Որ դերասաններն ու ներկայացումներն են հավակնում «Արտավազդ»-ին

Մարտի 27-ին կայանալիք «Արտավազդ» ամենամյա թատերական մրցանակաբաշխությունն այս տարի նվիրվելու է ՀՀ Ժողովրդական արտիստ, Կոնստանտին Ստանիսլավսկու անվան ռուսական պետական դրամատիկական թատրոնի նախկին գլխավոր ռեժիսոր եւ գեղարվեստական ղեկավար Ալեքսանդր Գրիգորյանի հիշատակին:

Հայաստանի թատերական գործիչների միության նախագահության նիստը որոշում է կայացրել մարտի 27-ի ամենամյա մրցանակաբաշխությունն անցկացնել Գաբրիել Սունդուկյանի անվան ազգային ակադեմիական թատրոնում: Արդեն հայտնի է 2-րդ փուլ անցած աշխատանքների ցանկը, որոնք ներկայացվելու են «Արտավազդ» մրցանակաբաշխությանը:

ՀԹԳՄ «Արտավազդ» ամենամյա մրցանակները շնորհվում են յուրաքանչյուր տարվա մարտի 27-ին` թատրոնի միջազգային օրը, կամ դրա նախօրեին` մրցանակաբաշխության նախորդ տարվա մարտի 1-ից մինչեւ մրցանակաբաշխության տարվա փետրվարի 15-ն ընկած ժամանակահատվածում առավել աչքի ընկած թատերական աշխատանքների համար:

Ստորեւ ներկայացնում ենք մրցանակաբաշխության 2-դ փուլն անցած եւ «Արտավազդ»-ի հավակնորդ լավագույն դերասանների, լավագույն դերասանուհիների եւ լավագույն ներկայացումների ցանկը.

Լավագույն դերասանուհի անվանակարգում ներկայացվել են՝

Հակոբ Պարոնյանի անվան կոմեդիայի թատրոնից Սաթենիկ Հախնազարյանը՝ «Քարերը հավաքելու ժամանակը» ներկայացման մեջ խաղացած դերի համար,

Համազգային թատրոնից Տաթեւ Ղազարյանը՝ «Սովորական օր» ներկայացման մեջ խաղացած դերի համար,

Արմմոնո փառատոնի մասնակից Նարինե Գրիգորյանը «Իմ ընտանիքն իմ ճամպրուկում է» ներկայացման մեջ խաղացած դերի համար,  

Տիկնիկային թատրոնից Տաթեւ Մելքոնյանը՝ «Ո՞վ է վախենում Վերջինիա Վուլֆից» ներկայացման մեջ խաղացած դերի համար.

Լավագույն դերասան անվանակարգում ներկայացվել են՝

Ավետիք Խալաթյանը՝ «Ռեւիզորը» ներկայացման մեջ խաղացած դերի համար,

Սենիկ Բարսեղյանը՝ «Ռոմեո եւ Ջուլիետ»-ում խաղացած դերի համար.

Սամվել Թոփալյանը՝ «Ատամնաբույժն... նորե՞ն» ներկայացման մեջ խաղացած դերի համար,

Միքայել Վաթինյանը՝ «Ո՞վ է վախենում Վիրջինիա Վուլֆից» ներկայացման մեջ խաղացած դերի համար,

Արմեն Մարգարյանը «Վատ տղաներ»-ում խաղացած դերի համար,

Լավագույն ներկայացում անվանակարգում ներկայացվել են՝

Ստանիսլավսկու անվան ռուսական թատրոնում բեմադրված «Լիներ կամքի ուժ ամպրոպը», Հ. Պարոնյանի անվան կոմեդիայի թատրոնում բեմադրված «Ռեւիզորը», Գեղարքունիքի մարզի Լեւոն Քալանթարի անվան թատրոնում բեմադրված «Սալոմե»-ն, Հենրիկ Մալյանի անվան թատրոնում բեմադրված «Անունը», Կամերային թատրոնում բեմադրված «Ռոմեո եւ Ջուլիետ»-ը:

Լավագույն երաժշտության հեղինակ անվանակարգում ներկայացվել են՝

Պատանի հանդիսատեսի թատրոնից Արման Միրիջանյանը «Փոքրիկ ուրվականը» ներկայացման համար գրված երաժշտության համար,

Լավագույն մանկական ներկայացում անվանակարգում ներկայացվել են՝

Պատանի հանդիսատեսի թատրոնում բեմադրված «Փոքրիկ ուրվականը», «Լոռեցու հարսնացուն», Ստանիսլավսկու անվան ռուսական թատրոնում բեմադրված «Հեքիաթ Շելկունչիկի մասին» ներկայացումները:

Թատերարվեստին արժանապատիվ ծառայության համար անվանակարգում առաջարկությունն արվում է ԹԳՄ նախագահության կողմից: Մրցանակաբաշխությունն անցկացվում է 2 փուլով, ընդ որում, յուրաքանչյուր փուլի համար գործում է փորձագետների առանձին հանձնաժողով:

Որպես փորձագետների 1-ին փուլի հանձնաժողով հանդես է գալիս ՀԹԳՄ վարչությունը, իսկ 2-րդ փուլի հանձնաժողովը ՀԹԳՄ նախագահության կողմից հաստատվում է մրցանակաբաշխության տարվա փետրվարին: Մրցանակաբաշխության 1-ին փուլում, ՀԹԳՄ վարչության ոչ պակաս, քան 2 անդամ, գրավոր ներկայացնում են եզրակացություն՝ իրենց կարծիքով արժանի աշխատանքը 2-րդ փուլ անցնելու նպատակահարմարության մասին:

1-ին փուլի փորձագետների ներկայացրած կարծիքների հիման վրա ՀԹԳՄ նախագահությունը հաստատում է 2-րդ` վերջնական փուլ անցած աշխատանքների ցանկը, որոնց մասնակցությամբ, մրցանակաբաշխության ամսին, Երեւանում կամ Հայաստանի մարզերից որեւէ մեկում կազմակերպվում է «Արտավազդ» թատերական փառատոն, որը պետք է ավարտվի ոչ ուշ, քան մրցանակաբաշխությունից 2 օր առաջ:  

ՀԹԳՄ նախագահության կողմից հաստատված մրցանակաբաշխության փորձագետների կազմը հետեւյալն է ՝ պրոֆեսոր Աննա Հեքեքյան, թատերագետ Նվարդ Ասատրյան, թատերագետ Ռուզաննա Առաքելյան, ՀՀ ժողովրդական արտիստ Հրաչյա Գասպարյան, ՀՀ ժողովրդական արտիստ Վահե Շահվերդյան, ՀՀ արվեստի վաստակավոր գործիչ Ժիրայր Դադասյան, ՀՀ արվեստի վաստակավոր գործիչ Վիգեն Ստեփանյան:

 Աղունիկ Հովհաննիսյան