ՀՀ դահուկասպորտի ֆեդերացիայի նախագահը հերքում է, որ մարզիկի «գլխին սարքել են»

ՀՀ դահուկասպորտի ֆեդերացիայի նախագահ, Ծաղկաձորի քաղաքապետ Արթուր Հարությունյանը վստահեցնում է, որ լեռնադահուկորդ Աշոտ Կարապետյանի հետ աձնական խնդիրներ չունի: Օրերս աղմուկ էր բարձրացել, քանի որ մարզիկն օլիմպիական խաղերի մրցավայրում մնացել էր առանց դահուկի: Նա Փհենչհան 2018 մեկնել էր ընկերոջ հին դահուկներով, քանի որ ֆեդերացիան իրեն նորը չէր տրամադրել: Դրանք էլ մարզման ժամանակ կոտրվել էին: «Հայկական ժամանակ»-ին հայտնի էր դարձել, որ տղան այդ իրավիճակում է հայտնվել, քանի որ ֆեդերացիայի ղեկավարները փորձել են վնասել նրան: Բանն այն է, որ ի սկզբանե Արթուր Հարությունյանը ցանկացել է, որ Խաղերին մեկնի իր հորեղբոր թոռը՝ Հարություն Հարությունյանը: ՀԱՕԿ միջամտությամբ գնացել է ավելի բարձր միավորներ ունեցողը՝ Աշոտը:

ՀԺ-ն Հարությունյանի հետ զրուցեց դեպքի մասին: Նա փորձեց հավաստիացնել, որ մարզիկի հետ անձնական պատճառներով տարաձայնություններ չունի:

- Ինչպե՞ս է ստացվել, որ Աշոտ Կարապետյանը մնացել է առանց դահուկի:

- 2-րդ դահուկն էլ պետք է տաներ հետը, ունենար 2-րդ դահուկը: Բայց քանի որ մենք պատվիրել ենք, եւ պատվերը հիմնականում օվկիանոսից այն կողմում է, որովհետեւ արտադրվում է Ավստրիայում եւ տեղափոխվում է Կորեա... նմանատիպ պահեր լինում են, որ պատվերն ուշ է հասնում: Բայց, որ պատվիրվել է, դա միանշանակ: Թե չէ այնպես չէ, որ առանց դահուկի... եթե դահուկ չունենար ինչպե՞ս էր վարկանիշային միավորներ հավաքելու:

- Նա նշում է, որ մի քանի տարի օգտագործել է ընկերոջ դահուկները, որոնք արդեն հնամաշ են եղել, ու ֆեդերացիայից գույք չի ստացել:

- Հներով, եթե թույլ են տալիս միջազգային մրցաշարերի մասնակցել, ինչո՞ւ չէր կարելի պարապմունք անել: Եթե հնամաշ լինեին, նրան ոչ մեկ թույլ չէր տա միջազգային մրցումների մասնակցել, այն էլ վարկանիշային: Չէ՞ որ Հայաստանի առաջնությունում այդ դահուկներով էր հանդես գալիս, միջազգային կարգի մրցումների էր մասնակցում: ՀՀ առաջնությունը նաեւ վարկանիշային էր: Դրանից առաջ մարզիկներն ուրիշ մրցաշարերի են մասնակցել, 2017 թ. աշխարհի առաջնությանն են մասնակցել, դահուկը հո՞ մեքենայի անվադող չի՝ այդքան շուտ մաշվի:

- Նա նշում է, որ մյուսները ստացել են գույք, իսկ ինքը մի քանի տարի չի ստացել:

- Օրինակ, երբ Շվեյցարիայում պետք է մասնակցեինք աշխարհի առաջնությանը, մենք գնացել ենք այնտեղ, նոր նրանք գույքը ստացել են: Խնդիրն այն է, որ մեր սպորտաձեւում գնում ենք, նոր գույքը տեղում ենք ստանում: Պատվիրում ենք, դա խանութից գնվող ապրանք չէ, պրոֆեսիոնալ գույք է, որը պետք է պատվիրվի ու համապատասխանի ստանդարտներին: Իսկ այնտեղ՝ Փհենչհանում է գտնվում մեր ֆեդերացիայի փոխնախագահ, նաեւ քարտուղար Գագիկ Սարգսյանը, գլխավոր մարզիչը, ինչպե՞ս կարող է մեր մասնակիցը ինչ-որ խնդիրներ ունենալ: Խնդիրները, ինձ թվում է, ֆիրմայի խնդիրներն են եղել, որոնք արդեն լուծվել են: Դահուկ է, կոտրվել է, կարող է դահուկի որակից լինել, անփութությունից լինել, բայց որ նոր դահուկով պետք է մեկնարկի դուրս գա, դա միանշանակ, մեր պատիվն է: Մենք մեր մարզիկին ուղարկել ենք, որպեսզի կարողանա լավ միավորներ հավաքել, լավ ներկայացնել Հայաստանը, որպեսզի աշխարհին ասենք, որ մենք էլ այս սպորտաձեւն ունենք, զարգացնում ենք:

- Նա ամեն դեպքում դժգոհում է ՀՀ դահուկասպորտի ֆեդերացիայից: Նշում է, որ մյուս ավելի թույլ մարզիկները գույք ստանում են, ինքը՝ ոչ:

- Ինչպե՞ս կարող է այդպես լինել, եթե ես ասում եմ, որ 2017 թ. մենք նրան գույքը տվել ենք: Եթե չէր ստանում, ինչպե՞ս էր դահուկ քշելու:

- Ասում է՝ որ ընկերոջ դահուկն է վերցրել:

- Իսկ ընկերն իր սեփական դահուկն ունի՞: Չէ՞ որ բոլորի դահուկները ֆեդերացիայի դահուկներն են: Իսկ իր դահուկը ինչո՞ւ չի տարել:

- Ասում է՝ չունի:

- Որ ասում եմ 2017 թ. տվել ենք... ինչպե՞ս, մեկը ստանում է, մեկը ո՞չ: Բոլոր մրցաշարերում օլիմպիական կոմիտեն տեղում գույքով ապահովել է ե՛ւ դահուկորդներին, ե՛ւ լեռնադահուկորդներին: Հիմա որ օվկիանոսից այն կողմ է.... ամեն մարդ չի բերում, պետք է տանել, մաքսազերծել, ուրիշ պետություն... եթե լիներ Եվրոպայում, այդ դահուկները կարելի էր կես ժամվա մեջ տեղ հասցնել: Մենակ մեր մարզիկը չէ, որ նման խնդիրներ կունենա, ես համոզված եմ: Այդպես պատահում է:

- Դահուկը որտեղի՞ց պետք է ուղարկվեր:

- Ավստրիայից:

- Իսկ ինչո՞ւ Ավստրիայից չի ուղարկվել:

- Դե ասացի՝ իրենք որոշակի քանակի դահուկ են տանում, Աշոտը հունվարի 21-ին նոր վարկանիշային անհրաժեշտ միավորները հավաքել է, իհարկե այդ վարկանիշը նաեւ սպիտակ քարտով է բավարարել...

- Իսկ ինչո՞ւ դահուկներն Ավստրիայից չեն ուղարկվել:

- Դե ասում եմ էլի՝ երեւի ինչ-որ խնդիրներ կա, որ իրենք բերում են, ասենք, Կորեա, տվյալ պետություն, պետք է մաքսազերծեն... նման խնդիրներ կան, որոնցից ես տեղյակ չեմ:

- Տեղեկություններ կան, որ ձեր հարաբերություններն են վատ, որովհետեւ ցանկացել եք՝ ձեր հորեղբոր թոռը գնա, բայց ՀԱՕԿ-ը միջամտել է, եւ Աշոտն է գնացել:

- Եթե ես ուզենայի, որ իմ հորեղբոր թոռը գնար, ֆեդերացիայի նիստում որոշում կկայացնեի՞նք, որ Աշոտն է գնում:

- ՀԱՕԿ-ի միջամտությունից հետո է որոշում կայացվել, որ Աշոտը գնա:

- Ֆեդերացիան է որոշել, ՀԱՕԿ-ը ուղղակի իր կարծիքն է ասել: Ֆեդերացիան նիստի ժամանակ որոշել է, եւ առաջինն այդ առաջարկությունն արվել է ֆեդերացիայի անդամ, մարզիչ Արման Հարությունյանի կողմից, որը իմ մյուս հորեղբոր տղան է:

- Նաեւ ասում էին՝ իբր Աշոտն է այս ամենը կազմակերպել, որ Ձեզ վնասի, քանի որ անձնական վատ հարաբերությունների մեջ եք:

- Չեմ կարող ասել: Ախր նա երեխա է, ի՞նչ վնասի ինձ: Երեւի մի բանից ընկճվել է տղան, մի բան ասել է: Ինչո՞ւ պետք է վնասի ինձ, ես իրեն ի՞նչ եմ արել՝ բացի լավից: Ծաղկաձորում կարող եք հասարակ քաղաքացուց հարցնել, իմ ուշք ու միտքը իմ քաղաքն ու ֆեդերացիան սարքեն էլ:

Տպել
2448 դիտում

«Բժիշկներ առանց սահմանների» միության հայաստանյան առաքելությունը ԱԻՆ-ին ռադիոմետրեր է նվիրել

Արգենտինայում կյանքից հեռացել է Ցեղասպանությունը վերապրած 106-ամյա հայուհին

4 նախկին նախարար ստորագրել են Ամուլսարում հանքի թույլտվությունը. ՀԲՃ-ն անուններ է հրապարակում (լուսանկարներ)

Ուսուցչին որպես բեռնաձի օգտագործելով՝ կրթության որակ չի ապահովվի. մանկավարժները սպառնում են գործադուլով

ԱԱԾ-ն բացահայտել է ՍԱՊԾ մի խումբ աշխատակիցների կողմից կաշառք պահանջելու եւ ստանալու դեպքեր

Վերջին մեկ շաբաթվա ընթացքում 117 ապօրինի հատված ծառ է հայտնաբերվել

Ղազախստանի թղթադրամների եւ մետաղադրամների վրա այսուհետ չեն լինի ռուսերեն գրառումներ

Պետական մակարդակով կազմակերպած երթը ոճրագործության բացահայտման քայլերից մեկն է. Մարտի 1-ի զոհերի հարազատներ

Հուլիսի 1-ից կարգելվի պոլիէթիլենային տոպրակների անվճար տրամադրումը, 3 տարի անց՝ վաճառքը

Ջավախքի Հեշտիա գյուղում ԱրՄաթ ինժեներական լաբորատորիա է բացվել

Մուշուրբան, պարկապզուկը, կոխն ու որդան կարմիրը՝ մշակութային ժառանգության նոր արժեքներ

Վարչապետին ճիշտ են ասել. Մարտի 1-ի գործը ջուր է. Յուրի Խաչատուրովի պաշտպան

Լաս Վեգասը մեզ համար լոկ խաղատների աշխարհ չէ. Մխիթար Հայրապետյան

Օրը ցերեկով մեքենա ջարդուխուրդ անող երիտասարդներից մեկը քիչ առաջ 1 միլոն 500 հազար դրամ գրավի դիմաց ազատ է արձակվել

Հայաստանը և Սուրբ Աթոռը հանդես կգան գիտակրթական ու մշակութային համատեղ նոր ծրագրերով

Ըմբիշ Միհրան Հարությունյանը կարծում է, որ իրեն չեն ցանկանում տեսնել ՀՀ հավաքականում

Իմ սպասումն է, որ ժողովրդի կարիքները հանգրվանային կերպով իրագործվեն. Արամ Ա-ն՝ Նիկոլ Փաշինյանին (տեսանյութ)

Դադարեք անհանգստացնել հացադուլն ընդհատելու հորդորներով. Գալստյանը մտահոգներին առաջարկում է աջակցել նշված հաշվեհամարներով

Մեկնարկեց Գաստիկի, Ծըգլի եւ Տլեի գործով վերաքննիչ բողոքների քննությունը. նրանց համար ցմահ ազատազրկում են պահանջում

«Շախմատ» առարկայի դասավանդման կողմնակից եմ. Արայիկ Հարությունյան