Քրեական հեղինակությունների գաղտնալսումները կհամարվեն որպես անթույլատերի ապացո՞ւյց

Քրեական հեղինակություններ Նորատուսցի Ալիկի եւ Չարբախցի Գեղամ մականունով հայտնի Պետրոս Իսրայելյանի խոսակցությունների գաղտնալսումները ապացույց չեն կարող համարվել, դրանք անթույլատրելի ապացույցներ են:

Այս մասին այսօր լրագրողների հետ զրույցում ասաց Ալիկ Բանդուրյանի պաշտպան Երեմ Սարգսյանը: Նա ասաց, որ գաղտնալսումներից  հետո համապատասխան փորձաքննություն է կատարվել`պարզելու համար, թե ձայնագրություններում լսվող ձայներն ո՞ւմ են պատկանում, սակայն փորձաքննության համար, ըստ ամբաստանյալ Ալիկ Բանդուրյանի պաշտպան Երեմ Սարգսյանի,  օրենքով սահմանված կարգով նշում չի վերցրել:

«Ինչն է հետաքրքիր այստեղ. Ալիկ Բանդուրյանի մասով նշեմ, որ նախ ներկայացրել են դատարանում կալանքը որպես խափանման միջոց ընտրելու ժամանակ կատարված ձայնագրությունը: Փորձաքննությամբ պարզվել է, որ սա պիտանի չէ նույնացման համար եւ չեն կարողացել որեւէ կերպ նույնացնել ձայնը: Դրանից հետո իրականացնում են ներքին դիտում օպերատիվ-հետախուզական միջոցառում, որի ընթացքում բանավոր խոսակցություն են ունեցել Ալիկ Բանդուրյանի հետ եւ առանց իր գիտության ձայնագրել են եւ այդ ձայնագրությունը ներկայացրել են փորձագետին: Ամբողջ խնդիրն այն է, որ սա որպես նմուշ ընդհանրապես չի կարող ներկայացվել, որովհետեւ սա օրենքով սահմանված կարգի խախտմամբ ձեռք բերված նմուշ է»,- ասաց Սարգսյանը:

Նրա խոսքով՝ Քրեական դատավարության օրենսգրքում հստակ կանոնակարգ կա՝ քննչական գործողություն, որը կոչվում է նմուշներ ստանալ: Ըստ նրա՝ նմուշը ստանալու համար պետք է կայացվի որոշում համապատասխան ընթերակաների ներկայությամբ, պետք է դրանք ձեռք բերվեն, որից հետո նոր օրենքով սահմանված կարգով ներկայացվի փորձաքննությանը: «Օրինակությունը մենք կվիճարկենք նաեւ այլ տեսնակյունից, որովհետեւ հենց ինքնին օպերատիվ-հետախուզական միջոցառում-գաղտնալսումները չեն կարող Քրեական դատավարության օրենսգրքով սահմանված կարգով որպես ապացույց օգտագործել: Կրկին պետք է նշեմ, որ դրանք ընդամենը օպերատիվ-հետախուզական միջոցառումներ են, դրանք կողմնորոշիչ պետք է լինեն քննություն կատարելու համար, բայց ոչ երբեք ապացույց: Չնայած օպերատիվ-հետախուզական գործունեության մասին օրենքում ինչ-որ նշույլ կա, որ դրա արդյունքները ապացույց են, բայց ես կհիմնավորեմ, որ իրավական ակտերի մասին օրենքի եւ Քրեական դատավարության օրենսգրքի իմաստով դրանք ապացույց չեն, իսկ սրանք ավելի գերակա են, քան նախորդ օրենքը»: Մեր դիտարկմանը՝ այսինքն, գաղտնալսումները չպե՞տք է դրվեն ապացույցների հիմքում, Երեմ Սարգսյանն ասաց, որ այս պահին գործող օրենսդրությամբ՝ ոչ, չնայած որ պրակտիկան բացարձակ այլ ուղղութամբ է գնում:

Նշենք, որ այս գործով արված գաղտնալսումները, ըստ էության, միակ ապացույցն են Նորատուսցի Ալիկի եւ Չարբախցի Գեղամի դեմ:

Նա նաեւ նշեց, որ իր պաշտպանյալ Ալիկ Բանդուրյանի արարքը որակելու հարցում ի սկզբանե գործով քննիչի ու մեղադրող կողմի միջեւ հակասություն է եղել: Այդ մասին Սարգսյանը հայտարարեց նաեւ դատարանում: Մասնավորապես՝ նախաքննության սկզբնական փուլում քննիչը Ալիկ Բանդուրյանի արարքը որակել է որպես մարմնական վնասվածք հասցնելու նախապատրաստության օժանդակում, սակայն մեղադրող կողմը ներկայում Ալիկ Բանդուրյանին մեղադրում է արդեն իսկ կատարված հանցագործությանը՝ այսինքն  ծանր մարմնական վնասվածք հասցնելուն օժանդակելու, այլ ոչ թե նման գործողություններ նախապատրաստելուն օժանդակելու մեջ:

Շենգավիթ վարչական շրջանում գործող «Լիա» գեղեցկության սրահի նկուղային հարկում կրակոցներ էին հնչել, որի հետեւանքով 25-ամյա Գեւորգ Ավետիսյանը տեղում մահացել է, իսկ հրազենային վիրավորում ստացած 38-ամյա Մուշեղ Մուշեղյանը եւ 35-ամյա Արամ Պետրոսյանը տեղափոխվել էին «Սուրբ Աստվածամայր» բժշկական կենտրոն: Ավելի ուշ, ստացած վնասվածքներից մահացել էր նաեւ Մուշեղ Մուշեղյանը:

Սույն քրեական գործով մեղադրվում են քրեական հեղինակություններ Ալիկ Բանդուրյանը (Նորատուսցի Ալիկ), նրա թիկնապահ, Բդո մականունով հայտնի Արմեն Գասպարյանը եւ Չարբախցի Գեղամ մականունով հայտնի Պետրոս Իսրայելյանը: