Դատաիրավական համակարգում ոչինչ չի փոխվել, ինձ կեղեքում են. բաց նամակ իրավապահ մարմիններին

Լուսանկարի երկրորդ շարքում՝ ձախից առաջինը Հայկանուշ Գրիգորյան

Քաղաքացի Հայկանուշ Գրիգորյանն արդեն երկրորդ անգամն է բաց նամակով խնդրում իրեն աջակցել: Այս անգամ նա դիմում է իրավապահ մարմիններին՝ Արտակ Զեյնալյանին, Վալերի Օսիպյանին, Արթուր Վանեցյանին, Արթուր Դավթյանին եւ Դավիթ Սանասարյանին:

Հայկանուշ Գրիգորյանը հայտնում է, որ Մալաթիա-Սեբաստիա վարչական շրջանների ընդհանուր իրավասության դատարանի դատավոր Լիլիթ Կատվալյանի եւ սնանկության կառավարիչ Խաչիկ Նազարյանի կողմից կատարվում է հանցագործություն եւ որ վերջիններս ապօրինաբար կեղեքում են իրեն: Հայտարարում է, որ ոչ մի իրավապահ մարմին իրեն չի աջակցում, թողել են, որ վերջնականապես թալանեն ու փողոց գցեն:

Ստորեւ հրապարակում ենք Հայկանուշ Գրիգորյանի բաց նամակն առանց խմբագրման.

«ՀՀ արդարադատության նախարար Արտակ Զեյնալյանին

ՀՀ ոստիկանապետ Վալերի Օսիպյանին

ՀՀ ԱԱԾ տնօրեն Արթուր Վանեցյանին

ՀՀ դատախազ Արթուր Դավթյանին

 ՀՀ պետական վերահսկողական ծառայության պետ Դավիթ Սանասարյանին

                                                  ՀԱՂՈՐԴՈՒՄ

Հայտնում եմ Ձեզ, որ Մալաթիա-Սեբաստիա վարչական շրջանների ընդհանուր իրավասության դատարանի դատավոր Լիլիթ Կատվալյանի եւ սնանկության կառավարիչ Խաչիկ Նազարյանի կողմից կատարվում է հանցագործություն՝ կեղծ, շինծու, անօրինական ճանապարհով թալանում են ինձ:

21․09․15թ․-ին Ռաֆայել Մկրտումյանն իր պարտքը զիջել է ոմն Ադրինե Գեղամի Մովսիսյանին։ Վերջինս 22․09․15թ․-ին հայցադիմում է ներկայացրել դատարան եւ դատավոր Լիլիթ Կատվալյանը 25․09․15թ․-ին /այսինքն՝ 3 օր հետո/ որոշում է կայացրել /քաղ.գործ ԵՄԴ/0070/04/14/ եւ ինձ չեն ծանուցել նիստի, օրվա, ժամի եւ վայրի մասին: Դիտավորյալ ինձ չեն հրավիրել նիստին, սակայն որոշման մեջ գրված է, որ պատշաճ ծանուցվել եմ: Պատշաճ կլիներ այն դեպքում, երբ Լիլիթ Կատվալյանը ուղարկեր ծանուցում, ինձ չհայտնաբերելու դեպքում հայտնած լիներ շենքի լիազորին, համայնքատիրությանը, թաղային ոստիկանին եւ ունենար համապատասխան գրություն՝ ինձ չհայտնաբերելու վերաբերյալ:

Հետեւաբար՝ հայտնում եմ Ձեզ, որ Լ.Կատվալյանը եւ սնանկության կառավարիչ Խաչիկ Նազարյանը, առանց իմ մասնակցության, կատարել են դատական նիստ եւ պարտատեր ճանաչել ոմն Ադրինե Մովսիսյանին, որի հովանավորները (նախկին ՊՊԾ պետ Ռոմիկ Մկրտումյանը) «գողական ռազբորկայի» արդյունքում պարտքի զիջում են կատարել: Այսինքն 55 հազար 780 ԱՄՆ դոլար գումարի պահանջը գրանցել, որպես չապահոված հերթի պահանջ:

Իմ բացակայությամբ, առանց ինձ տեղեկացնելու, Խաչիկ Նազարյանը, իմ փոխարեն, ընդունել է 55.780 ԱՄՆ դոլարի պարտքը եւ չի առարկել (առանց ճշտելու ես այդ գումարը պարտք եմ, թե ոչ):

Խաչիկ Նազարյանը՝ դատավոր Լիլիթ Կատվալյանի օգնությամբ, թալանում է իմ ունեցվածքը: Եթե կատարվեր արդար դատավարություն, ապա կպարզվեր, թե Ադրինե Մովսիսյանի պարտքի զիջումը որտեղից է առաջացել եւ կբացահայտվեր հանցավոր խումբը:

 Խաչիկ Նազարյանի եւ Լիլիթ Կատվալյանի անօրինական գործունեության պատճառով ես 55 հազար 780 ԱՄՆ դոլարի վնաս եմ կրել, որից հետո իմ միակ բնակարանը՝ 20.000.000 (քսան միլիոն) դրամ շուկայական արժողությամբ, վաճառել են 9.071.163 դրամով: Խնդրում եմ Ձեր ուշադրությունը դարձնել պարտքի զիջման ամսաթվի, հայցադիմումի ամսաթվի եւ դատավոր Լիլիթ Կատվալյանի որոշման ամսաթվի վրա։ 3 օրվա ընթացքում կեղծ, շինծու որոշմամբ 55 հազար 780 ԱՄՆ դոլար պարտք են գրանցել ինձ վրա եւ հետագայում աճուրդով վաճառել են իմ միակ բնակարանը, որպիսի վճարեն այդ շինծու պարտքը։ Խնդրում եմ կանխել իմ ունեցվածքը կեղեքողներին: Հեղափոխություն է եղել, սակայն դատաիրավական համակարգում փոփոխություններ չեն եղել, Արման Մկրտումյանի ճտերը դեռ տեղում են եւ շարունակում են իրենց գործելաոճը: 

                                                                 Հարգանքներով՝ Հայկանուշ Գրիգորյան»