Որոշումները պետք է ունենան ինստիտուցիոնալ բնույթ. Նիկոլ Փաշինյանը՝ Կորյուն Նահապետյանին

Վարչապետի թեկնածու, ԱԺ պատգամավոր, ԵԼՔ խմբակցության ղեկավար Նիկոլ Փաշինյանը պատասխանեց ԱԺ ՀՀԿ-ական պատգամավոր Կորյուն Նահապետյանին: Այս պահին ԱԺ-ում ընթանում է հատուկ նիստը, որի ժամանակ պետք է ընտրվի երկրի վարչապետը, եւ Նահապետյանը վարչապետի թեկնածուին հետեւյալ հարցը տվեց.

«Ակնհայտորեն մեր տարածաշրջանում ռազմաքաղաքական իրավիճակը շարունակում է մնալ լարված: Արցախա-ադրբեջանական շփման գծում հակառակորդի կողմից նկատվում են ռազմական տեխնիկայի կուտակումներ, կան արդեն նաեւ տեղեկություններ, որ պայմանավորված Հայաստանի ներքին իրադրությամբ հակառակորդի ճամբարում աշխուժություն է նկատվում եւ անգամ առաջարկներ են հնչեցվում սրացումներ առաջացնել այդ ճակատում: Դուք արդեն նշեցիք, որ որպես վարչապետի թեկնածու ընտրվելու դեպքում հանդես եք գալու նաեւ գերագույն հրամանատար: Ուզում եմ հատուկ նշել, որ դա միայն պատերազմի ժամանակ: Խաղաղ ժամանակ դուք չեք ունենալու այդպիսի իրավունք: Եվ բնական է՝ ոչ միայն ինձ, այլեւ մեր երկրի անվտանգության համար մտահոգ եւ սրտացավ բազմաթիվ մեր հայրենակիցների հետաքրքրում է ձեր կարողությունը, ձեր պատրաստվածությունը պաշտպանության եւ անվտանգության համակարգի ձեր իմացությունը, որովհետեւ վարչապետ ընտրվելու դեպքում դուք շատ պատասխանատու որոշումներ պետք է կայացնեք հատկապես պատերազմի ժամանակ:

Իրողությունն այն է, որ Սահմանադրության շրջանակներում պետական քաղաքականության այս բնագավառում մենք ունենք հստակ կանոններ, որոնք պետք է ամբողջապես իրականացվեն թե՛ խաղաղ, թե՛ պատերազմի ժամանակ: Հենց այս համատեքստում 2 հարց եմ ուզում ուղղել, 2 կոնկրետ իրավիճակներ եւ ակնկալում եմ ձեր կոնկրետ պատասխանները, թե ինչպիսի գործողություններ կձեռնարկեք:

Իրավիճակ առաջին: ՀՀ-ին սպառնացող անմիջական վտանգ է առկա, եւ կառավարությունը հնարավորություն չունի որոշում կայացնելու զինված ուժերի կիրառման վերաբերյալ:

Երկրորդ իրավիճակ: Ինչպիսի՞ իրավական հնարավորություն եք տեսնում զինված ուժերի կողմից ռազմական դիմակայման շրջանակներում զինված ուժերի առանձին ստորաբաժանումների օգտագործման մասին»,- հարցրեց Նահապետյանը:

Փաշինյանը պատասխանեց.

«Ճիշտն ասած, ձեր հարցը զարմացնում է, որովհետեւ մենք արդեն 2 ժամից ավելի այս դահլիճում քննարկում ենք, որ ընդհանրապես պետության մեջ որոշումները պետք է ունենան ինստիտուցիոնալ բնույթ: Ես հիմա, ի գիտություն ձեզ, ռազմագիտության 9-րդ դասարանի քննություն չեմ հանձնում, եւ դուք էլ պաշտոնաթող ենթասպա չեք, որ հիմա դպրոցում ռազմագիտության դաս եք տալիս: ՀՀ-ում կան ինստիտուտներ, ՀՀ-ում կա գլխավոր շտաբ, ՀՀ-ում կա պաշտպանության նախարարություն եւ ընդհանրապես վարչապետը՝ գերագույն գլխավոր հրամանատարը, պատերազմի դեպքում որոշումներ կայացնում է համապատասխան ինստիտուտների կարծիքը լսելով: Հիմա այդ հարցերը, որ տալիս եք, ես կարող եմ ձեզնից ակնկալել տասնյակ հարցերի պատասխան, որպեսզի տամ այդ հարցի պատասխանը սկսած նրանից, թե եղանակը ինչպիսին է եւ ինչպիսին է սպասվում եւ այլն, եւ այսպես շարունակ:

Ես կարող եմ ասել հետեւյալը, որ ասելով, որ պատրաստ եմ կատարել ՀՀ վարչապետի պաշտոնը՝ ես նկատի չունեմ, որ ես հանրապետության ամենաուժեղ էներգետիկն եմ, կա՛մ հանրապետության ամենաուժեղ տրանսպորտնիկն եմ, կա՛մ ամենաուժեղ հրետանավորն եմ, կա՛մ հանրապետության ամենաուժեղ հետախույզն եմ, կա՛մ հանրապետության ամենաուժեղ բժիշկն եմ, հանրապետության ամենաուժեղ օդաչուն եմ: ՀՀ վարչապետի կարգավիճակը քաղաքական կարգավիճակ է առաջին հերթին: Եվ առաջին հերթին վարչապետի պաշտոնը ստանձնելու դեպքում ինձ մոտ կհրավիրեմ պաշտպանության նախարարության, գլխավոր շտաբի, Ազգային անվտանգության ծառայության համապատասխան պաշտոնյաներին եւ կլսեմ նրանց զեկույցը հայ-ադրբեջանական շփման գծում եւ հայ-ադրբեջանական սահմանին տարող իրավիճակի մասին, հաստատված պլանների վերաբերյալ տեղեկություն կստանամ եւ կլսեմ նրանց կարծիքն անհրաժեշտ միջոցառումներ ձեռնարկելու վերաբերյալ: Եվ այդ ամենը լսելուց եւ վերլուծելուց հետո կկայացնեմ անհրաժեշտ որոշումներ»,- ասաց Փաշինյանը:

Նահապետյանն արձագանքեց Փաշինյանի պատասխանին.

«Խորը ափսոսանք պետք է հայտնեմ, որ տվյալ դեպքում դուք չեք տիրապետում ո՛չ Սահմանադրությանը, ո՛չ Պաշտպանության մասին օրենքին: Եվ ձեր փոխարեն այդտեղ կանգնած չեմ որպես վարչապետի թեկնածու, որ ամբողջական եւ սպառիչ պատասխանեմ, թե այդ իրավիճակում ինչպես կվարվեի որպես վարչապետ: Ցավում եմ, որ դուք ուղղակի չեք կարող այն հիմնական բեռը եւ պատասխանատվությունը ստանձնել որպես գերագույն հրամանատար, որովհետեւ, եթե դուք չգիտեք այն հիմնական իրավական կարգավորումները, ով պետք է որպես վարչապետ ղեկավարի, նրան մոլորության մեջ է գցելու ե՛ւ պաշտպանության նախարարը, ե՛ւ զինված ուժերի շտաբի գլխավոր պետը: Նրանք ձեզ ներկայացնելու են մի իրավիճակ, դուք չեք իմանալու, թե ինչ գործառույթներ ունեք իրականացնելու:

Ես ձեզ հիմա պարզաբանեմ, որպեսզի գոնե այս պարագայում դուք իմանաք, թե ընտրվելու պարագայում ինչ պետք է անեք:

Առաջին իրավիճակ, եթե ՀՀ կառավարությունն ի վիճակի չէ որոշում կայացնելու զինված ուժերի կիրառման մասին, ապա պաշտպանության նախարարի առաջարկությամբ՝ վարչապետը զինված ուժերի կիրառումը գործողության մեջ դնելու մասին որոշում պետք է կայացնի: Եթե դուք դա չգիտեք, ես պատկերացնում եմ՝ ինչպիսի վիճակում պետք է հայտնվեն մեր հայրենակիցները: Եթե դուք չգիտեք, թե վարչապետին ինչ պարբերականությամբ պետք է զեկուցեն անհետաձգելի, հրատապ սահմանափակ գործողություններ եւ հատուկ առաջադրանքներ կատարելու նպատակով, այստեղ Դուք քննություն եք բռնում որպես վարչապետի թեկնածու, ոչ թե որպես ռազմագիտության քննություն հանձնող»,- ասաց Նահապետյանը:

Նիկոլ Փաշինյանն ավելացրեց.

«Ես ցավում եմ, որ դուք այնքան էլ լավ չեք պատկերացնում, թե մենք հիմա ինչով ենք զբաղված: Ես գայթակղությանը չեմ տրվի եւ ձեզ հարցեր չեմ տա երթեւեկության կանոնների մասին: Իսկապես ցավում եմ, որ շարունակում եք աչքի ընկնել գերազանցիկի եռանդով, եւ եթե թվում է, որ տպավորություն եք թողնում, սխալվում եք»,- ասաց նա: