Արթիկի շենքի տեխնիկական եզրակացությունը բացասական է. այն երեկ կրկին փլուզվել է

Արթիկ քաղաքի Սասունցի Դավիթ փողոցի 13 բնակելի շենքը ունի 3-րդ աստիճանի վթարայնություն: Բազմաբնակարան շենքի տեխնիկական վիճակը գնահատվել է անբավարար: Այս մասին պարզ է դարձել շենքի տեխնիկական վիճակի եզրակացությունը պատրաստ լինելուց հետո: Այս տեղեկատվությունը armtimes.com-ին փոխանցեցին ԱԻՆ «Սեյսմիկ պաշտպանության հյուսիսային ծառայություն» ՊՈԱԿ-ից:

Մասնագետների խոսքով՝ 1986 թվականին կառուցված շենքը մի շարք թերություններ ունի: Մասնավորապես՝ կառուցապատման ժամանակ օգտագործվել է որակազրկված ցեմենտի շաղաղ, այսինքն՝ ցեմենտի քանակությունը քիչ է եղել:

Հիշեցնենք, որ Արթիկ քաղաքի Սասունցի Դավիթ փողոցի 13 բնակելի շենքը փլուզվել էր հունիսի 22-ին՝ ժամը 23:55-ին: Շենքի արեւմտյան մասի ստորին հատվածում տեղի է ունեցել քարաթափում՝ 4 քմ մակերեսով:  Բնակելի շենքի արտաքին հատվածում առկա են մինչեւ 2 սմ հաստությամբ եւ մոտ 13 մ երկարությամբ ճաքեր. առկա է շինության փլուզման վտանգ։ 

Հունիսի 28-ին կրկին քարաթափում է տեղի ունեցել: Այժմ շենքում բնակվում է ընդամենը երկու ընտանիք: Տարհանված մյուս բնակիչները մեկ շաբաթ է ինչ ապրում են հարեւան-բարեկամների տանը: Շիրակի մարզպետարանը նրանց համար բնակարաններ է վարձելու: Բնակարանները գտնելու են բնակիչները՝ այն մակերեսով, որքան իրենց բնակարանին է:

Արթիկի քաղաքապետ Մխիթար Վարագյանը armtimes.com-ին փոխանցեց, որ յուրաքանչյուր ընտանիքի հատկացվելու է 15 հազար դրամ: Շենքի բնակիչներն էլ հակադարձում են, որ վերոնշյալ պահանջի սահմաններում Արթիկում բնակարան վարձակալել հնարավոր չէ: Քաղաքում գները սկսվում են 20-25 հազար դրամից:

Շիրակի մարզպետ Արթուր Խաչատրյանն, թեեւ Շանթ հ/ը-ի հետ զրույցում տեղեկացրել էր, որ մարզպետարանը պարտավորվում է վարձակալված բնակարանների համար վճարել այնքան ժամանակ, մինչեւ վերջնական կլուծվի Ս. Դավիթ փողոցի 13 շենքի խնդիրը: Առայժմ լուծման տարբերակներ չեն առաջարկվում: