Միշան Մանկական Եվրատեսիլում հաղթելու դեպքում նվեր է ուզում, որ Արցախում խաղաղություն լինի

9-ամյա Միշան «Մանկական Եվրատեսիլ 2017»-ում հաղթելու դեպքում հատուկ նվեր է ուզում: Մեծ ցանկություն ունի, որ Լեռնային Ղարաբաղի Հանրապետությունում խաղաղություն լինի: Այս մասին նա ասաց այսօր՝ նոյեմբերի 15-ին, մամուլի ասուլիսի ժամանակ:

«Ես ուզում եմ, որ Ղարաբաղում միշտ խաղաղություն լինի, ուրիշ ոչ մի բան չեմ ուզում»,- ասաց նա:

«Փոքրիկ ղարաբաղցին» երգով հայտնի 9-ամյա Միշան, որը հանդես է գալիս «Արցախի ձայներ» խմբում, վաղուց է եղել Հանրային հեռուստաընկերության ուշադրության կենտրոնում: «Եվրատեսիլի» հայաստանյան պատվիրակության ղեկավար Գոհար Գասպարյանը նշեց, որ Հանրայինում անհամբերությամբ սպասում էին, երբ է 9 տարեկան դառնալու, որ կարողանան նրան ուղարկել մրցույթին: Այժմ ստացել է հնարավորությունը եւ շատ ոգեւորված է:

«Ուզում եմ բարություն նետել, ու որ ամեն մեկը նետի իր բարությունը, ու մենք հաղթենք բարությամբ»,- ասաց Միշան:

Իր պրոդյուսերի՝ Լիրա Քոչարյանի հորդորով լսել ու սովորել է բոլոր մյուս մասնակիցների երգերը: Այդպես, ըստ պրոդյուսերի, ավելի լավ կհասկանա, թե մյուսներն ինչ ուժեղ ու թույլ կողմեր ունեն: Միշան ամենից շատ հավանել է Ավստրալիայի ներկայացուցչի կատարումը, սակայն որպես իրեն մրցակից այլ երկրների անուններ է տալիս:

«Մրցակից եմ համարում Վրաստանին, Ռուսաստանին, Բելառուսին, Լեհաստանին»,- ասաց նա:

Մրցույթում Միշան ներկայանալու է «Բումերանգ» երգով: Խոստովանում է, որ ստեղծագործությունն այնքան էլ չի համապատասխանել իր սպասելիքներին, սակայն փորձերի ընթացքում սկսել է սիրել այն: Խոսքերի հեղինակներն են Ավետ Բարսեղյանը, Դավիթ Ծերունյանը, Արթուր Աղեկյանը: Երաժշտությունը գրել է Վահրամ Պետրոսյանը: Վահրամ Պետրոսյանն էր հեղինակել նաեւ Վլադիմիր Արզումանյանի երգը, որով նա հաղթեց 2010 թ. «Մանկական եվրատեսիլում», եւ այն ժամանակն էլ ՀՀ ներկայացուցչի պրոդյուսերը Լիրա Քոչարյանն էր: Վերջինս այս մրցույթում մեծ փորձ ունի: Հաղթել է նաեւ 2012 թ. Ուկրաինայի ներկայացուչի հետ: Հույս ունի, որ այս անգամ էլ հաղթանակով կվերադառնան:

«Տրամադրված ենք հաղթանակի: Հայաստանը վերջին մի քանի տարիներին ծեծում է հաղթանակի դուռը: Բեթին, Միկան, անցած տարվա դուետը... բոլորն էլ կարող էին հաղթել, մի փոքր չէր բավականացնում: Գուցե այս տարի այդ դուռը բացողը լինի Միշան: Մենք պատրաստ ենք: Եթե այսօր ասեն, որ 2 ժամից պետք է «Եվրատեսիլի» բեմ բարձրանա եւ երգի, Միշան պատրաստ է»,- ասաց նա՝ խոստանալով, որ կներկայանան հետաքրքիր համարով:

«Մանկական Եվրատեսիլ 2017»-ը տեղի կունենա Վրաստանում՝ Թբիլիսիում, նոյեմբերի 26-ին: Հայաստանյան պատվիրակությունը Լիրա Քոչարյանի գլխավորությամբ կմեկնի նոյեմբերի 19-ին: Նրանց, բացի Հանրային հեռուստաընկերության անձնակազմից, կուղեկցեն նաեւ Միշայի ծնողները եւ «Արցախի ձայներ» խմբի անդամներ: Գոհար Գասպարյանը չի մեկնի: նա հեռուստատեսությամբ կմեկնաբանի մրցույթը:

Այս տարի փոփոխություն է եղել «Մանկական եվրատեսիլի» կանոններում: Հաջորդ հյուրընկալողը կլինի ոչ թե հաղթողի հայրենիքը, այլ նախօրոք ընտրված երկիրը: Որոշվել է, որ հաջորդ տարի մրցույթը կկայանա Բելառուսում: Բացի այդ՝ այս անգամ յուրաքանչյուր երկիր կկարողանա ձայն տալ իր մասնակցի օգտին: Քվեարկությունը կկայանա օնլայն https://junioreurovision.tv կայքում: Պետք ընտրել 3, 4 կամ 5 մասնակից ու քվեարկել նրանց օգտին: Քվերակությունը կբացվի նոյեմբերի 24-ին: Նոյեմբերի 26-ին՝ շոուից առաջ կփակվի եւ բոլոր ելույթներից հետո 15 րոպեով կրկին կբացվի: