Ծնողներս տեղափոխվեցին դոմիկ, իրենց փոքրիկ տունը տվեցին մեզ, որ դուրսը չմնանք (տեսանյութ)

Գյումրիում բնակվող եւ ծայրահեղ ծանր վիճակում հայտնված Խուրշուդյանների ընտանիքն օգնության խնդրանքով դիմել է ՀԺ-ին: Ընտանիքում ձախորդությունները հաջորդել են իրար եւ նրանք հայտնվել են անելանելի վիճակում: Խուրշուդյան ամուսիններն ունեն երկու անչափահաս դուստր, ավագ դուստրը՝ 15-ամյա Ժենյան, ծանր հիվանդ է եւ մինչև չափահաս դառնալը պիտի պարտադիր բժիշկների հսկողության տակ գտնվի:

Լուսանկարում՝ 15-ամյա Ժենյան

Ամուսնության 4-րդ տարում մեծ դժվարություններից հետո ծնված աղջիկը, լույս աշխարհ է եկել սրտի արատով: Տարիներ առաջ երեխայի վիրահատության եւ բուժման համար ընտանիքը վարկ է վերցրել, որը մինչ օրս չի մարվել, փոխարենը կրկնապատկվել եւ եռապատկվել է: Դրան է գումարվել մեկ այլ անհաջողություն. Աննայի ամուսինը՝ Գագիկը Խուրշուդյանը, աշխատավայրում վնասվածք է ստացել՝ կորցնելով ձախ աչքի տեսողությունը:

Խուրշուդյանների 11-ամյա դուստրը

Նախ, դստեր վիրահատությունն ու հաջորդող պարտադիր բուժումները, ապա ամուսնու վիրահատությունը Աննա Խուրշուդյանի ընտանիքին հասցրել է ծայրահեղ աղքատության եւ անելանելիության եզրին: Երիտասարդ ընտանիքը չունի տուն, ապրում է Աննայի ծնողների տանը. «Ծնողներս տեսան, որ սարսափելի վիճակում ենք, իրենք տեղափոխվեցին դոմիկ, իրենց փոքրիկ տունը տվեցին մեզ, որ դուրսը չմնանք»,- մեր զրույցում պատմեց Աննա Խուրշուդյանը:

Այսօր նրանք տարբեր բանկերում ունեն վարկային պարտքեր, վերցրել են՝ մեկը մյուսով փակելու համար, սակայն չեն կարողացել փակել չնչին աշխատավարձի պատճառով: Աննայի ամուսինն աշխատում է պահակ՝ չնչին աշխատավարձով, իսկ ինքը դպրոցում գործավարուհի է եւ ստանում է 55 հազար դրամ:

Աջակցության համար բազմիցս դիմել են իշխանության համապատասխան մարմիններին, գրեթե բոլոր հիմնադրամներին եւ ոչ մի արձագանք չեն ստացել: Առողջապահության նախարարությունից խնդրել են արտերկրում դստեր բուժման հարցը հոգալ, կրկին արձագանք չեն ստացել, փոխարենը օր-օրի պարտքերն ավելացել ու կուտակվել են:

Երկու անչափահասներ, հաշմանդամություն ունեցող դուստր եւ մոտ երեք միլիոն ՀՀ դրամ պարտք՝ տարբեր բանկերում: «Արեգակ ունիվերսալ վարկային կազմակերպություն», «Ֆինկա», varks. am, «Արդշինբանկ», «Ինեկոբանկ» եւ «Ամերիա» բանկերից տարբեր չափի գումարներ են վերցրել, որն էլ ժամանակին չմարելու հետևանքով ավելացել է, սոցիալապես անապահով ընտանիքի համար հսկայական գումար կազմել:

Տեսանյութ՝