Կարելի է ասել՝ արդյունքները գերազանց են. Լեւոն Ջուլֆալակյանն ամփոփել է ԵԱ 2018-ը

Հայաստանի հունահռոմեական ոճի ըմբշամարտի հավաքականի գլխավոր մարզիչ Լեւոն Ջուլֆալակյանը գոհ է Եվրոպայի 2018 թ. առաջնությունում իր սաների ելույթներից: Կասպիյսկում ընթացող մրցաշարում օլիմպիական չեմպիոն, աշխարհի եռակի չեմպիոն Արթուր Ալեքսանյանը (97 կգ) 4-րդ անգամ կարիերայում դարձավ Եվրոպայի չեմպիոն: Աշխարհի չեմպիոն Մաքսիմ Մանուկյանը (82 կգ) նույնպես Եվրոպայի չեմպիոն դարձավ: Կարեն Ասլանյանը (67 կգ) բրոնզե մեդալ նվաճեց: Մասնագետին գոհացրին նաեւ երիտասարդներ Արմեն Մելիքյանն (60 կգ) ու Սլավիկ Գալստյանը (63 կգ), թեեւ նրանք մրցանակային տեղեր չզբաղեցրին: Այսօր՝ մայիսի 3-ին, իր սաների հետ Երեւան վերադառնալուց հետո Լեւոն Ջուլֆալակյանը լրագրողների հետ զրույցում ամփոփեց արդյունքները:  

«Կարելի է գերազնաց համարել արդյունքները: Կային երիտասարդ ըմբիշներ, որոնք նոր էին մասնակցում: Նրանցից էլ եմ գոհ: Մնացած բոլորը կարողացել են անել այն, ինչին ընդունակ են: Միայն Արթուր Շահինյանի (87 կգ) պարագայում, իրոք անարդարություն տեղի ունեցավ: Կարող էր մեդալի հավակնորդ լինել կամ գոնե 3-րդ տեղի համար պայքարել, բայց 2 գոտեմարտերում շատ կոպիտ ձեւով, խախտումներով չթողեցին, որ հաղթեր: Եվ անհաջող հանդես եկավ Կարապետ Չալյանը (77 կգ): Այն մարզիկը, որին պարտվեց, այնպիսի ըմբիշ չէր, որին կարելի էր զիջել (խմբ. շվեդ Ալեքս Միշել Բյուրբերգ Կեսիդիս): Մնացածը բոլորն էլ լավ են հանդես եկել»,- ասաց նա:

Կարեն Ասլանյանի համար Եվրոպայի 2018 թ. առաջնության բրոնզն առաջին մեդալն է մեծահասակների պայքարում: Նա 1/8 եզրափակչում հաղթել էր սերբ Մատե Նեմեշին: Քառորդ եզրափակչում զիջել էր ռուս Արտյոմ Սուրկովին: Սուրկովը եզրափակիչ էր դուրս եկել, եւ Ասլանյանը բրոնզի համար պայքարելու հնարավորություն էր ստացել: Սփոփիչ գոտեմարտում պարտության մատնեց ադրբեջանցի Էլման Մուխտարովին եւ բրոնզի համար գոտեմարտ անցկացնելու իրավունք ստացավ, որում էլ հաղթեց լեհ Դավիդ Կարեցինսկուն: Ջուլֆալակյանը վստահ է, որ իր պոտենցիալը ճիշտ օգտագործելու դեպքում Ասլանյանի հաջողությունները կշարունակվեն:

«Արդեն աճ կա, բայց պետք չէ կագնել: Պետք է շարունակել աշխատել: Շատ ուրախացրեց բոլորիս: Եվրոպայի առաջնության 3-րդ տեղը շատ լուրջ հաջողություն է: Ես համոզված եմ, որ լավ աշխատանքի դեպքում մեդալները շարունակական կլինեն»,- ասաց նա:

Լեւոն Ջուլֆալակյանը խոսեց նաեւ մրցավարությունից: Նա նշեց, որ ինչպես ինքը (մասնավորապես՝ Շահինյանի գոտեմարտերի դեպքում), այնպես էլ մի շարք երկրներ դժգոհ են մնացել մրցավարական գործողություններից: Մասնագետն ընդգծեց, որ մարզաձեւի կանոններն այնպես են սահմանված, որ մրցավարներին կողմնակալություն անելու լավ հնարավորություններ են տալիս: Նրանք էլ անհրաժետության դեպքում օգտնում են այդ հնարավորություններից:

«Լուրջ մրցավարական խախտումներ կային: Բոլոր երկրները, բացի մի քանիսից, անուններ չթվեմ, մի 2-3 երկիր կա, որոնց համար հաճելի է նման մոտեցումը... բայց ամեն դեպքում այս օրենքներն այնպես են ստացվել, որ թեեւ լավ է, որ պարտեր հասկացությունը վերադարձավ, բայց մրցավարների ձեռքը հնարավորություն է տրված. կարող են մեկին 2 անգամ պատժել, մեկին ընդհանրապես չպատժել»,- ասաց նա:

Հայ հունահռոմեականները մշտապես մեդալներով են վերադառնում միջազգային խոշոր մցրաշարերից: Սա, սակայն, ըստ Ջուլֆալակյանի, չի նշանակում, որ նրանք պետք է մտածեն, որ պայքարից դուրս են: Պետք է շարունակեն աշխատել առանց կանգ առնելու, քանի որ մրցակիցներն էլ ժամանակ չեն կորցնում:

«Ոչ մի օր չի կարելի դադարել աշխատանքը, մարզումները, մոտեցումը, այլապես հաջորդ մրցումներում հակառակ արդյունքը կստացվի: Այնպես որ որքան էլ առաջատար ես, ուժեղ ես, եթե ինչ-որ տեղ թերացար, հաջորդ մրցումներին կպատժվես: Պարտավոր ես միշտ լինել պատրաստ, մարզված, որովհետեւ բոլորն էլ ձգտում են չեմպիոններ դառնալ, բոլորն էլ մարզվում են»,- ասաց նա:

Եվրոպայի 2018 թ. առաջնությունը մեկնարկել է ապրիլի 30-ին: Կավարտվի մայիսի 6-ին: Վաղը մրցաշարում պայքարի մեջ կմտնեն Հայաստանի ազատոճայինները: