Էս ընտրակարգն ո՞վ է ընդունել, Գալուստ Սահակյա՞նը.նախարարի ներկայությամբ քաղաքացին զայրացավ

ՀՀ ազգային ժողովի ընտրությունների օրը Երեւանի Կենտրոն վարչական շրջանում գտնվող թիվ 9/35 ընտրական տեղամասում ժամը 15-ից հետո իրավիճակը շատ ավելի հանգիստ էր, քան առավոտից մինչ այդ:

Մինչեւ օրվա երկրորդ կեսը ընտրական տեղամասում պարբերաբար առաջանում էին մարդկանց կուտակումներ. հայտնվում էին միեւնույն դեմքերը` ընտրողների նորանոր խմբերի հետ, որոնց ուղեկցում էին քվեարկության: Բերվածների գործողությունները տեղի էին ունենում թաղային հեղինակությունների ուշադիր ու խիստ հայացքների ներքո: Հաճախ էլ ակնհայտ էր դառնում այն արհամարհական վերաբերմունքը, որը նրանք ունեին քվերարկելու բերած ընտրողների նկատմամբ: Ի դեպ, ակամա լսեցինք «վերակացուներից» մի քանիսի զրույցը: «Պիտի «տեսնե՞նք» դրանց, թե՞ «տեսել» եք»,- մեկը մյուսին հարցնում էին նրանք` քվեարկելու մտած ընտրողների մասին խոսելով:

Քաղաքացիներին տեղափոխող ավտոմեքենաներից մեկը, որը մեզ հաջողվեց լուսանկարել, 35DM 361 պետհամարանիշն ուներ:

Կեսօրից առաջ նշված ընտրատեղամասում քվեարկելու եկավ ՀՀ արդարադատության նախարար Արփինե Հովհաննիսյանը: Այդ րոպեներին տեղամասում էր նաեւ մի քաղաքացի, որը դժգոհություն էր հայտնում մատնահետքը պահանջող օպերատորին: «Ո՞վ է ընդունել էդ օրենքը: Գալուստ Սահակյա՞նը»,- զայրացած հակադարձում էր նա ընտրակարգը բացատրել փորձողներին: «Դատարկագլուխները երկիր են ղեկավարում»,- չէր հանդարտվում քաղաքացին: Նախարարը նրան որեւէ կերպ չարձագանքեց, միայն հանձնաժողովի անդամներին հորդորել էր. «Ընտրական օրենսգիրքը» ցույց տվեք:

Իսկ լրագրողներն Արփինե Հովհաննիսյանին մասնավորապես հարցրին, թե կարո՞ղ է պնդել, որ Հայաստանի հանրապետական կուսակցությունը, ի դեպ, որի ներկայացուցիչն է ինքը, ընտրակաշառք չի բաժանում: Նախարարը նման հայտարարություն չարեց: Փոխարենը հավաստիացրեց, որ ընտրակաշառքի ազդեցությունը հասցված է զրոյի: Իսկ դրանից առաջ ու հետո ընտրողները տեղափոխվում էին ընտրական տեղամաս` ակնհայտորեն ոչ հենց այնպես:

Երբ անընդհատ ընտրական տեղամասում ելումուտ անող տղամարդկանցից մեկին հարցրինք, թե ով է ինքը, որ օրվա մեծ մասն այդտեղ է անցկացնում, քիչ անց ներկայացավ «Եվրասիական ինտեգրացիա» կազմակերպության դիտորդի վկայականով: Հանձնաժողովի քարտուղարը նրան մի քանի րոպեով գրանցեց, իսկ մեզ հրաժարվեց հայտնել անուն-ազգանունը:

Արդեն երեկոյան, երբ ընտրական տեղամասը պետք է փակվեր ու հաշվարկվեին ձայները, ընտրողների խմբերին ցերեկը քվեարկության բերած երիտասարդներից մեկը տեղամաս եկավ դարձյալ «Եվրասիական ինտեգրացիա» կազմակերպության դիտորդի կարգավիճակով: Իսկ ձայների հաշվարկի ընթացքում նրան շատ էր մտահոգում հանրապետական կուսակցության ստացած քվեների քանակը: Ավելի ուշ նշված կազմակերպության դիտորդների` կենտրոնական ընտրական հանձնաժողովի կայքում հրապարակված անվանացանկում այդ դիտորդի վրա փակցված անուն-ազգանունը` Լեւոն Մկրտչյան, մենք չգտանք:

Պետք է նկատել, որ քվեատուփից դուրս եկող քվեների բաշխվածությունը նույնպես գալիս էր հուշելու, որ միառժամանակ տեղի է ունեցել ուղղորդված ու կազմակերպված ընտրություն: Քվետուփի վերեւի կեսից դուրս եկող քվեաթերթիկների մեծ մասը «Ելք», ապա «Ծառուկյան» դաշինքների օգտին էին, իսկ Հանրապետականը զգալի ետ էր մնում: Բայց արդեն մյուս կեսից, որտեղ քվեաթերթիկների մեծ մասը փաստորեն մինչեւ ժամը 15-ը քվեարկության եկած կամ ավելի ճիշտ տեղափոխված ընտրողներինն էին, Հանրապետական կուսակցության ստացած ձայները շատացան: Այնքան, որ անհանգստացած ու տագնապի նշաններ ցույց տվող ՀՀԿ կողմնակիցները սկսեցին հանգիստ շունչ քաշել:

Ի վերջո Հանրապետականը տվյալ տեղամասում գրավեց առաջին տեղը` 311 քվեով, «Ծառուկյան» դաշինքը` 235 քվեով` երկրորդ տեղը, իսկ «Ելք» դաշինքը ստացավ 223 ձայն` զբաղեցնելով երրորդ տեղը:  

Ընտրատեղամասում նկատելիորեն մեծ թվով ներկայացուցիչներ ուներ Հանրապետական կուսակցությունը` հանձնաժողովի անդամների, վստահված անձերի ու իրականում իր շահերը ներկայացնող դիտորդների տեսքով: Այդուհանդերձ, տեղամասերում ընտրական գործընթացի էական խախտումներ չգրանցվեցին, թեպետ երբեմն փորձ էր արվում քվեարկողներին տեսողական խնդիրների պատրվակով օգնելու համար նրանց հետ քվեախուց մտնել: