Արտակ Զեյնալյանը հիմնվում է հրապարակման ոչ ենթակա, անհայտ թվի վրա.Ահարոնյանը մեկնաբանում է

ՀՀ ոստիկանության լրատվության եւ հասարակայնության հետ կապերի վարչության պետ Աշոտ Ահարոնյանը ֆեյսբուքյան իր էջում գրառում է կատարել` պարզաբանելով ԱԺ պատգամավոր Արտակ Զեյնալյանի կողմից խորհրդարանի ամբիոնից ոստիկանության վերաբերյալ արված երկու հայտարարությունները.

«Ազգային ժողովի պատգամավոր Արտակ Զեյնալյանը ՀՀ 2018 թվականի բյուջեի քննարկման ժամանակ խորհրդարանի ամբիոնից ոստիկանության վերաբերյալ երկու հայտարարություն արեց, որոնք մեկնաբանության կարիք ունեն: 
Նախ հարգարժան պատգամավորը հարցադրում արեց, թե ինչու է աճում ոստիկանության ֆինանսավորումը: 
Իրականում խորհրդարանի քննարկմանը ներկայացված նախագծով ոստիկանության ֆինանսավորումը 2018 թվականին նախատեսվում է ոչ թե ավելացնել, այլ հակառակը՝ կրճատել 1,3 տոկոսով կամ 544,4 միլիոն դրամով: 
Ինչ վերաբերում է Արտակ Զեյնալյանի երկրորդ հարցադրմանը, թե բնակչության մեկ շնչին ընկնող թվով Հայաստանի ոստիկանությունը գերազանցում է այլ երկրների,ապա մի քանի օր առաջ ոստիկանության բարձրաստիճան ներկայացուցիչը նույն խորհրդարանում ամենայն պատասխանատվությամբ հայտարարեց, որ ոստիկանությունն օպտիմալ թվակազմ ունի և չի գերազանցում այլ երկրների իրավապահ համակարգերին: 
Արտակ Զեյնալյանը, որը նաև փորձառու իրավաբան է, զարմանալիորեն հիմնվում է Կառավարության որոշումով գաղտնագրված, այսինքն՝ հրապարակման ոչ ենթակա և անհայտ թվի վրա. այդ դեպքում որքանո՞վ է փաստական նման պնդումը»,-գրել է Աշոտ Ահարոնյանը:

Հիշեցնենք, որ երեկ Ազգային ժողովում 2018 թվականի բյուջեի նախագծի վերաբերյալ հայտարարություններ անելիս ԱԺ «Ելք» խմբակցության պատգամավոր Արտակ Զեյնալյանը, խոսելով ՀՀ բյուջեի ծախսերի ու խնայումների մասին, նաեւ նշել էր. «Ոստիկանության ծախսերն ինչո՞ւ ենք ավելացնում, ինչո՞ւ ենք մենք պահում այդքան ոստիկաններ, աշխարհում առաջին տեղում ենք՝  մեկ շնչին հասնող ոստիկանների քանակով»,-ասել էր նա