ԵԽԽՎ-ն կարմիր քարտ ցույց տվեց խավիարային դիվանագիտությանը. Երեւանում ոգեւորված են

ԵԽԽՎ-ում ՀՀ պատվիրակության անդամ Սամվել Ֆարմանյանի տեղեկացմամբ՝ մայիս ամսին Պրագայում տեղի կունենա ԵԽԽՎ մշտապես գործող մարմինների նիստ: Զուգահեռաբար կարող է տեղի ունենալ նաեւ ԵԽԽՎ-ում ԵԺԿ խմբակցության արտահերթ նիստը, որտեղ կքննարկվեն այդ կառույցի ղեկավար Պեդրո Ագրամունդի շուրջ ստեղծված իրավիճակից դուրս գալու հարցերը:

Հիշեցնենք, որ ռուսական պատվիրակության հետ Սիրիա կատարած այցի պատճառով ԵԽԽՎ խմբակցություններն անցած շաբաթ լիագումար նիստերի ընթացքում անվստահություն են հայտնել նրան: Ս.Ֆարմանյանի փոխանցմամբ՝ այդ այցն ընդամենը պատրվակ էր դրա համար: Ընդհանուր առմամբ ԵԽԽՎ-ն արդեն չէր հանդուրժում Պ.Ագրամունդին պարբերաբար կոռուպցիոն սկանդալների ու պատմությունների մեջ հայտնվելու պատճառով: Իսկ մինչև հունիսյան նստաշրջանը նրա հրաժարականին հասնելու համար, Ս.Ֆարմանյանի խոսքերով, երկու ճանապարհ կա: «Առաջինն այնն է, որ Պ. Ագրամունդն ի վերջո կհասկանա ստեղծված իրավիճակի նրբությունը և սեփական կամքով կներկայացնի իր հրաժարականը: Եվ երկրորդը՝ եթե նա շարունակի համառել, շրջանառության մեջ է դրվել ԵԽԽՎ կանոնակարգը փոփոխության ենթարկելու նախագիծ, որի ընդունման դեպքում արդեն դե-յուրե իմպիչմենտի գործընթաց կսկսվի»,- փոխանցեց Ֆարմանյանը:

Ներկայացնում ենք Սամվել Ֆարմանյանի հետ մեր զրույցն ամբողջությամբ:

- Պարոն Ֆարմանյան, Պ.Ագրամունդը հրաժարվո՞ւմ է հրաժարական տալու իր խոստումից: Չէ՞ որ նա ասել էր, մայիսի 29-ին հրաժարական կտա: Բացի այդ, ԵԽԽՎ բյուրոն նրան անվստահություն էր հայտնել:

- Երկուշաբթի առավոտյան ԵԺԿ խմբակցության նիստում եւ զուգահեռ ընթացող մյուս քաղաքական խմբերի նիստերում քննարկման առարկա է դարձել նրա վարքագիծը, եւ ակնհայտ դարձել, որ նա կորցրել է վստահությունը: Ու բոլորի կողմից նրան փոխանցվել է ուղերձ, որ ստեղծված իրավիճակում պետք է հրաժարական տա: Բայց նիստի ժամանակ նա 10 րոպե ընդմիջում է հայտարարում ու այլեւս դահլիճ չի վերադառնում: Այդ ժամանակ նա քաղաքական խմբերին ներկայացրել էր խնդրանք, թե քանի որ Վեհաժողովի օրակարգում հինգշաբթի օրը նախատեսված էր Իսպանիայի թագավոր Ֆիլիպ 6-րդի ելույթը, իրեն տրվի հնարավորություն, որ մինչև հինգշաբթի հրաժարական չներկայացնի, եւ ինքն էլ հայտարարեց, որ իր քաղաքական ապագայի վերաբերյալ հայտարարություն կանի: Բայց նա չպահելով իր խոսքը՝ խաբեց Վեհաժողովին, ուրբաթ օրը չներկայացավ եւ հրաժարական չտվեց:

- Իսկ ըստ ԵԽԽՎ կանոնակարգի՝ հրաժարականի դեպքում ո՞վ է լինելու ԵԽԽՎ հաջորդ նախագահը:

- Մինչև տարեվերջ ԵԽԽՎ նախագահի պաշտոնը պատկանում է ԵԺԿ խմբակցությանը, եւ Պ.Ագրամունդի դե-յուրե հեռացման կամ քաղաքական հրաժարականի դեպքում խմբակցությունը կներկայացնի իր թեկնածուին:

- Հայաստանն ունի՞  ԵԺԿ-ի ներսում լոբինգ անելու, հնարավորինս չեզոք թեկնածու առաջադրելու հնարավորություններ, որ հաջորդն էլ չհամագործակցի Ադրբեջանի հետ եւ հակահայկական գործընթացներ չծավալի:

- Նախ ես ուզում եմ պարզ լինի, որ Ագրամունդի՝ Սիրիա կատարած այցը թեեւ վերջին կաթիլն է եղել, որը քաղաքականության ընկալման եվրոպական տեսանկյունից բոլոր պատվիրակություններին լեգիտիմ հնարավորություն է տվել դնելու նրա հեռացման հարցը, բայց հիմնական պատճառը չէ: Պատճառը նրա կողմից հատվածական կամ անձնական խնդիրներ լուծելու համար ԵԽԽՎ նախագահի պաշտոնի օգտագործումն է: Խոսքը կոռուպցիոն սկանդալների մասին է: Այսօր ամբողջ Եվրոպայում ԵԽԽՎ-ում առկա քաղաքական կոռուպցիայի մասին է խոսվում, որը հեղինակազրկում է մի կողմից այդ կառույցը, մյուս կողմից՝ այն քաղաքական ուժը, որը ներկայացնում է Պ.Ագրամունդը:

Եվ բոլորը պետք է հասկանան, որ Միլանի դատախազության կողմից Լուկա Վոլոնտեի նկատմամբ քրեական հետապնդում սկսելը դեռ ԵԽԽՎ պատգամավորներին առնչվող կոռուպցիոն երեւույթների հետաքննության ծաղիկն է: Ես չեմ կարծում, որ ադրբեջանական խավիարային դիվանագիտության ազդեցության տակ միայն նա է եղել: Սա այդ դիվանագիտությանը ցույց տված կարմիր քարտ է: Եվ ես վստահ եմ, որ Մինսկի խմբում Արցախի հակամարտության շուրջ ընթացող բանակցություններին զուգահեռ Ադրբեջանի կողմից հարցի քննարկումն այլ ատյաններ տեղափոխելու փորձերն ապագայում դառնալու են եթե ոչ անհնար, ապա չափազանց դժվար: Եվ ՀՀ դիվանագիտության խնդիրն է լինելու օգտագործել այս հանգամանքն ու միջազգային հանրության մեջ այդ երկրին ներկայացնելու որպես արժեքները ոտնահարողի: ՀՀ արտաքին քաղաքական առումով սա ես համարում եմ չափազանց կարեւոր ձեռքբերում: Իսկ եթե ասում ենք Պ.Ագրամունդ, պետք է նաեւ նկատի ունենանք իր ընկերներին:

- Շա՞տ են եղել այդ ընկերները:

- Կոնկրետ թվաքանակ ոչ մեկը չի կարող ասել, բայց վստահաբար նա միայնակ չի գործել: Իմ տեղեկություններով՝ Ագրամունդը Ստրասբուրգում իր «ընկերների կորպորացիայի» գաղտնի հավաք է կազմակերպել, որտեղ որոշում է կայացվել, որ այդ ցանցի անդամները խզեն իրենց բոլոր կապերն Ադրբեջանի հետ: Ասեմ նաեւ, որ ԵԽԽՎ-ի որոշմամբ ստեղծվելու է անկախ եւ մեծ հեղինակություն ունեցող երեք անհատներից բաղկացած հետաքննող միջազգային հանձնաժողով, որը քննության առարկա պետք է դարձնի վերջին շրջանում ԵԽԽՎ նախկին եւ ներկա պատգամավորների շուրջ պտտվող կոռուպցիոն սկանդալների թեման: Սա իր հերթին որպես դամոկլյան սուր կախված է լինելու Ադրբեջանի ձախողված քաղաքական նախաձեռնությունների գլխին:

- Իսկ չափազանցվա՞ծ չէ ադրբեջանական խավիարային դիվանագիտության կամ դրան հայկական կողմի դիմադրության ազդեցությունը Պ.Ագրամունդի հրաժարականի կամ ԵԽԽՎ-ում սկսված այդ գործընթացների վրա: Չէ՞ որ Ագրամունդի շուրջ կատարվող այս զարգացումները սկսվեցին ռուսական պատվիրակության հետ նրա Սիրիա կատարած այցի պատճառով:

- Այդ հարցի պատասխանը ստանալու համար պատասխանեք հետևյալ հարցին՝ եթե ԵԽԽՎ-ն քաղաքական կոռուպցիոն սկանդալները հետաքննող մեխանիզմ է ստեղծում, ապա կարո՞ղ եք ցույց տալ որեւէ այլ երկիր, որի գործողությունները ԵԽԽՎ-ում նման խոսակցությունների տեղիք են տվել: Եթե ցույց տաք նման երկրորդ երկիրը, ես կասեմ, որ չափազանցություն է: