Մերոնք լավ էլ պատժում են. Արշակ Զաքարյանը՝ հակառակորդի զոհերի մասին

«Շանթ» հեռուստաընկերությամբ հեռարձակվող «Դիրքերում» հաղորդաշարի հեղինակ, կինոռեժիսոր Արշակ Զաքարյանը ֆեյսբուքյան  իր էջում սահմանային իրավիճակի վերաբերյալ գրառում է կատարել՝ ակնարկելով, որ ադրբեջանական կողմը զոհեր է տալիս:

- Պարոն Զաքարյան, ադրբեջանական կայքերը հայտնում են մեկ զոհի մասին: Ձեր գրառումից հասկացվում է, որ այդ թիվն ավելի մեծ է:

- Իրենց հաղորդագրություններին, որ նայենք՝ ամբողջ պատերազմի ժամանակ զոհ չեն տվել երեւի: Ես իրենց հաղորդագրության վրա չեմ հիմնվում:

- Ունե՞ք տեղեկություններ զոհերի թվի մասին:

- Կարճ ասած՝ մերոնք լավ էլ պատժում են: Դրանից ավելի չեմ կարող ասել, ոչ էլ թիվ ասելու իրավունք ունեմ: Գիտեմ, որ մեկ հոգի չէ:

- Այսօր կա՞ զգալի լարվածություն հայ-ադրբեջանական սահմանին:

- Ամեն օր էլ ինչ-որ մի բան ձեռնարկում են, լարվածություն միշտ էլ կա: Տեսնում ենք, որ տենդենց կա նաեւ շատացնելու հրադադարի խախտումները:

- Դուք ամեն շաբաթ դիրքերում լինում եք, հնարավոր է՝ տիրապետում եք նաեւ հակառակորդի շարժերի վերաբերյալ խոսակցություններին: Ըստ ձեզ, լարվածությունն առաջիկայում մինչեւ ինչքա՞ն կաճի:

- Դա նույնիսկ ռազմագետները չեն կարող ասել, որովհետեւ ռազմական իրավիճակն այնպիսի բան է, որ կարող է ամեն վայրկյան փոխվել: Ես կարող եմ հիմա ասել շատ հանգիստ է, ուղիղ մեկ րոպե հետո կարող են հարձակվել: Եթե լինեն մարդիկ, որ կանխատեսեն էլ, դա ասում են հենց էնպես՝ ասելու համար: Ապրիլին ո՞վ էր սպասում, որ պիտի պատերազմ լինի: Փաստ է, որ միջադեպերը գնալով շատացնում են, զինատեսակի փոփոխությունները տեսնում եք. արդեն Դ-44 են օգտագործում, ականանետ են օգտագործում, աճ տեսնում եք դեպի վատը: Այդ աճը տեսնում էինք նաեւ մինչեւ ապրիլյան պատերազմը՝ նռնականետեր, հետո ականանետեր, հետո ավելի խոշոր ականանետեր: Հետո եկավ մի ժամանակ, տեսանք, որ պատերազմ է սկսվել:

Նշենք, որ իրավիճակի վերաբերյալ այսօր ֆեյսբուքում գրառմամբ էր հանդես եկել նաեւ ԼՂ ՊԲ մամուլի խոսնակ Սենոր Հասրաթյանը:

«Այսօր ադրբեջանական ագիտպրոպը հանդես է եկել հերթական ապատեղեկատվությամբ, համաձայն որի, իբր հայկական կողմը ձեռնարկել է դիվերսիոն ներթափանցման փորձ, իսկ իրենց ուժերը ժամանակին կանխել են դա: Ի դեպ այդ հորինվածքին «միս ու արյուն» տալու համար Բաքվի աճպարարներն, իրենց սովորության համաձայն, որոշել են, որպես «անհերքելի ապացույց» կից ներկայացնել բավականին անճաշակ ու ոչ պրոֆեսիոնալ մակարդակով «բեմադրված» մի տեսագրություն (ինչը վերջին շրջանում կատարում են շատ հաճախ), որն, անգամ մանրակրկիտ ուսումնասիրելուց, դժվար թե դիտողը որևէ բան հասկանա... Ինչևէ, ինչպես ասում են՝ ճաշակին ընկեր չկա, բայց որ այս ամենով հանդերձ, կարծես թե՝ Ադրբեջանի ՊՆ-ն վերջնականապես կորցնում է (եթե, իհարկե, արդեն չի կորցրել) իրականությունը սթափ գնահատելու ընդունակությունը, փաստ է... Եվ վերջում մի հավելում. ըստ Ադրբեջանի ՊՆ-ի կողմից փետրվարի 12-ին տարածված պաշտոնական հաղորդագրության «թշնամու կողմից առաջնային դիրքերի գնդակոծությունը կանխելու ընթացքում տեղի ունեցած փոխհրաձգության ժամանակ զոհվել է Ադրբեջանի ԶՈՒ պայմանագրային զինծառայող, կրտսեր սերժանտ Ֆուադ Ֆարհադ օղլու Գաֆարովը»: Այսքանից արվելիք հետևությունները թողնում ենք ձեզ...»:

Այսօր ավելի վաղ ԼՂ ՊԲ-ն հաղորդել էր, որ փետրվարի 12-ին և լույս 13-ի գիշերը արցախա-ադրբեջանական հակամարտ զորքերի շփման գծում արձանագրվել է լարվածության աճ: Հակառակորդը Դ-44 տիպի հրանոթներից, ականանետերից, նռնականետերից ու տարբեր տրամաչափի հրաձգային զինատեսակներից հրադադարի պահպանման ռեժիմը խախտել է շուրջ 80 անգամ, որի ընթացքում, հայ դիրքապահների ուղղությամբ արձակել է ավելի քան 950 կրակոց: Ադրբեջանական զինուժը արևելյան ուղղությամբ կիրառել է Դ-44 տիպի հրանոթներ՝ արձակելով 13 արկ, իսկ հյուսիսային և հարավային ուղղություններով՝ 60 և 82 միլիմետրանոց ականանետեր ու նռնականետեր՝ ընդհանուր առմամբ արձակելով 49 արկ, որից 41-ը ականանետերից, 8-ը՝ նռնականետերից: