Դերասան Հրաչ Հակոբյանը պատգամավոր դառնալուց հետո ուշադրությունը կուղղի մշակույթին

«Խաչվող հետքեր», «Հատուկ բաժին» սերիալներից, «Կորած-մոլորածը Հայաստանում» գեղարվեստական ֆիլմից եւ այլ նախագծերից հայտնի դերասան Հրաչ Հակոբյանը կարծում է, որ մշակույթի ոլորտում լուրջ բարեփոխումների կարիք կա: Ըստ նրա՝ դա Հայաստանի Հանրապետության Ազգային ժողովի գործն է, եւ ցանկանում է պատգամավոր դառնալ այդ հարցում իր ներդրումն ունենալու համար: Այդ նպատակով խորհրդարանական ընտրություններին մասնակցելու է «Ելք» դաշինքից: Armtimes.com-ի հետ զրույցում դերասանը նշեց, որ հատկապես կարեւոր է ուշադրություն դարձնել թատրոնների ֆինանսավորմանը, հեռուստատեսության բովանդակության որակի բարձրացմանը եւ երեխաներին մշակութային կրթություն տալու հարցին:

«Թատրոններ կան, որտեղ աշխատում են հրավիրյալ դերասաններ: Նրանք 1 ներկայացումից ստանում եմ 2-3 հազար դրամ, իսկ 1 փորձից՝ 500 դրամ աշխատավարձ: Եթե այդ թատրոնն արտասահման գնա հյուրախաղերի եւ արտասահմանցի գործընկերների հետ զրույցի մեջ մեր դերասաններն ասեն, որ իրենք 1 օրվա համար վարձատրվում են 1 դոլարով, ի՞նչ կարծիք կկազմեն արտասահմանի թատրոնները մեր երկրի մշակույթի մասին: Չեմ կարծում, որ Հայաստանում այսքան շատ պետական թատրոններ ունենալու կարիք կա: Թող լինեն պետական քիչ թատրոններ, մյուսները թող լինեն մասնավոր եւ հովանավորվեն որեւէ խոշոր հարկատուի կողմից»,- ասաց նա:

Դերասանը նշեց, որ թեպետ վարձատրության առումով ավելի բարենպաստ է հեռուստատեսությունը, սակայն այդտեղ էլ որակ չկա: Հեռուստատեսային նախագծերի մեծամասնությունը, նրա կարծիքով, սխալ արժեքներ ու սխալ հերոսներ է առաջարկում հասարակությանը եւ, հատկապես երեխաներին:

«Ժարգոնը, որ հնչում է հեռուստաէկրաններից, կերպարները, որ երեւում են.... ֆեյսբուքով խոսում են հայի գենից, իսկ հեռուստատեսությամբ ցույց են տալիս ծուռ վզով, «լխտիկ փորով» դեմքի: Մեր մանուկներին, որոնք խաղում են «սպայդրմենով» կամ «սուպերմենով»՝ հպարտ կեցվածքով ամերիկյան հերոսների խաղալիքներով, առաջարկում են ծուռ վզով ինչ-որ երեւույթների: Չէ՞ որ դուք եք կրթում հասարակությանը, ոչ թե հակառակը: 1 տարի դիմացեք, լավ պրոդուկտ մատուցեք, կտեսնեք՝ հասարակությունն ինչպես կսկսի հրաժարվել վատից: Բայց նրանց ձեռք չի տալիս, որովհետեւ իրենց պետք են բթացած, հեռուստասերիալի հերոսի դարդով ապրող, հարեւանի աղքատությունը չնկատող մարդիկ»,- ասում է նա: 

Դերասանն ընդգծում է, որ կարեւոր է երեխաների մշակութային գիտելիքներ տալ մանուկ հասակից՝ առաջին դասարանից: Նա ընդգծում է, որ այդ հարցով զբաղվելը ոչ միայն ծնողների, այլեւ դպրոցի գործն է: Մանկավարժները պետք է հոգան, որ երեխաները վաղ հասակից այցելեն մշակութային կենտրոններ, սովորեն եւ վերլուծեն այն, ինչ այդտեղ տեսնում են:

«Կրթությունն ու մշակույթը պետք է միավորել: Չի կարելի թողնել, որ երեխան դպրոցն ավարտի առանց մշակութային կրթություն ստանալու, եւ դպրոցն ավարտելուց հետո պահանջել, որ նա գնա օպերա կամ թատրոն, կամ գնա լավ ֆիլմ նայի, կամ էլ ասեն՝ ինչու գիրք չի կարդում: Պետք է դպրոցական տարիքից մշակութային կրթություն տալ, պետք է գնան թանգարանում դաս անեն, պետք է գնան օպերա ու հետո դասարանում քննարկեն... պետք է միքսել մշակույթն ու կրթությունը»,- ասաց նա:

Ինչ վերաբերվում է դերասանական աշխատանքին, ապա քաղաքականությամբ զբաղվելու նպատակը չի նշանակում, որ Հրաչ Հակոբյանը հրաժարվում է դրանից: Պարզապես, հաշվի առնելով նրա՝ քաղաքացիական ակտիվ գործունեությամբ զբաղվելու փաստը՝ հեռուստաընկերությունները նրան չեն ընդգրկում նախագծերում: Երկար տարիներ աշխատել է Խամաճիկների թատրոնում, Պետական կամերային երաժշտական թատրոնում, հանդես է եկել հեռուստանախագծերում, սակայն հիմա առաջարկներ հազվադեպ է ստանում: