Որ թիմում հայ է խաղում, նա էլ ֆուտբոլի աշխարհի չեմպիոն կդառնա. Կարամբյո (տեսանյութ)

Ֆրանսիայի հավաքականի կազմում աշխարհի 1998 թ. չեմպիոն դարձած Քրիստիան Կարամբյոն շատ ոգեւորված է Հայաստանում գտնվելու կապակցությամբ: Այսօր՝ փետրվարի 7-ին, նա Ազատության հրապարակում հայաստանցի ֆուտբոլասերներին ներկայացրեց ՖԻՖԱ-ի աշխարհի գավաթը: Մինչեւ մրցանակի հանրային ցուցադրությունը նա պատասխանեց հայ լրագրողների հարցերին:

- Բարի կեսօր, Երեւա՛ն (ասաց հայերենով): Շատ ուրախ եմ այսօր ձեզ հետ լինելու համար: Գիտենք, որ 20 տարի առաջ ես իմ գլխավերեւում եմ պահել այս գավաթը՝ Ֆրանսիայի հավաքականի իմ խաղընկերների հետ: Կարծում եմ՝ գիտեք, որ այդ թիմում 2 հայ կար՝ Ալեն Պողոսյանը եւ Յուրի Ջորկաեֆը. նրանք հայկական ծագում ունեն: Շատ հպարտ եմ մրցանակն այսօր ձեզ ներկայացնելու համար: Գուցե սա ոգեւորի Հայաստանի հավաքականի ավագ Հենրիխ Մխիթարյանին ու նրա թիմակիցներին, եւ նրանք վստահություն ձեռք բերեն աշխարհի առաջնության մյուս ընտրական փուլից առաջ: Հուսով եմ, որ սրանով կնպաստենք Հայաստանում ֆուտբոլի տարածմանը, ու մեկ օր էլ դուք կխաղաք աշխարհի առաջնությունում:

- Դուք «Ռեալ Մադրիդի» կազմում 2 անգամ հաղթել եք Չեմպիոնների լիգայում: Ի՞նչ եք կարծում, այս տարի «Ռեալը» կարո՞ղ է 3-րդ տարին անընդմեջ նվաճել տիտղոսը: Եվ ի՞նչ եք մտածում այս ծանր իրավիճակի մասին, որում «Ռեալը» հիմա գտնվում է:

- Թիմը դեռ պայքարում է Չեմպիոնների լիգայում, նրանք կհաղթեն 3-րդ անգամ, մենք կունենանք այդ ռեկորդը:

- 1998 թ. դուք նվաճեցիք այս գավաթը: Այսօր այն ներկայացնում եք ողջ աշխարհին: Ի՞նչ է դա Ձեզ համար նշանակում:

- Դա ինձ համար մեծ նշանակություն ունի: Աշխարհի առաջնությունում հաղթելը երազանք էր, որը իրականություն է դարձել, որովհետեւ, ինչպես բոլորը, մենք էլ երեխա ժամանակ երազանքներ ունեինք: Իմ ընկերների հետ այս մրցանակը նվաճելու հնարավորություն ունեցանք: Գավաթը ներկայացնելն էլ ինձ համար մեծ նշանակություն ունի, որովհետեւ այսօր ձեզ հետ լինելու հնարավորություն ունեմ: Սա կյանքի յուրահատուկ փորձ է:

- Ըստ Ձեզ՝ ո՞վ կհաղթի աշխարհի 2018 թ. առաջնությունում:

- Ինչպես ասացի՝ 20 տարի առաջ մենք նվաճեցինք գավաթը 2 հայի հետ: Հիմա չգիտեմ՝ որ թիմում հայեր կան, երեւի այդ թիմն էլ հաղթի (կատակում է): Կարծում եմ՝ Ֆրանսիան կրկին հաղթելու համար անհրաժեշտ ունակություններն ունի: Կան նաեւ Արգենտինան, Բրազիլիան, Իսպանիան, Գերմանիան... եւ Ռուսաստանը, որովհետեւ նրանք հյուրընկալում են մցրաշարը: Կտեսնենք:

- Ի՞նչ եք կարծում, Հենրիխ Մխիթարյանը իր որակներով կկարողանար խաղալ ձեր հաղթական հավաքականում: Ի՞նչ կարծիք ունեք հայ աստղի մասին:

- Կարծում եմ՝ Հենրիխ Մխիթարյանը ցանկացած ակումբում եւ հավաքականում խաղալու անհրաժեշտ որակներն ունի: Ձեր հավաքականից ես ճանաչում եմ նաեւ Գեւորգ Ղազարյանին, որովհետեւ նա խաղացել է «Օլիմպիակոսում»: Ինչ վերաբերում է ձեր ավագին, նա խաղացել է Բունդեսլիգայում, հիմա Պրեմիեր լիգայում է եւ կարող է իր բոլոր որակները կիսել հավաքականի իր թիմակիցների հետ, եւ օգնել հավաքականին հասնել իր նպատակներին:

- Ո՞վ է ուժեղագույն ֆուտբոլիստը, որի կողքին դուք խաղացել եք, եւ ո՞վ է ուժեղագույն ֆուտբոլիստը, որի դեմ եք խաղացել:

- Շատ են, Ջորկաեֆը, Զինեդին Զիդանը, Թիերի Անրին.... բազմաթիվ լավ խաղացողներ կան, որոնց հետ խաղալու բախտ եմ ունեցել: Բախտավոր եմ, որովհետեւ խաղացել եմ «Ռեալ Մադրիդի» աստղերի հետ: Ազգային հավաքականում, իհարկե, Զիդանը լավագույնն է եղել, որի հետ խաղացել եմ: Ուժեղագո՞ւյնները, որոնց դեմ խաղացել եմ, նույնպես շատ են: Երեւի, կարող եմ նշել Ռոնալդոյին, Ռիվալդոյին, Ռոնալդինյոյին...

- Ի՞նչ եք կարծում, Լիոնել Մեսսին արժանի է նվաճելու այս գավաթը: Շատերը ասում են, որ աշխարհի այս առաջնությունը նրա վերջին հնարավորությունը կլինի:

- Կարծում եմ՝ սա մեծ հնարավորություն է Արգենտինայի հավաքականի համար: 2014-ին նրանք կարող էին հաղթել, բայց Գերմանիան շատ ուժեղ էր, եւ դա ցույց էր տվել Բրազիլիային հաղթելով: Գերմանիայի դեմ խաղում՝ եզրափակչում, արգենտինացիները մի քանի հնարավորություն ձեռքներից բաց թողեցին, իսկ Գերմանիան շատ պրագմատիկ էր: Ինչ վերաբերում է, Մեսսիին, Արգենտինան այս անգամ մեծ դժվարությամբ հաղթահարեց որակավորման փուլը, բայց Մեսսին թիմում եղանակ էր ստեղծում:

Կարամբյոն ելույթ է ունենում եւ գավաթը ներկայացնում 9:37 վայրկյանից

^{Լուսանկարներն ու տեսանյութը «Հայկական ժամանակ»-ի}