Կարեն Կարապետյանը ՀՀԿ-ի անունը չտվեց, փոխարենը փղի անեկդոտը պատմեց (տեսանյութ)

Երեւանի Նոր Նորք վարչական շրջանում Հանրապետական կուսակցության ներկայացուցիչները վարչապետ Կարեն Կարապետյանի գլխավորությամբ նախընտրական քարոզչություն իրականացրեցին:

Վարչական շրջանի աշխատակազմի շենքի (թաղապետարանի) բակը մարդաշատ էր: Բազմաթիվ երեխաներ Հանրապետական կուսակցության դրոշակներով, «ՀՀԿ» գրառումներով հագուստներ հագած, կանգնել էին թաղապետարանի դիմաց եւ սպասում էին կառավարության ղեկավարին: Վարչապետի ժամանելուց առաջ Գայի պողոտայից դեպի թաղապետարան տանող ճանապարհը փակվել էր, որեւէ վարորդ չէր կարող իր մեքենայով հայտնվել թաղապետարանի դիմաց: Նախատեսված ժամին Արդարադատության նախարար Արփինե Հովհաննիսյանը Նոր Նորքի թաղապետ Արմեն Ուլիխանյանի հետ միասին դիմավորեցին Կարեն Կարապետյանին: Դահլիճային այս հանդիպման առաջին ելույթը սկսեց Արփինե Հովհաննիսյանը, որը խոսեց իր ոլորտին առնչվող փոփոխություններից՝ անդրադառնալով արդարադատության խորհրդին: Հովհաննիսյանի ելույթի ընթացում ուշացումով դահլիճ մտավ Երեւանի քաղաքապետ Տարոն Մարգարյանը եւ առաջին շարքում նստեց Կարեն Կարապետյանի, թաղապետ Արմեն Ուլիխանյանի, նրա եղբոր՝ Ղուկաս Ուլիխանյանի կողքին, որը ՀՀԿ ռեյտինգային ցուցակով պատգամավորի թեկնածու է թիվ 1 ընտրատարածքում: Այս ընտրատարածքն իր մեջ ներառում է Երեւանի Ավան, Քանաքեռ-Զեյթուն, Նոր Նորք եւ Կոտայքի մարզի Ջրվեժ համայնքները:

Երեւանի քաղաքապետն իր ելույթը նվիրեց ՀՀԿ-ի՝ անվտանգության ու առաջընթացի թեզին: Նրա խոսքով՝ ընտրողները պետք է իրենց ձայնը տան այն քաղաքական ուժին, որը լսել է նրանց դարդ ու ցավը: «Մենք մեր երազած երկրում բոլորս ապրելու ենք, մենք անվտանգ երկրում ապրելու ենք եւ ապրում ենք, մենք այդ ամենը պետք է ունենանք շարունակական: Այդ շարունակականության համար մեր հասարակության ակտիվությունն է անհրաժեշտ, մեր հասարակության մասնակցությունն է անհրաժեշտ եւ մեր հասարակության ճիշտ կողմնորոշումն է անհրաժեշտ»,- ասաց Տարոն Մարգարյանն ու իր ելութում չտվեց Հանրապետական կուսակցության անունը: «Ես համոզված եմ, որ Նոր Նորքի բնակիչներն իրենց վստահությունը տալու են այն քաղաքական ուժին, ով պատրաստ է այս խնդիրները լուծելու եւ պատրաստ է իր ժողովրդի հետ միասին կառուցելու իր մեծ տունը՝ մեր Հայաստանի Հանրապետությունը: Բոլորս դեպի ընտրությունների եւ տանք մեր քվեն այն ուժին, ով կարող է դա ապահովել մեզ համար»,- իր ելույթն այսպես եզրափակեց Երեւանի քաղաքապետը:

Վարչապետ Կարեն Կարապետյանը նախապես շնորհակալություն հայտնեց հավաքվածներին եւ առաջարկեց արագ անցնել հարցուպատասխանի ձեւաչափին, քանի որ նախընտրական ծրագիրը ծավալուն է: Կարեն Կարապետյանն էլ իր հերթին ամեն կերպ խուսափեց ՀՀԿ-ի անունը տալուց, նա նույնիսկ որեւէ բառ չասաց թիվ 1 ընտրատարածքում առաջադրված թեկնածուներից Ղուկաս Ուլիխանյանի մասին, որն առաջին շարքում նստած՝ հետեւում էր վարչապետի ելույթին:

Կարեն Կարապետյանին հարցեր ուղղեցին հիմնականում կառավարության գործունեության վերաբերյալ: ՀՀԿ-ի ծրագրի մասին հարց չհնչեց: Տնտեսության զարգացման, ներդրումների վերաբերյալ հարցին ի պատասխան էլ Կարեն Կարապետյանը պատմեց հայտնի փղի անեկդոտը, որն իր խոսքով՝ երրորդ անգամ է պատմում: «Մեկը փիղ է վաճառում եւ ասում է՝ փիղն անգլերեն գիտի, երեք լեզու գիտի, հայաթը կարտոֆիլ է բեջարում, տունը պիլիսոս է անում, էս ա անում, էն ա անում: Վերջը էս մեկն առնում է էդ մի միլիոն դոլարանոց փիղը: Որոշ ժամանակ անց գնորդը հանդիպում է վաճառողին եւ ասում ա՝ լսի, փիղդ ոչ լեզուներ գիտի, ոչ կարտոֆիլի հետ գիտի ինչ անի, ոչ էլ տունն ա հավաք-չավաք անում, եթե մի գնորդ գտնես, 500 հազարով կարողանամ վաճառել, ես ուրախ կլինեմ: Լսի, ասում է՝ եղբայր, դու տենց տրամադրությամբ էդ փիղդ չես վաճառի»,- իր սիրելի անեկդոտը պատմեց Կարեն Կարապետյանը: Դահլիճում հավաքվածները սկսեցին բուռն ծիծաղել եւ ծափահարել վարչապետին:

Առավել մանրամասն՝ տեսանյութում: