Մանկաբարձ-գինեկոլոգներին թեստավորելու համար նախարարությունը մասնագետներ կգործուղի

ՀՀ առողջապահության նախարար Լեւոն Ալթունյանի հրամանով իրավական ուժ է ստացել տարեվերջյան ասուլիսում նրա հայտարարություններից մեկը: Նախարարն ասել էր, որ արդեն ընթացիկ տարում հանրապետության բոլոր մանկաբարձ-գինեկոլոգները թեստավորում են անցնելու ՀՀ գլխավոր մանկաբարձ-գինեկոլոգ Ռազմիկ Աբրահամյանի մոտ:

Որոշման առիթը դեկտեմբերի 25-ին Կապանում ծննդկանի ու նրա երեխայի մահվան փաստն էր: «Սյունիքի մարզի ցավալի դեպքից հետո հրահանգեցինք գլխավոր մասնագետին` կիսամյակի ընթացքում հարցազրույցներ, թրեյնինգներ եւ ատեստավորումներ անցկացնել երկրում գործող բոլոր մանկաբարձ-գինեկոլոգների հետ: Այդ մասին նաեւ նախարարի համապատասխան հրաման կլինի: 900-ից ավելի մասնագետ անցնելու են թեստավորում, որից հետո գլխավոր մասնագետը իր անձնական երաշխիքը կտա նրանց աշխատանքի համար: Ցավոք սրտի, այսօր նախարարությունը լծակներ չունի կանխելու այն մասնագետների գործունեությունը, որոնք չեն անցնի թեստավորումը, բայց համապատասխան փոփոխությունների փաթեթ եւս նախարարությունում մշակվում է, որպեսզի նախարարությունը հնարավորություն ունենա կասեցնել ոչ պատշաճ բժշկական ծառայություն մատուցող բժիշկների գործունեության լիցենզիան»,- ասել էր Լեւոն Ալթունյանը:

Բայց չնայած նախարարը խոսում էր միայն Ռազմիկ Աբրահամյանի մասին, երեկ գերատեսչության լրատվական ծառայությունից պատասխանեցին, որ սխալ տպավորություն է ստեղծվել, թե գլխավոր մանկաբարձ-գինեկոլոգը նշված գործընթացում աշխատելու է միայնակ եւ ընդունելու է միանձնյա որոշումներ: Ի դեպ, բժիշկների համապատասխան խմբի շրջանում կարծիքներ կան, թե առողջապահության գերատեսչության այս նորամուծությունը կոռուպցիոն ռիսկեր է պարունակում եւ որ իրենց բավարար է լինելու ընդամենը ունենալ որոշակի գումար` թեստավորումը հաջողությամբ հաղթահարելու համար: Այս նորությունը մասնագետների շրջանում նաեւ միանշանակ չի ընդունվում այն առումով, որ նրանք զուգահեռներ են անցկացնում դրա ու բուժաշխատողների արդեն իսկ մեկնարկած հավաստագրման գործընթացի միջեւ:

Հիշեցնենք, որ դա սկսվել է 2016 թվականից: Եվ արդեն 5 տարի անց այն բուժաշխատողները, որոնք չեն կարողանա հավաստագիր ստանալ, կզրկվեն մասնագիտությամբ աշխատելու իրավունքից: Ասել կուզի` այսպես թե այնպես բժիշկների (ոչ միայն մանակաբարձ-գինեկոլոգների) գիտելիքների մակարդակը գտնվում է ոլորտի պատասխանատուների ուշադրության կենտրոնում: Համենայնդեպս, այդպես ներկայացվում է:

Առողջապահության նախարարությունում, սակայն, վերոնշյալ երկու պնդման հետ էլ համաձայն չեն: Այսինքն` թե՛ նոր ձեռնարկի մեջ կոռուպցիոն ռիսկ չեն տեսնում, եւ թե՛ չեն նույնացնում նշված երկու գործընթացները` ընդգծելով, որ մի դեպքում կարեւորվում են տեսական գիտելիքները, մյուսում` գործնական: 

Մանկաբարձ-գինեկոլոգների գիտելիքների ստուգման նպատակով նախարարության մասնագետներն իրենք են այցելելու տվյալ բժշկական կենտրոններ: «Եթե գնում են այնտեղ, հարցազրույց են անցկացնում մի քանի հոգով, բուժաշխատողների գիտելիքներն են ուզում ճշտել, պարզել հմտությունները, ի՞նչ կոռուպցիոն ռիսկ կա: Մասնագետների այս խմբում չի լինելու միայն գլխավոր մասնագետը: Նաեւ ընդգրկվելու են մանկաբարձ-գինեկոլոգների ասոցիացիայի այլ անդամներ: Ես չեմ տեսնում կոռուպցիոն ռիսկեր: Մենք ունենք մեր նախարարի հանձնարարականը, որ պիտի կատարենք, եւ քանի որ դա մասնագիտական դաշտի խնդիր է, հանձնարարվել է գլխավոր մասնագետին: Եթե պետք է, մեր ենթակառուցվածքի այլ ծառայություններից նույնպես կընդգրկվեն մարդիկ»,- ասաց առողջապահության նախարարության մոր եւ մանկան առողջության պահպանման վարչության պետ Կարինե Սարիբեկյանը:

Նախարարի հրամանի համաձայն, ոչ միայն բուժաշխատողների գիտելիքներն ու հմտություններն են գնահատվելու: Մասնավորապես գնահատվելու է նաեւ, թե այս կամ այն բուժհաստատությունը պատրաստվածության ինչպիսի մակարդակ ունի անհետաձգելի բժշկական օգնություն ցուցաբերելու համար, արյան եւ արյան փոխարինիչներով ապահովվածությունն ինչպիսին է, կադրային խնդիրներ կան, թե չէ:

«Առանձին հարցաթերթիկներ ենք ուղարկել բժշկական հաստատություններ, որպեսզի հասկանանք դրանց հզորությունները»,- տեղեկացրեց Կարինե Սարիբեկյանը:

Առողջապահության նախարարի հրամանի համաձայն, որը ստորագրվել է 2016 թվականի դեկտեմբերի 30-ին, գործընթացը կմեկնարկի սույն թվականի հունվարի կեսից եւ կավարտվի մինչեւ հուլիս: Գնահատումը կսկսվի երեւանյան բժշկական կենտրոններից: Վերջին հերթում Լոռու մարզում գործող հաստատություններն են:

Հ.Գ. 1.- Նախորդ 2016 թվականի ընթացքում Հայաստանում գրանցվել է մայրական մահացության 11 դեպք:

Հ.Գ. 2- Առողջապահության նախարարի հրամանի մի հատվածը վերաբերում է հղիության վերջին շաբաթներին կանանց ծննդատներին մոտեցնելուն: «ՀՀ մարզպետարանների առողջապահության եւ սոցիալական ապահովության վարչությունների պետերին. հատուկ ուշադրություն դարձնել ծննդօգնության հաստատություններից տարածքային առումով դժվար հասանելի վայրերում բնակվող հղիների ծննդալուծման կազմակերպչական հարցերին, մասնավորապես` հաշվի առնելով ձմռան եղանակային փոփոխություններով պայմանավորված ճանապարհների մատչելիության խնդիրը, 37 եւ ավելի շաբաթական ժամկետով հղիներին առաջարկել մինչեւ ծննդաբերական գործունեության սկսվելը, պլանային ընթացակարգով տեղափոխվել ծննդատանն առավել մոտ եւ հասանելի բնակավայր: Հղիների տեղափոխման սույն գործընթացը, ըստ անհրաժեշտության, կազմակերպել տեղական ինքնակառավարման մարմինների ներգրավմամբ եւ աջակցությամբ»,- կարդում ենք փաստաթղթում: Թե ինչպես կարող է դա կազմակերպվել, առայժմ անհայտ է: