Կարեն Կարապետյանը կանաչ լույս է վառում օլիգարխների համար. գյուղատնտեսական հողերը կվաճառեն

Կառավարության կողմից Ազգային Ժողովի քնարկմանն է ուղարկվել «Հողային օրենսգրքում» եւ կից փաթեթով օրենսդրական փոփոխություների մի նախագիծ, որն ընդունվել է կառավարության մայիսի 18-ի նիստում: Հիմնական փոփոխությունը նախատեսված է Հողային օրենսգրքում:

Նախագծով նախատեսվում է, որ ՀՀ քաղաքացիությունը կորցրած անձը զրկվում է գյուղատնտեսական նշանակություն ունեցող իր հողամասի նկատմամբ սեփականության իրավունքից: Կառավարությունում գտել են, որ «երբ սեփականատերը սահմանված ժամկետում գույքը չի օտարում, նման գույքը` դրա բնույթի և նշանակության հաշվառմամբ, պետական կամ տեղական ինքնակառավարման մարմնի դիմումի հիման վրա կայացված դատարանի վճռով, վաճառվում է հարկադիր կարգով և ստացված գումարը հանձնվում է նախկին սեփականատիրոջը կամ վերածվում է պետական կամ համայնքային սեփականության, իսկ նախկին սեփականատիրոջը հատուցվում է գույքի արժեքը»:

Պարզ ասած, եթե ՀՀ քաղաքացիությունից հրաժարված անձը չի վաճառում իր գյուղատնտեսական նշանակության հողամասը, ապա այն հարկադիր վաճառքի է հանվում: Օրինակ, գյուղապետարանը դիմում է դատարան ու հարկադիր վաճառքի է հանում, ստացած գումարը փոխանցում է արդեն նախկին սեփականատիրոջը: Կարող է նաեւ այդ գույքը դառնա համայնքային սեփականության եւ նախկին սեփականատիրոջը հատուցվի դրա գինը:

Օրենսդրական նախաձեռնության ընդունումը արդարադատության նախարարությունում պայմանավորել են Սահամանդրության կենսագործունեությամբ: Նախագծի հիմնավորումներում նշվում, որ 2015 թվականին սահմանադրական փոփոխություններով հողի սեփականության իրավունքից չեն օգտվում օտարերկրյա քաղաքացիները եւ քաղաքացիություն չունեցող անձինք, բացառությամբ օրենքով սահմանված դեպքերի:

Հանրապետական կուսակցության 2017 թվականի նախընտրական ծրագրի ախտորոշում բաժնում հանդիպում ենք հետեւյալ ձեւակերպմանը. «չօգտագործվող գյուղատնտեսական նշանակության հողերի առկայություն»: Կառավարության 2017 թվականի գերակա խնդիրների ցանկից էլ տեղեկանում ենք, որ չօգտագործվող գյուղատնտեսական նշանակության հողերի առկա (փաստացի) վիճակի վերաբերյալ տեղեկատվական շտեմարան պետք է ստեղծվի դեկտմբեր ամսի 3-րդ տասնօրյակում:

Քանի որ ԱԺ-ում Հանրապետականը մեծամասնություն ունի, այս օրենսդրական փաթեթն անխոչընդոտ կընդունի եւ ըստ էության 2017 թվականի վերջին կառավարությունն արդեն կունեն գյուղատնտեսական չօգտագործվող հողերի ողջ բազան, որին կհաջորդի հարկադիր վաճառքի գործընթացը:

Իրավաբանները իհարկե կհնչեցնեն իրենց կարծիքը սեփականության իրավունքից զրկելու գործընթացի մասին, բայց մի բան ակնհայտ է, որ եթե քաղաքացին որոշել է արտագաղթել, հրաժարվել ՀՀ քաղաքացիույունից, ապա այս օրենսդրական նախաձեռնությունը դժվար թե խոչընդոտի նրա որոշումը իրականացնելու գործընթացին: Արտագաղթողը չի նայի երկու կամ երեք հեկտար հողատարածքը կարոցնելուն, եթե օտար երկրում կեցության ավելի լավ առաջարկ ունենա եւ եթե կարողանար մշակել այդ հողակտորը, եկամուտ ստանար, ապա դժվար թե արտագաղթեր:

Գյուղատնտեսական նշանակության հողատարծքներն այսօր լավագույնս մշակում են Հայաստանի օլիգարխները: Նախկին վարչապետ, դոլարային միլիոնատեր Հովիկ Աբրահամյանն, օրինակ, պոմիդոր աճեցնելով է հարստացել, երբ գյուղացիները վարկերի պատճառով զրկվում էին իրենց տներից եւ այլ ունեցվածքից: Նախկին վարչապետներից Տիգրան Սարգսյանի անվան հետ է կապվում Հայաստանի ջերմոցային տնտեսություններից մեկը: Վերահսկիչ Պալատի նախկին նախագահ, այժմ ԱԺ պատգամավոր Իշխան Զաքարյանը նույնպես այգեգործության ոլորտում հաջողությունների է հասել եւ ասպես շարունակ:

Ենթադրենք, 2018 թվականին համատարած վաճառքի հանվեցին քաղաքացիությունը կարոցրած գյուղացիների հողերը, ովքե՞ր պետք է դրանք գնեն, եթե ոչ օլիգարխները, եթե ոչ արտոնություններից օգտվողները: Ստացվում է, որ Կարեն Կարապետյանի ղեկավարած կառավարությունը կանաչ լույս է վառում օլիգարխների համար՝ տնտեսությունն ակտիվացնելու «ազնիվ նպատակով»: