Տարոն Մարգարյանը մնացել է Ավանի թաղապետ. նա նորոգում է հիմնականում Ավանի վերելակները

Երեւանի գործող քաղաքապետ Տարոն Մարգարյանը այդ պաշտոնը զբաղեցնում է 2011 թվականից: Դրանից առաջ` 2003-2009 թվականներին նա Ավանի թաղապետն էր, ապա Երեւանի փոխքաղաքապետը:

Ասում են, որ նա լավ թաղապետ է եղել, Ավանին «լավ է նայել»: Բայց նա արդեն 6 տարի Երեւանի քաղաքապետն է, եւ տեսնենք, թե այդ պաշտոնում նա արդյոք Երեւանին է՞լ է «լավ նայում» հավասարապես: Չի՞ դնում արդյոք խտրականություն Երեւանի տարբեր համայնքների միջեւ: Դրա համար ուսումնասիրենք, օրինակ, վերելակների կապիտալ նորոգման վրա կատարված ծախսերը ըստ համայքների: ՀՀ ազգային վիճակագրական ծառայությունը ամեն տարի հրապարակում է այդ տվյալները: Ինչպես տեսնում ենք, ամենաշատ վերելակները Մալաթիա-Սեբաստիայում են` 493 հատ, երկրորդը Աջափնյակն է` 308 հատ, ապա Նոր Նորքը` 303 հատ եւ այլն: Ավանը վերելակների թվով վեցերորդն է` 211 հատ:

Հիշենք այս թիվը եւ անցնենք առաջ: Երկրորդ գծապատկերում ներկայացված են նույն ԱՎԾ-ի հրապարակած պաշտոնական տվյալները վերելակների կապիտալ նորոգման վրա 2011-2015 թվականների ընթացքում պետական եւ համայնքային բյուջեներից իրականացված ծախսերի վերաբերյալ: Ինչպես տեսնում ենք, ծախսերի «կլանման» տեսանկյունից Ավանը առաջինն է: Նշված 5 տարիների ընթացքում պետական եւ համայնքային բյուջեներից Ավանի վերելակների կապիտալ նորոգման վրա ծախսվել է 131.2 միլիոն դրամ: Երկրորդ տեղում գտնվող Աջափնյակի վերելակների նորոգմանը ուղղվել է ավելի քան երկու անգամ պակաս գումար:

Բայց որպեսզի հաշվարկը համադրելի լինի, պետք է յուրաքանչյուր համայնքի վերելակների վրա կատարված ընդհանուր ծախսը բաժանել վերելակների թվի վրա, եւ այդ դեպքում միայն պարզ կդառնա, թե որքանով են ծախսերը հավասարակշռված ըստ համայնքների: Այդ պարզ թվաբանական գործողության արդյունքները ներկայացված են երրորդ գծապատկերում: Ուսումնասիրելով այս գծապատկերը, հանգում ենք տխուր, շատ տխուր եզրակացության: Ավանի մեկ վերելակի հաշվով պետական եւ համայնքային բյուջեներից 2011-2015 թվականների ընթացքում հատկացվել է 620 հազար դրամ: Դա 3.3 անգամ ավելի շատ է, քան, ասենք Աջափնյակի ցուցանիշը: Իսկ ամենաշատ վերելակներ ունեցող համայնքի` Մալաթիա- Սեբաստիայի յուրաքանչյուր վերելակի համար հատկացված գումարը կազմել է ընդամենը 26.3 հազար դրամ, ինչը 23.5 անգամ քիչ է, քան Ավանի ցուցանիշը: Էլ չենք խոսում Շենգավիթի մասին, որտեղ յուրաքանչյուր վերելակի հաշվարկով ծախսված գումարը  1400 դրամ է, Նոր Նորքում` 231 դրամ...:

Ի՞նչ է սա նշանակում: Ավանի թաղապետից հետո դառնալով Երեւանի քաղաքապետ, Տարոն Մարգարյանը շարունակել է մնալ Ավանի թաղապետ: Նա եւ նրա թիմը խորապես անտարբեր են մյուս համայնքների խնդիրներին եւ իրենց ունեցած ֆինանսական եւ ադմինիստրատիվ ռեսուրսը ծախսել են հիմնականում Ավանի վրա:

Եթե իրերը կոչենք իրենց անունով, ապա սա գավառամտության դրսեւորում է: Այսպես վարվում են միջնադարյան աշխարհայացքով իրենց երկիրը կառավարող առաջնորդները, օրինակ, Միջին Ասիայում, Հնդկաչինում եւ այլուր: Նրանք իրենց ծննդավայրը վեր են ածում ուխտատեղիի, երեխաներին ավտոբուսներով տանում այնտեղ, պատմում մեծ առաջնորդի մանկության մասին...: Դե բարեբախտաբար Հայաստանում առայժմ այդպես չէ, բայց կարծես դեպքերը զարգանում են հենց այդ ուղղությամբ: Համենայնդեպս մայրաքաղաքի ռեսուրսները քաղաքապետի թաղի վրա ծախսելը  այդպիսի նախանշաններ է պարունակում: Եթե շարունակվի այդ տրամաբանությամբ, ապա շուտով պետք է լինի քաղաքապետի անվան փողոց, դպրոց, մի 200 հատ կիսանդրի եւ այդ ամենը՝ Ավանում: Բայց սիրուն չի, չէ՞, Տարոն: