Քրեական հեղինակություն Նորատուսցի Ալիկի թիկնապահը կալանավորվել է. աղմկոտ սպանության գործով նիստը չկայացավ

«Լիա» գեղեցկության սրահում տեղի ունեցած աղմկոտ սպանության գործով դատական նիստը երեկ հերթական անգամ հետաձգվեց:

Այս գործով արդեն մի քանի ամիս է՝ նիստ տեղի չի ունենում:

Այս անգամ էլ նիստի հետաձգման պատճառը սույն գործով ամբաստանյալ Բդո մականունով հայտնի Արմեն Գասպարյանի դատարան չներկայացնելն էր:

Բանն այն է, որ քրեական հեղինակություն Նորատուսցի Ալիկի թիկնապահ համարվող Բդոն մեկ այլ քրեական գործի շրջանակում կալանավորվել է: Նա մեղադրվում է Չարենցավանում ապրիլի 24-ին տեղի ունեցած սպանության փորձի մեջ: Այդ օրը Կոտայքի մարզի Արզական գյուղի բնակիչ Հովհաննես Թադևոսյանը հրազենային վնասվաքծներով տեղափոխվել էր հիվանդանոց: Գործը քննվում է Քննչական կոմիտեի Կատայքի քննչական բաժնում: Դեպքից մի քանի օր հետո, երբ նրա մասնակցության վերաբերյալ տեղեկությունը փորձել էինք ճշտել նրա պաշտպան Լուսինե Ավագյանից, վերջինս ասել էր, թե իր կարծիքով մեր տեղեկությունն իրականությանը չի համապատասխանում: Բդոն նույնպես լրագրողների հետ զրույցում հերքել էր իր առնչությունը հնչած կրակոցներին եւ առհասարակ միջադեպին:

Երեկ նշանակված էր «Լիա» գեղեցկության սրահում տեղի ունեցած սպանության գործով դատական նիստ, որով Գասպարյանի նկատմամբ ազատազրկման հետ կապ չունեցող խափանման միջոց էր ի սկզբանե ընտրված, սակայն, հաշվի առնելով, որ նա մեկ այլ քրեական գործով կալանավորված է, այսուհետ դատարան պետք է ներկայացվի քրեակատարողական այն հիմնարկից, որտեղ պահվում է՝ ոստիկանության ուղեկցող գումարտակի կողմից:

Գասպարյանը, սակայն, չէր բերվել դատարան, դատարանի կողմից նման պահանջ չէր ներկայացվել: Դատավոր Նելլի Բաղդասարյանը հայտնեց, որ Գասպարյանի կալանավորման վերաբերյալ պաշտոնական տեղեկություններ չունի, դատարանի աշխատակազմը փորձել է կապ հաստատել նրա պաշտպան Լուսինե Ավագյանի հետ, սակայն չի ստացվել, նրա հեռախոսահամարն անջատված է եղել: Բաղդասարյանը նշեց, որ մինչեւ առաջիկա նիստը կփորձի ապահովել Արմեն Գասպարյանի ներկայությունը:

Երեկվա նիստին դատարան էին ներկայացվել գործով մյուս ամբաստանյալները՝ քրեական հեղինակություն Նորատուսցի Ալիկ Բանդուրյանը եւ «Չարբախցի Գեղամ» մականունով հայտնի Պետրոս Իսրայելյանը: Նրա պաշտպան Միհրան Պողոսյանը դատարանին խնդրեց առաջիկա դատական նիստը նշանակել սեղմ ժամկետում, քանի որ անհետաձգելի միջնորդություն ունի ներկայացնելու:

Դատական նիստի ավարտին Պողոսյանը մի քանի լրագրողների հետ զրույցում նշեց, որ խոսքը իր պաշտպանյալ Պետրոս Իսրայելյանի խափանման միջոց կալանքը փոխելու վերաբերյալ միջնորդության մասին է: Նման միջնորդություն Պողոսյանը ներկայացնում է առաջին անգամ, առողջական վիճակի հիմքով միջնորդություններ են ներկայացվել Ալիկ Բանդուրյանի պաշտպան Երեմ Սարգսյանի կողմից, որոնք, սակայն, մերժվել են: Նման պայմաններում Միհրան Պողոսյանն անիմաստ է համարել Իսրայելյանի խափանման միջոց կալանքը փոխելու վերաբերյալ միջնորդություն ներկայացնելը:

Պողոսյանն ավելի վաղ մեր զրույցում բարձարաձայնել էր, որ Իսրայելյանը լուրջ առողջական խնդիրներ ունի: Նա դիմում էր ուղարկել քրեակատարողական հիմնարկ՝ պահանջելով, որ Իրայելյանը բուժման համար տեղափոխվի քաղաքացիական բժշկական կենտրոն կամ Դատապարտյալների հիվանդանոց, սակայն այս պահին Իսրայելյանը շարունակում է գտնվել «Նուբարաշեն» քրեակատարողական հիմնարկում:

«Մեզ պատասխանել են, որ Պետրոս Իսրայելյանի հետ իրականացվում են որոշակի բժշկական միջամտություններ, բայց այդ իրականացվող միջամտությունները այն միջամտությունները չեն, որոնք նախատեսված է բժշկի դուրս գրման ուղեգրում: Կոնկրետ բուժում պետք է իրականացվի, որը չի լինում, որովհետեւ «Նուբարաշեն» ՔԿՀ-ում նման հնարավորություն չկա»,-հավելեց նա: Պաշտպանը նմանատիպ դիմում ներկայացնելու է նաեւ Արդարադատության նախարարություն:

Նշենք, որ Նորատուսցի Ալիկի թիկնապահ Բդոյի դեմ այս պահին երեք մեղադրանք կա առաջադրված. երեքն էլ վերաբերում են տարբեր դեպքերի:

Այսպիսով՝ Արմեն Գասպարյանին մեղադրանք է առաջադրվել այն բանի համար, որ նա, հանդիսանալով Ալիկ Բանդուրյանի մտերիմը եւ մշտապես ուղեկցելով նրան, հաստատապես տեղեկացել է Ալիկ Բանդուրյանի օժանդակությամբ եւ դրդչությամբ 2016թ. նոյեմբերի 13-ին Պետրոս Իսրայելյանի, Գեւորգ Ավետիսյանի եւ քննությամբ չպարզված անձանց կողմից նախապատրաստվող ծանր հանցագործության, այն է` Պետրոս Իսրայելյանի, Գեւորգ Ավետիսյանի եւ քննությամբ չպարզված այլ անձանց կողմից խմբի կազմում դիտավորությամբ Մուշեղ Մուշեղյանի առողջությանը ծանր վնաս պատճառելու մասին, սակայն Արմեն Գասպարյանը դրսեւորել է հանցավոր անգործություն եւ նախապատրաստվող ծանր հանցագործության մասին դիտավորությամբ չի հայտնել իրավասու մարմիններին:

Երկրորդ մեղադրանքը վերաբերում է 2015 թվականին տեղի ունեցած հանցագործությանը. այս գործով դատական նիստերը դեռ շարունակվում են:

Մասնավորապես Արմեն Գասպարյանին մեղադրանք է առաջադրվել այն բանի համար, որ նա եւս երկու հոգու հետ 2015 թվականի սեպտեմբերի 18-ին իշխանության ներկայացուցչի նկատմամբ Երևան քաղաքի Շահումյան 16-րդ փողոցում գործադրել են առողջության համար վտանգավոր բռնություն` կապված ծառայողական պարտականությունները կատարելու հետ: 

Մյուս մեղադրանքը վերաբերում է այս տարի Չարենցավանում տեղի ունեցած սպանության փորձին: Նա այժմ մեղադրվում է սպանության փորձի եւ ապօրինի կերպով զենք-զինամթերք ձեռք բերելու մեջ: Բդոն այս մեղադրանքով կալանավորվել է օրեր առաջ: