Մեր կյանքի ժամանակից է գնում. Զինված խմբի գործով նիստն անցավ լարված մթնոլորտում

ԱԱԾ-ի կողմից մեծ աղմուկով վնասազերծված զինված խմբի գործով դատական նիստն այսօր մեկնարկեց լարված մթնոլորտում: Պատճառն այն է, որ ամբաստանյալների պաշտպաններն ու դատավորը մի քանի րոպե համաձայնության չէին գալիս դատական նիստը շարունակելու կամ հետաձգելու հարցի շուրջ:

Այս գործով դատական նիստերն արդեն տեւական ժամանակ տեղի չէին ունենում: «Եթե նիստերի դահլիճի դուռը բացվի՝ երջանկություն է»,- կատակում էին պաշտպանները: Վերջիններս անցած շաբաթ ասուլիս էին հրավիրել եւ նիստերի հետաձգման մեջ մեղադրել դատավոր Արմեն Բեկթաշյանին: Վերջինս, սակայն այսօրվա նիստում անդրադարձավ իրեն հասցեագրված մեղադրանքներին:

«Դատարանը բյուլետենի մեջ նիստ է սկսել, դուք տեղյա՞կ եք դրանից»,- դիմելով դժգոհող պաշտպաններին՝ վրդովված հայտարարեց Արմեն Բեկթաշյանը:

Նիստը բացելուն պես դատավորը դատավարության մասնակիցներին տեղեկացրեց, որ դատարանը գրություն է ստացել հանրային պաշտպան Թամարա Բաղդասարյանից, որը տեղեկացրել է, որ մեկ ամիս գործուղման մեջ է գտնվելու եւ չի կարող ներկայանալ դատական նիստերին: Նա նաեւ խնդրել էր՝ առանց իր մասնակցության դատական նիստ չանցկացնել:

Դիմումի հրապարակումից հետո գործով ամբաստանյալներ Արա Պողոսյանն ու Գեւորգ Ջնդոյանը հայտարարեցին, որ հրաժարվում են իրենց պաշտպան Թամարա Բաղդասարյանից: «Արդեն երկու ամիս է՝ ամեն մեկն իր գործով է զբաղված, բայց մեր կյանքի ժամանակից է գնում, ընդ որում՝ անազատության մեջ եւ անհայտ ժամկետով, էստեղ կոնկրետ իմ իրավունքն է ոտնահարվում եւ դրանից ելնելով՝ ես կարող եմ իմ իրավունքները միայնակ պաշտպանել դատարանում՝ առանց հանրային պաշտպանի»,-հայտարարեց Գեւորգ Ջնդոյանը: Նույնը պնդեց նաեւ Արա Պողոսյանը: Դատավոր Բեկթաշյանն էլ ի պատասխան ասաց, որ պաշտպանից կարող են հրաժարվել միայն պաշտպանի ներկայությամբ:

Մի քանի փաստաբաններ պատրաստակամություն հայտնեցին պաշտպանել Արա Պողոսյանի եւ Գեւորգ Ջնդոյանի շահերը: Մասնավորապես՝ Ինեսա Պետրոսյանն ասաց, որ այստեղ ավելի կարեւոր է մարդու բարձրագույն արժեքը, եւ եթե ամբաստանյալները հրաժարվում են իրենց պաշտպաններից, դատարանը կարող է ընդունել այդ հրաժարումը եւ դատական նիստը շարունակել, որպեսզի անհարկի ձգձգումներ տեղի չունենան: «Օրենքի խախտումո՞վ»,- արձագանքեց Բեկթաշյանը: «Օրենքի խախտում այդտեղ չկա, որովհետեւ անձը հայտարարում է, որ հրաժարվում է իր պաշտպանյալից: Այստեղ իրենց իրավունքը գերակա է այլ իրավունքներից»,- պատասխանեց Պետրոսյանը: Պաշտպան Լեւոն Բաղդասարյանն էլ, համակարծիք լինելով Ինեսա Պետրոսյանի հետ, նշեց, որ գործը պետք է քննվի ողջամիտ ժամկետում: Գործով մեղադրող դատախազ Էդգար Արսենյանն էլ նկատեց, որ ամբաստանյալների շահերը պաշտպանում է նաեւ հանրային պաշտպան Արմինե Ֆանյանը, ուստի՝ առաջարկեց ընդմիջում հայտարարել եւ ճշտել՝ նա կարո՞ղ է ներկայանալ նիստին, թե՞ ոչ:

Դատավոր Արմեն Բեկթաշյանը, սակայն առանց առաջարկը լսելու՝ որոշեց հետաձգել դատական նիստը: Այսպիսով՝ նիստ նշանակվեց սեպտեմբերի 14-ին:

Մեր զրույցում պաշտպան Ինեսա Պետրոսյանը կարծիք հայտնեց, որ դատարանը մտադրված է հետաձգում գործի քննությունը: «Ապրիլից մինչ օրս ընդամենը երկու դատական նիստ է տեղի ունեցել, որի ժամանակ ազատ են արձակվել առողջական լուրջ խնդիրներ ունեցող ամբաստանյալները: Դատական նիստը զանազան պատճառներով տեղի չի ունենում: Այսօր էլ տեսաք՝ ինչ տեղի ունեցավ դատական նիստին, ոտնահարվեցին ամբաստանյալների իրավունքները»,-ասաց պաշտպան Ինեսա Պետրոսյանը՝ հավելելով, որ դատական նիստի վերաբերյալ ինքը եւ մի շարք այլ պաշտպաններ ծանուցումներ չեն ստացել: «Ակնհայտ է, որ դատարանը չէր եկել դատական նիստ անցկացնել, ուղղակի նա բացեց դատական նիստը հետաձգելու համար, որպեսզի մի հատ գալոչկա դնի, դա, իմ կարծիքով, պլանավորված գործողություն էր: Երբ երկրում հեղափոխություն տեղի ունեցավ, երեւի դատավոր Բեկթաշյանի համար արդեն ակնհայտ պարզ է, որ նախորդ իշխանությունների պատվերն արդեն ինքը որեւէ կերպ չի կարող իրականություն դարձնել եւ իր համար շատ ծանր է, դրա համար երեւի ամեն կերպ փորձում է դատական նիստերը ձախողել»,- հավելեց Պետրոսյանը:

Նշենք, որ այսօրվա նիստում պաշտպանական կողմը պատրաստվում էր ամբաստանյալների խափանման միջոց կալանավորումը փոխելու վերաբերյալ միջնորդություն ներկայացնել: Այս միջնորդությունը նրանք փորձում են ներկայացնել արդեն մի քանի ամիս:

Հիշեցնենք, որ, ըստ մեղադրանքի՝ Արթուր Վարդանյանի գլխավորած՝ 2015 թվականին Նորք-Մարաշում վնասազերծված 20 հոգանոց զինված խումբը ծրագրել է բռնությամբ զավթել իշխանությունը: Մասնավորապես, թռիչքի պահին խոցել նախագահի օդանավը, հարձակում գործել ՀՀ նախագահի նստավայրի, Ազգային ժողովի, Սահմանադրական դատարանի, Կառավարության, Հանրային հեռուստաընկերության եւ այլ հաստատությունների շենքերի վրա:

Սույն թվականի հունիսին դատարանը փոխել էր այս գործով մի քանի ամբաստանյալների, այդ թվում՝ պաշտպանության նախկին փոխնախարար Վահան Շիրխանյանի խափանման միջոց կալանավորումը: Նա ազատ էր արձակվել պատգամավորների անձնական երաշխավորությամբ:

Տպել
2239 դիտում

Վանաձոր-Ալավերդի-Բագրատաշեն ճանապարհը բեռնատարների և ավտոբուսների համար փակ է

Ամբողջական ու միացյալ Հայաստանի տեսլականի իրագործումն Արցախի միացումն է Հայաստանին. Արամ Ա

Սյունիքում մեքենան մոտ 50 մետրից ընկել է ձորակը․ կա մեկ զոհ, երկու վիրավոր

Դպրոցի տնօրենի 17-ամյա որդին հոր մեքենայով վթարի է ենթարկվել․ 3 դպրոցականներ հիվանդանոցում են

Ըմբիշ Արթուր Ալեքսանյանը ոսկե մեդալ է նվաճել Ղազախստանի միջազգային մրցաշարում

Ջիվան Աբրահամյանն ազատ է արձակվել

Անակնկալ Հայաստանի համար. եկան, կարդացին, գնացին

Քաղաքական լեզվամարտ. ճշմարտությունը միայն կոնյակն էր

Էս ո՞վ է. նա մի տղա էր՝ միշտ տխուր աչքերով

Պատրաստ ենք խորացնել փոխշահավետ գործակցությունը. Վվարչապետն ընդունել է Չինաստանի ԱԳ նախարարին

Հայաստանի և Չինաստանի ԱԳ նախարարները Երևանում ստորագրել են մի շարք փաստաթղթեր

ՀՀ մի մասում տեղումները կշարունակվեն առաջիկա օրերին. սպասվում է անձրեւ,տեղ-տեղ՝ կարկուտ

Հրդեհ Լուսառատ գյուղի պահեստի տարիքում. այրվել է շինությունը, անասնակեր ու վառելափայտ

Ըստ Թուրքիայի սահմանադրական դատարանի՝ Հայոց պատրիարքի ընտրություններում խախտվել է կրոնի ազատությունը

Ազատության հրապարակի ակցիայի հետ մենք կապ չունենք՝ ոչ ուղղակի, ոչ անուղղակի. «Իմ քայլը» դաշինք

ՌԴ Հարավային ռազմական շրջանը ստեղծել է զինվորների ջերմահարումից պաշտպանելու համար նախատեսված 50 կետ

«Մայր Հայաստան» թանգարանում տարածք կհատկացվի ապրիլյան պատերազմի բոլոր զոհերի հիշատակի անկյուն ստեղծելու համար

Զոհրաբ Մնացականյանը հանդիպել է չինացի գործընկերոջ հետ

Հանրահավաքի ընթացքում սպառնալիքներ հնչեցնելու կասկածանքով բերման է ենթարկվել Ջիվան Աբրահամյանը

Վանաձոր-Դիլիջան ճանապարհին մինչև հիմնանորոգումը սկսելը կատարվում են ժամանակավոր անցանելիության համար աշխատանքներ