Սամվել Բաբայանն առայժմ չի ասում, որ ձերբակալվել է քաղաքական գործունեության պատճառով

Սամվել Բաբայանը «Իգլա» զինատեսակի ներկրման հետ առնչություն չունի: Մեզ հետ զրույցում ասաց Բաբայանի փաստաբան Ավետիք Քալաշյանը: Վերջինս ԱԱԾ մեկուսարանում հանդիպել է Ս. Բաբայանի հետ: Նա մեզ փոխանցեց նաեւ, որ վերջինս իրեն «նորմալ» է զգում:

Հիշեցնենք, որ երեկ Ազգային անվտանգության ծառայությունը ձերբակալել էր Ս.Բաբայանին: ԱԱԾ-ն երեկ նախ հաղորդագրություն էր տարածել, թե «2017թ. մարտին ՀՀ քաղաքացիների կողմից Վրաստանից մաքսանենգ եղանակով Հայաստան «Իգլա» համալիր տեղափոխելու մասին նախնական տեղեկություններ են ստացել եւ քրեական գործ են հարուցել: Իսկ ձերբակալությունից հետո էլ հայտարարություն էր տարածել, թե «կատարված քննչական գործողությունների եւ օպերատիվ-հետախուզական միջոցառումների արդյունքում ստացվել են նաեւ արժանահավատ տվյալներ, որ նշված համալիրի բաղկացուցիչ մասերի ձեռքբերումը եւ փոխադրումն իրականացրած երկու անձինք գործել են Ս. Բաբայանի հետ ունեցած նախնական համաձայնությամբ եւ նրա պատվերով»: Ս. Բաբայանն այժմ գտնվում է ԱԱԾ մեկուսարանում, նրան դեռ մեղադրանք չի առաջադրվել:

- Պարոն Քալաշյան, ե՞րբ եք հանդիպել Ս. Բաբայանին, իրեն ինչպե՞ս է զգում:

- Երբ պետք է լինում, հանդիպում եմ: Նորմալ է զգում:

- ԱԱԾ-ում ձեզ մեղադրանքի կասկածանքների վերաբերյալ ինչ-որ ապացույցներ, գաղտնալսումներ ներկայացրե՞լ են:

- Առայժմ որեւէ բան չեմ կարող ասել նախաքննության գաղտնիությունից ելնելով:

- Իմացա՞ք ովքեր են այն երկու անձինք, որոնք, ԱԱԾ-ի ներկայացմամբ «Իգլան» տեղափոխելիս՝ ղեկավարվել են Ս. Բաբայանի ցուցումներով:

 -Չգիտեմ ովքեր են առայժմ, բայց պարոն Բաբայանը նրանց չի ճանաչում եւ նրանց հետ որեւէ առնչություն չունի:

- Իսկ պարոն Բաբայանը ձեզ հետ զրույցում ինչպե՞ս է որակում իր ձերբակալությունը:

- Անհիմն կասկածներ, ավելին՝ ոչինչ: Որեւէ որակավորում տալու հիմքերը դեռեւս բավարար չեն: Իսկ ես ինչ ասում եմ, ասում եմ նաեւ իր կողմից:

- Նա, օրինակ, ձեզ չի՞ ասել, որ իր ձերբակալությունն իր քաղաքական գործունեության պատճառով է, որ իր վրա գործ են սարքում:

- Նման կարծիք առայժմ չի հայտնել:

- Հիմա դուք ի՞նչ եք պատրաստվում անել, կոնկրետ ի՞նչ գործընթացի մեջ եք:

- Այդ հարցին էլ չեմ կարող պատասխանել:

- Իսկ ե՞րբ են մեղադրանքը ներկայացնելու:

-Վաղը կամ մյուս օրը, 72 ժամվա ընթացքում:

- Հնարավո՞ր է օրվա վեջում նորություն ունենաք:

- Դժվար թե, որովհետեւ նման պայմանավորվածություն չկա վարույթն իրականացնող մարմնի հետ:

- Ձեզ ինչ-որ նյութեր, ապացույցներ ներկայացրե՞լ են, որոնց հիման վրա Ս. Բաբայանին կասկածում են:

- Ավելի տեղեկություն չեմ կարող հայտնել: Դա չի բխում նաեւ իմ պաշտպանյալի շահերից: Կարող եմ ասել, որ ինձ ցույց են տվել այն, ինչ այս պահին օրենքով հասնում է՝ ձերբակալման արձանագրությունն ու քրեական գործի հարուցման որոշումը: