Եվրոպական ֆուտբոլ. Ֆուտբոլային շաբաթը մեկնարկում է

Վաղը սկսվում է եվրոպական երկրների ֆուտբոլի ազգային հավաքականների հերթական շաբաթը. նախ կայանալու են մեծ թվով ընկերական հանդիպումներ, ապա մեկնարկում է Աշխարհի 2018 թվականի գավաթի (ԱԳ 2018) խաղարկության ընտրական մրցաշարը: Վերջին տարիների ավանդույթի համաձայն՝ եվրոպական երկրների ազգային հավաքականները խաղեր անցկացնելու համար իրենց տրամադրության տակ ունենում են ընդամենը 1 շաբաթ եւ քանի որ «ԱԳ 2018»-ի ընտրական մրցաշարում կայանալու է միայն 1 տուր, կազմակերպվում են նաեւ մեծ թվով ընկերական խաղեր: Հայաստանի ազգային հավաքականը վաղը ընկերական խաղում մրցելու է Չեխիայի հետ (սկիզբը Երեւանի ժամանակով 21:15-ին), իսկ սեպտեմբերի 4-ին, կրկին դրսում, ընտրական խաղ է անցկացնելու Դանիայի  հետ:

Դանիացիները, իրենց հերթին, վաղը ընկերական խաղ են անցկացնելու Լիխտենշտեյնի հավաքականի հետ: Սեպտեմբերի 4-ին «ԱԳ 2018»-ի ընտրական մրցաշարում Հայաստանի հետ նույն խմբում ընդգրկված մյուս թիմերից Ղազախստանը հյուրընկալելու է Լեհաստանին, Ռումինիան՝ Մոնտենեգրոյին: Մեծ հետաքրքրությամբ է սպասվում վաղը կայանալիք Թուրքիա - Ռուսաստան ընկերական խաղը: Եվրոպայի չեմպիոնի տիտղոսը նվաճելուց հետո առաջին խաղերն է անցկացնելու Պորտուգալիան. սեպտեմբերի 1-ին ընկերական խաղում հյուրընկալելու է Ջիբրալթարին, իսկ 5 օր անց ընտրական մրցաշարում արտագնա խաղում մրցելու է Շվեյցարիայի ընտրանու հետ: Եվրոպական մի շարք առաջատար երկրներում, սակայն, առայժմ քննարկվում են այլ իրադարձություններ:

ազատագրվել են

Աշխարհի գործող չեմպիոնի տիտղոսը կրող Գերմանիան վաղը ընկերական խաղում մրցելու է Ֆինլանդիայի, իսկ սեպտեմբերի 4-ին՝ «ԱԳ 2018»-ի ընտրական մրցաշարում՝ Նորվեգիայի ընտրանիների հետ: Բայց գերմանական մամուլի ուշադրության կենտրոնում դեռ հավաքականը չէ: Երկրի չեմպիոն «Բավարիան» Բունդեսլիգայի 1-ին տուրում նոր գլխավոր մարզիչ, իտալացի Կարլո Անչելոտիի գլխավորությամբ սեփական հարկի տակ 6-0 հաշվով ջախջախել է Բրեմենի «Վերդերին»: Մեծ հաշվով «Բավարիայի» հաղթանակը «Վերդերի» նկատմամբ (նույնիսկ՝ մեծ հաշվով) սպասելի էր. այս թիմերի վերջին 11 հանդիպումներն ավարտվել են Մյունխենի թիմի հաղթանակով՝ խփած եւ բաց թողած գոլերի 45-6 տարբերությամբ:

Մասնագետները, սակայն, ուշադրություն են հրավիրում «Բավարիայի» նոր խաղային ձեռագրի վրա. Անչելոտիին հաջողվել է որոշակի փոփոխության ենթարկել նախկին մարզիչ Խոսեպ Գվարդիոլայի ներդրած խաղաոճը: ««Բավարիայի» ֆուտբոլիստները կարծես մեծ բավականություն են ստանում խաղից: Անչելոտին նրանց ազատություն է տվել, ֆուտբոլիստները ազատագրվել են Գվարդիոլայի «կապանքներից»», - մասնավորապես հայտարարել է գերմանական «ADB» հեռուստաալիքի փորձագետ, նախկինում հայտնի ֆուտբոլիստ Մեհմեդ Շոլը:

105 տարի

Իտալիայի ազգային հավաքականի նոր գլխավոր մարզիչ Ջանպիերո Վենտուրան հրապարակել է այն ֆուտբոլիստների անունները, որոնք հրավիրվել են նախապատրաստվելու Ֆրանսիայի հետ վաղը կայանալիք ընկերական խաղին եւ սեպտեմբերի 5-ին նախատեսված «ԱԳ 2018»-ի ընտրական մրցաշարի Իսրայելի հետ հանդիպմանը: Առաջին անգամ հավաքական է հրավիրվել «Միլանի» դարպասապահ 17-ամյա Ջանլուիջի Դոնարուման: 1911 թվականից հետո Դոնարուման ամենաերիտասարդ ֆուտբոլիստն է, որ հրավիրվում է ազգային հավաքական: Հետաքրքիր է, որ Իտալիայի ընտրանու հիմնական դարպասապահ եւ ավագ Ջանլուիջի Բուֆոնը առաջին անգամ ազգային հավաքականում խաղացել է դեռ 1997 թվականին՝ Դոնարումայի ծնվելուց 2 տարի առաջ:

Պատմական

Նոր մարզիչ ունի նաեւ Աշխարհի եւ Եվրոպայի նախկին չեմպիոն Իսպանիայի ազգային հավաքականը՝ 49-ամյա Խուլեն Լոպետեգին: Վերջինիս գլխավորությամբ Իսպանիան իր 1-ին հանդիպումը կանցկացնի սեպտեմբերի 1-ին՝ Բրյուսելում կայանալիք ընկերական խաղում կմրցի Բելգիայի ընտրանու հետ: Իսկ 4 օր անց՝ սեպտեմբերի 5-ին «ԱԳ 2018»-ի ընտրական մրցաշարում Իսպանիան կհյուրընկալի Լիխտենշտեյնին: Բայց նախօրեին Իսպանիայում բոլորովին այլ թեմա էր քննարկվում: Մերձմադրիդյան Լեգանես փոքրիկ քաղաքը ներկայացնող համանուն ակումբը առաջին անգամ հանդես գալով Իսպանիայի բարձրագույն խմբում՝ Պրիմերայում, ռեկորդի հեղինակ է դարձել:

«Լեգանեսը» առաջին 2 տուրերում հաղթել է «Սելտային» (1-0) եւ ոչ-ոքի է խաղացել Մադրիդի «Ատլետիկոյի» հետ (0-0). իսպանական Պրիմերայի 89 - ամյա պատմության մեջ «Լեգանեսը» դարձել է առաջին թիմը, որը կարողանում է մեկնարկային 2 հանդիպումներում՝ 180 րոպե, իր դարպասը պահել անառիկ: Մինչ այժմ մեկնարկային խաղերում գոլ բաց չթողնելու ռեկորդը պատկանում էր Մադրիդի «Ռեալին»՝ 161 րոպե: Իսպանական մամուլը «Լեգանեսի» ցուցանիշը անվանել է «պատմական ռեկորդ»: