեկավարության պարտքերը: