Արմեն Գյուլբուդաղյանցը՝ Արթուր Պետրոսյանին փոխարինելու հավանական թեկնածու

Հայկական ֆուտբոլային շրջանակներում՝ հատկապես ֆուտբոլասերների շրջանում, կարծիք կա, որ «Փյունիկ» ֆուտբոլային ակումբի գլխավոր մարզիչ Արմեն Գյուլբուդաղյանցը կարող է գլխավորել ՀՀ հավաքականը: Այսօր՝ ապրիլի 6-ին, իր պաշտոնից հրաժարվել է Արթուր Պետրոսյանը, որն ընտրանու ղեկն ստանձնել էր 2016 թ. հոկտեմբերին: Քննարկումներ ծավալվում են մի քանի տարբերակների շուրջ, սակայն ամենահավանականը համարվում է Գյուլբուդաղյանցը:

Ինչպես «Հայկական ժամանակը» տեղեկացել էր, ՀՖՖ նախագահ Ռուբեն Հայրապետյանը hանձնարարել է նոր մարզիչ է գտնել Լիտվայի հետ մարտի 27-ին կայացած ընկերական հանդիպումից հետո, որում ՀՀ-ն պարտվեց 0:1: Խաղից ընդամենը 10 օր անց ֆեդերացիան հայտարարում է, որ մի քանի օրից կասի նոր մարզչի անունը: Եթե հայտարարելու են մի քանի օրից, կարելի է ենթադրել, որ մարզիչն արդեն կա ու նրան երկար չեն փնտրել, երկար բանակցություններ չեն վարել: Հետեւաբար դժվար թե նա լինի արտասահմանից: Իսկ արտասահմանից հայ երկրպագուները 2 տարբերակ ունեն՝ ֆրանսիական «Մոնպելյեի» մարզիչ Միշել Տեր-Զաքարյանը եւ իտալացի Ջանի դի Բիազին, որն Ալբանիային հասցրեց Եվրո 2016: Տեր-Զաքարյանը, այսպես ասած, հավերժ թեկնածու է, իսկ Դի Բիազին կարող է թանկ հաճույք լինել: Օրինակ, Ուկրաինան գլխավորելու համար, ըստ լրատվամիջոցների, նա 1 մլն եվրո աշխատավարձ է պահանջել:

Հայաստանում աշխատող մասնագետներից երկրպագուների համար ցանկալի տարբերակներից է Աբրահամ Խաշմանյանը, որն օրերս է հեռացել ՀՀ գործող չեմպիոն «Ալաշկերտից»: Ամեն անգամ հավաքականի մարզչի փնտրտուքների շրջանում, նրա անունը շրջանառվում է, սակայն, ինչպես հայտնի է, Հայրապետյանն այնքան էլ չի համակրում այս մասնագետին՝ ինչպես ինքն է նշում, «հայկական Ժոզե Մոուրինյոյին»:

ՀՖՖ տեխնիկական տնօրեն Վարդան Մինասյանի տարբերակը նույնպես չի բացառվում: Նա հավաքականն արդեն գլխավորել է 2009-13 թթ.: Հիմնականում նրա անվան հետ են կապվում ընտրանու հաջողությունները, եւ ամեն անգամ, երբ նոր մարզչի հարց է առաջանում, նա լինում է հնարավոր թեկնածուների թվում: Արթուր Պետրոսյանից առաջ էլ նրա մասին շատ խոսվեց.... բայց չեկավ:

Արմեն Գյուլբուդաղյանցը: Այս մասնագետը, ինչպես Արթուր Պետրոսյանը, սիրված է ինչպես ֆուտբոլիստների, այնպես էլ ֆուտբոլասերների կողմից, լրագրողների հետ կոնֆլիկտներ չի ունենում: Հայրապետյանի հետ էլ տարաձայնություններ չի ունեցել: Ավելին, ՀՖՖ նախագահը նրա հասցեին գովասանքի խոսքեր է շռայլում: Այս տարվա սկզբին իր ասուլիսում նա ընդգծեց, որ Գյուլբուդաղյանցի ղեկավարությամբ «Փյունիկում» դրական մեծ փոփոխություններ են եղել:

«Առաջնությունը «Փյունիկը» սկսեց շատ վատ, նոր մարզչով, հետո ղեկավարներն արեցին փոփոխություններ, Արմեն Գյուլբուդաղյանցին ուղարկեցին վերապատրաստման, հետո բերեցին նրան, ու «Փյունիկն» անմիջապես սկսեց խաղալ այն ֆուտբոլը, որը կարող է խաղալ: Գյուլբուդաղյանցի գալով ակումբը գլխիվայր փոխվել է: Հիմա մարզվում են ակադեմիայի խաղադաշտերում, հավաք են անում, նրանց մարզումներին հետեւում եմ եւ հիանում եմ այն աշխատանքով, որ տարվում է: Եթե այդպես շարունակվի, կտեսնենք՝ քանի հոգի «Փյունիկից» կընդգրկվի ազգային հավաքականում»,- ասել էր նա:

Ինքը՝ Գյուլբուդաղյանցը, իր հետ կապված խոսակցությունները մեկնաբանել չի ցանկանում: «Այդպիսի բան ես չեմ լսել»,- ասաց նա ՀԺ-ին: Ամեն դեպքում, եթե նա է լինելու, հավանաբար այդ մասին հայտնի կդառնա «Փյունիկի» առաջիկա հանդիպումից հետո: Վաղը թիմը հյուրընկալելու է «Գանձասար-Կապանին»:

Ով էլ նոր մարզիչը լինի, երկրպագուները նրանից Եվրո 2020-ի ուղեգիր են ուզելու: Նոր ստեղծված Ազգերի լիգան, ըստ շատերի, խոշոր մրցաշարի մասնակցելու Հայաստանի հավաքականի միակ հնարավորությունն է, ու հաշվի առնելով, որ ՀՀ-ն այստեղ պայքարելու է իր կարգի թիմերի դեմ, երկրպագուներին, ուղեգիր նվաճելուց բացի, այլ արդյունք չի բավարարի: