Հայկական բռնցքամարտի շուրջ աղմուկը շարունակվում է. ի՞նչ է անելու նորաստեղծ ֆեդերացիան

Բռնցքամարտի նորաստեղծ հայկական ազգային ֆեդերացիան դեռ չի պատրաստվում դիմել ԱԻԲԱ (բռնցքամարտի միջազգային միություն) պաշտոնապես ճանաչվելու համար: Այս մասին այսօր՝ սեպտեմբերի 28-ին, «Հայկական ժամանակ»-ի հետ զրույցում ասաց նորաստեղծ ֆեդերացիայի հիմնադիր-անդամ, ՀՀ սպորտի եւ երիտասարդության հարցերի նախարարի խորհրդական Արման Հարությունյանը: Այսօր նա եւ նորաստեղծ ֆեդերացիայի մի շարք անդամներ, որոնք դժգոհ են ՀՀ բռնցքամարտի ֆեդերացիայի նախագահ Արթուր Գեւորգյանից, մամուլի ասուլիս էին հրավիրել: Ցանկանում էին պարզաբանումներ տալ, սակայն ասուլիսը տապալվեց, քանի որ եկան Գեւորգյանի մի շարք աջակիցներ ու բարձրաձայնեցին իրենց դժգոհությունները: Դրանից հետո Հարությունյանը ՀԺ-ին ասաց՝ ինչու առայժմ չեն դիմելու ԱԻԲԱ:

«Մենք դեռ չենք շտապում դիմել ԱԻԲԱ: Մենք պետք է գործունեություններ ծավալենք: Նախ՝ պետք է շատ թվով անդամներ ներգրավենք մեր ֆեդերացիա: Երբ վստահ կլինենք, որ մեծ քանակով մարդիկ մեր ֆեդերացիայում են հայտնվել, ըստ այդմ կդիմենք ԱԻԲԱ, կասենք այսպես-այսպես, խնդրում ենք վերանայել, մեր ֆեդերացիային ճանաչում տալ»,- ասաց նա՝ ավելացնելով, որ արդեն 150 անդամ ունեն՝ մարզիկներ, մարզիչներ, վետերան բռնցքամարտիկներ:

Նա նշեց, որ նոր ֆեդերացիա հիմնելու որոշում են կայացրել, քանի որ օգոստոսի 2-ին կայացած նախագահի ընտրություններում, որում Գևորգյանը վերընտրվել է, խախտումներ են եղել: Ըստ նրա՝ ընտրությունների անցկացման ժամկետների մասին պատշաճ չի տեղեկացվել. հուլիսի սկզբին կայացած ժողովից հետո իրենք իմացել են, որ ընտրությունները 1 ամսով հետաձգվել են, սակայն կոնկրետ օրը չեն իմացել, այդ պատճառով էլ առաջադրվելու ցանկություն ունեցող Հովհաննես Հովսեփյան անունով երիտասարդը չի կարողացել մասնակցել:

Բացի այդ՝ Հարությունյանի խոսքով՝ ընտրությունների մասնակիցներին անվանական հրավեր են ուղարկել, ինչը չի թույլատրվում: Ըստ նրա՝ միայն պետք է ուղարկեին, օրինակ, տվյալ մարզադպրոցից ընտրություններին մասնակցելու իրավունք ունեցողների քանակը, ոչ թե անունները: Անկախ այս դժգոհություններից՝ Գեւորգյանի դեմ բողոքող կողմը ընտրությունների արդյունքները չի բողոքարկել:

«Դե, հիմա նպատակահարմար չենք գտել»,- ասաց Արման Հարությունյանը:

Նորաստեղծ ֆեդերացիայի անդամները չեն էլ կարծում, որ հետագայում պաշտոնապես կբողոքարկեն: Նրանք ցանկանում են, որ հարցն այլ կերպ լուծվի: Հույս ունեն, որ առանց պաշտոնական բողոքարկման էլ իրավիճակը կհարթվի:

«Պաշտոնապես դժվար թե, ուրիշ ճանապարհներ կգտնենք, ընդհանուր հայտարարի կգանք»,- ասաց Հարությունյանը:

Սեպտեմբերի 26-ին ՀՀ բռնցքամարտի ֆեդերացիայի նախագահ Արթուր Գեւորգյանը ժողով էր կազմակերպել: Նա հրավիրել էր, թե իրեն աջակցողներին, եւ թե նրանց, ովքեր դժգոհություններ ունեն: Դժգոհողները, սակայն չէին ներկայացել: Հարությունյանն ասաց՝ ինչու չի գնացել:

«Ինձ զանգել էին, տեղյակ էին պահել, նպատակահարմար չեմ գտել: Անցած օրն իր հնչեցրած արտահայտությունը, որ նախարարի խորհրդականը վարել է (խմբ. նորաստեղծ կազմակերպության նիստը), լսելով եկել եմ պարզաբանելու, որ, եթե 2 ամիս է՝ նախարարի խորհրդականի պաշտոնում եմ, երկար տարիներ բռնցքամարտում եմ»,- ասաց նա:

Այն բանից հետո, ինչ Գեւորգյանը վերընտրվեց, բռնցքամարտի մի շարք ներկայացուցիչներ ոտքի կանգնեցին: Դիմեցին Հայաստանի ազգային օլիմպիական կոմիտեի նախագահ Գագիկ Ծառուկյանին, ՀՀ սպորտի եւ երիտասարդության նախարար Լեւոն Վահրադյանին:

Նախարարությունը դիմեց ԱԻԲԱ: Գեւորգյանի խոսքով՝ ԱԻԲԱ-ն դրանից հետո իրենցից ընտրությունների վերաբերյալ փաստաթղթեր է խնդրել, ուսումնասիրել է ընտրությունների ընթացքն ու կոշտ պատասխան տվել ՀԱՕԿ-ին ու նախարարությանը, եւ հենց այդ պատճառով էլ իրենից բողոքողները որոշել են նոր ֆեդերացիա ստեղծել: