«Ազատության» նկարահանող խմբի վրա հարձակված երիտասարդը բաժնում է. մանրամասներ դեպքից

Այսօր Սեւանում «Ազատություն» ռադիոկայանի նկարահանող խմբի վրա հարձակված երիտասարդը ոստիկանության Սեւանի բաժնում է:

Այս մասին մեզ տեղեկացրեց ռադիոկայանի լրագրող Նարինե Ղալեչյանը, որի աշխատանքն այսօր խոչընդոտվել է:

Հիշեցնենք, որ այսօր Սեւանում հարձակման է ենթարկվել «Ազատություն» ռադիոկայանի նկարահանող խումբը: Ռադիոկայանի լրագրող Նարինե Ղալեչյանը ֆեյսբուքյան իր էջում գրառում էր կատարել՝ նշելով. «Շարժական լցակայաններն էինք նկարում, հանկարծ ներսից մեկը հարձակվեց վրաս, սկսեցի վազել, նստեցի մեքենան: Նա ոտքով հարվածեց մեքենային»: Կից նաեւ հրապարակել էր հարձակման ենթարկված ավտոմեքենայի լուսանկարները:

Լրագրողը մեր զրույցում ներկայացրեց հարձակման դեպքի մանրամասները.

- Նարինե, նախ կնկարագրե՞ք, թե ինչպես տեղի ունեցավ դեպքը:

- Առավոտյան ժամը 11:00-ի սահմաններում Սեւանում փորձում էի նկարահանել շարժական գազալցակայանները. հսկայական գազի բալոնները արեւի տակ տեղադրված են՝ հաշվի չառնելով ամառվա շոգը: Փորձում էի  նկարահանել եւ հասկանալ, թե որքանով են դրանք անօրինական, որքանով են դրանք անվտանգ մասնավորապես հարակից շենքերի բնակիչների համար, որովհետեւ ընդամենը մի քանի քայլ այն կողմ շենքեր են, դպրոց եւ այլն: Առաջին կետում, որը դեռ ընտրությունների ժամանակ աչքովս ընկել էր, նկարահանեցի, այդտեղ իհարկե մոտեցան, փորձեցին մեզ համոզել, որ չնկահարանենք, համապատասխան փաստաթղթերը մեզ ցույց կտան: Մենք 30-40 րոպե սպասեցինք, սակայն այդպես էլ փաստաթղթեր չբերեցին: Ես հիշեցի, որ քաղաքի սկզբնամասում էլ կա շրջիկ գազալցակայան. գնացի, փորձեցի էնտեղ տեսանկահարանումներ կատարել: Մեքենայից իջա տեսախցիկս միացրած, որպեսզի հեռվից ընդհանուր պլան նկարեմ, հետո նոր մոտենամ, սկսեմ խոսել, նախ ներկայանամ եւ այլն: Իջնելուց հետո, մի սեւազգեստ երիտասարդ՝ մոտավորապես 25 տարեկան, դուրս եկավ այդտեղից, սկսեց քայլել դեպի ինձ, ես քայլեցի իրեն ընդառաջ, որ բարեւեմ, բացատրեմ՝ ով եմ, ինչու եմ եկել: Երբ մի քիչ մոտեցա, նկատեցի, որ այդ տղայի աչքերը կլորացել էին, ծնոտն առաջ էր բերել, քայլվածքը ավելի ագրեսիվ էր, եւ գնալով սկսում էր քայլերն արագացնել: Հասկանալով, որ իսկապես նա կարող է վտանգավոր լինել, ես փորձեցի մի քանի քայլ հետ գնալ, երբ որ ես հետ գնացի, նա նույն ձեւով գալիս էր դեպի ինձ, մի քիչ արագացրի քայլերս, ինքն ավելի արագացրեց, ես հասկացա, որ անհնար է իր հետ կոնտակտի մեջ մտնելը, անգամ բացատրելը՝ ով եմ եւ ինչ եմ ուզում, արագ նստեցի մեքենան  եւ դուռը փակեցի: Մեքենա նստելու ընթացքում նկատեցի, որ այդ երիտասարդը վազում է, տեսախցիկիս թաքցրի եւ գոռացի, որ չմոտենա, այլապես կզանգահարեմ ոստիկանություն: Սակայն նա սկսեց կատաղած հարձակվել մեքենայի վրա,  հասցրի դուռը փակել, բռնեց մեքենայի բռնակը եւ սկսեց թափահարել, հետո տեսավ, որ դուռը փակ է, թեքվեց, սկսեց վարորդի կողմից հարվածել, բռունցքներով, ոտքով սկսեց հարվածել մեքենային, առանց որեւէ բառ ասելու: Երբ մեքենան շրջադարձ արեց, որպեսզի գնա այն ճանապարհով, որով եկել էր, նա առանց վախի կանգնեց մեքենայի առջեւ եւ սկսեց կրկին հարվածել մեքենային: Երբ նկատեց, որ մեքենան իսկապես արագություն է բացում, նոր թեքվեց, հեռացավ, այդ ընթացքում ես հասցրի նկարահանել իրեն, որովհետեւ մինչ այդ  սպառնալիք զգալով, ես թաքցրել էի տեսախցիկս, որպեսզի գույքս չվնասվի:

- Ե՞րբ եք ներկայացրել հաղորդում ոստիկանություն:

- Դեպքից հետո ես արդեն եղա Սեւանի ոստիկանապետի մոտ: Ոստիկանությունից ինձ խոստացան, որ պատշաճ ընթացք կտրվի: Բացատարություն գրեցի: Մի քանի րոպե հետո բաժին բերվեց նաեւ այդ երիտասարդը: Հենց ոստիկանապետի սենյակում ես նրանից հետաքրքվեցի, թե ի՞նչ էր պատահել, ինչո՞ւ էր արդպես հարձակվել ինձ վրա, ի պատասխան՝ նա ասաց՝ ես գոռում էի եւ այլն, իսկ դու չէիր պատասխանում, սկսեց ոտքի վրա ստեր հորինել, ես ասացի, որ չեմ պատրաստվում իր հետ կոնտակտի գնալ, ոնց որ կարգն է այդպես էլ կանենք՝ բացատրություն, ցուցմունք եւ այլն: Հիմա, ըստ ոստիկանների, այդ երիտասարդը շենքում է, մենք նույնպես այստեղ ենք փաստաբանի հետ:

- Հարձակման ենթարկված մեքենան «Ազատություն» ռադիոկայանի՞ն է պատկանում:

- Ոչ, մեքենան տաքսի ծառայությանն է, որի հետ աշխատում ենք: Կատարվել է մեքենայի զննություն, որպեսզի մասնագետը որոշի վնասի չափը, իսկ մեքենան բավականին վնասված է:

- Նարինե, այսինքն՝ այդ երիտասարդը հերքո՞ւմ էր, որ հարձակվել է մեքենայի վրա, խոչընդոտել ձեր աշխատանքը:

- Փորձում էր ինչ-որ բաներ հորինել, թե ինքը գոռացել է, բայց ինքը ընդհանրապես կոնտակտի դուրս չի եկել:

- Դուք տեղեկություններ ունե՞ք, թե այդ շարժական գազալացակայաններն ում են պատկանում:

- Ամբողջ խնդիրը հենց դա էր, որ ես փորձում էի հասկանալ, թե դրանք ում են պատկանում, բայց իմ աշխատանքը խոչընդոտվեց: Ինֆորմացիա ունեմ, բայց դեռ չեմ ցանկանում հրապարակել, որովհետեւ դրանք դեռ հստակ չեն:

-Ըստ ձեզ, ի՞նչ պատճառով էր այդ երիտասարդը նման արգեսիվ պահվածք դրսեւորում:

-Ըստ իս, պատճառն այն էր, որ ես նկարահանում էի իրենց տարածքը, ես այդպես էլ չհասկացա՝ նա աշխատակի՞ց էր, սեփականատիրոջ բարեկա՞մ էր, այդպես էլ չիմացա, թե նա ով էր:

-Տարածքում ոստիկաններ կայի՞ն:

-Ոչ, չկար: Բնակելի տարածք էր: Ես նաեւ խնդրել եմ, եթե այդ տարածքում տեսախցիկներ կան, անպայման դրանք առգրավեն, որպեսզի նա ինքնապաշտպանվելիս ստեր չհորինի:

-Ձեր կատարած տեսանկարահանումները պահպանվե՞լ են:

-Շատ փոքր հատված պահպանվել է:        

Նշենք, որ սույն դեպքի առթիվ ոստիկանության Սեւանի բաժնում հետաքննություն է կատարվում: