Կոռուպցիան՝ EURONEST-ում․ Մոգերինիի գրասենյակը պատասխանել է Աշոտյանին

Կոռուպցիայի կանխարգելումն ու դրա դեմ պայքարը հանդիսանում են Տնտեսական կառավարման հետ կապված Եվրոպական Սեմեստրային ցիկլի հիմնական տարրը, ինչը եւ հանդիսանում է ԵՄ եւ իր անդամ-պետությունների միջեւ տնտեսական քաղաքականության շուրջ հիմնական երկխոսությունը:

Այս մասին ՀՀ ԱԺ արտաքին հարաբերությունների մշտական հանձնաժողովի նախագահ Արմեն Աշոտյանի հարցմանը պատասխանել է ԵՄ գերագույն հանձնակատար Ֆեդերիկա Մոգերինիի գրասենյակը:

«Որպես Արեւելյան գործընկերության EURONEST խորհրդարանական վեհաժողովում հայկական պատվիրակության ղեկավար, հուլիսի 9-ին գրավոր դիմել եմ Արտաքին գործողությունների եվրոպական ծառայություն (EUROPEAN EXTERNAL ACTION SERVCE) միջազգային եւ եվրոպական ինստիտուտներում քաղաքական կոռուպցիայի դրսեւորումների եւ դրա դեմ պայքարի առնչությամբ»,- ասված է Արմեն Աշոտյանի ֆեյսբուքյան գրառման մեջ:

«Ինչպես գիտենք, քաղաքական կոռուպցիան լայնորեն տարածվում է բազմաթիվ ինստիտուտներում, եւ այս կապակցությամբ վերջին բացահայտումները եւս վկայությունն են առ այս՝ ամրագրված լինելով անգամ մի շարք հայտնի բանաձեւերում: Այս համատեքստում Եվրոպական խորհուրդը եւ Եվրոպական հանձնաժողովն ինչպիսի առաջնահերթություններ են սահմանել»,- հարց է ուղղել Աշոտյանը եւ ստացել հետեւյալ պատասխանը․

«Շնորհակալություն գրավոր հարցի համար՝ կապված քաղաքական կոռուպցիայի համատեքստում ԵՄ առաջնահերթությունների հետ: ԵՄ հակակոռուպցիոն ջանքերը կենտրոնացած են հետեւյալ հիմնական սկզբունքների վրա. ԵՄ հորիզոնական եւ սեկտորալ հակակոռուպցիոն օրենսդրության եւ քաղաքականության ակտիվացում, ԵՄ անդամ-պետություններում հակակոռուպցիոն գործունեության հետ կապված մոնիտորինգի իրականացում, ազգային մակարդակում հակակոռուպցիոն միջոցների իրականացմանն ուղղված աջակցություն՝ ֆինանսավորման, տեխնիկական օժանդակության եւ փորձի փոխանակման միջոցով, հակակոռուպցիոն քաղաքականության համար ապացույցների քանակական բազայի բարելավում:

ԵՄ գործունեության մասին պայմանագրի 83-րդ հոդվածը կոռուպցիան սահմանում է որպես «եվրո հանցագործություն»`թվարկելով այն առավել ծանր հանցագործությունների ցանկում, որն ունի անդրսահմանային չափումներ եւ որի սահմանման համար կարող են նշվել քրեական հանցագործությունների եւ սանկցիաների նվազագույն կանոններ: Վերջին տարիներին ԵՄ-ն ձեռնարկել է մի շարք միջոցառումներ՝ կոռուպցիայի դեմ պայքարի ակտիվացման համար, այդ թվում նաեւ այնպիսիք, որոնք ուղղված են ԵՄ ֆինանսական հետաքրքրությունների պաշտպանությանը խաբեություններից եւ կոռուպցիայից՝ ուժեղացնելով ադմինիստրատիվ եւ քրեական ընթացակարգերը, հիմնելով նաեւ Եվրոպական հանրային դատախազությունը: Նախաձեռնվել է նոր օրենսդրություն, որը նպատակ ունի ապահովել սառեցումները եւ կոնֆիսկացիոն օրդերների կատարումը, փողերի լվացման քրեականացումը, ԵՄ սահմաններից դուրս կանխիկ գումարների վերահսկողությունը, ինչպես նաեւ փողերի լվացման դեմ օրենսդրության ուժեղացումը:

Վերջերս, ԵՄ-ն առաջարկել է դիրեկտիվ, որը կնպաստի օրինապահ մարմինների հասանելիությանը բանկային հաշիվների տեղեկատվությանը, ինչպես նաեւ օրինապահ մարմինների, ֆինանսական հետախուզության ստորաբաժանումների միջեւ տեղեկատվության փոխանակմանը՝ նպատակ ունենալով հայտնաբերել, հետաքննել որոշակի քրեական հանցագործություններ: ԵՄ-ն վերջերս նաեւ առաջարկել է դիրեկտիվ՝ տեղեկատվություն փոխանցող անձանց պաշտպանության հետ կապված:

Ի լրումն, կոռուպցիայի կանխարգելումն ու դրա դեմ պայքարը հանդիսանում են Տնտեսական կառավարման հետ կապված Եվրոպական Սեմեստրային ցիկլի հիմնական տարրը, ինչը եւ հանդիսանում է ԵՄ եւ իր անդամ-պետությունների միջեւ տնտեսական քաղաքականության շուրջ հիմնական երկխոսությունը: Օրինակները ներառում են ԵՄ անդամ-պետությունների արված առաջարկները, որոնք նպատակ ունեն հաղթահարել ոչ արդյունավետ հանրային գանձումները, ուժեղացնել կանոնները՝ կանխարգելելու շահերի բախումները, վերանայելու կոռուպցիոն իրավախախտումների սահմանափակման օրենքները կամ էլ լուծելու առողջապահության ոլորտում ոչ ֆորմալ վճարումներին վերաբերող հարցերը»,- ասված է Մոգերինիի պատասխանում: