Սեւակ Միքայելյանի քարոզարշավին աշակերտների մասնակցության մասին ձայնագրությունն ուղարկվել է Կոտայքի դատախազություն

«Իրազեկ քաղաքացիների միավորման» «Փաստերի ստուգման հարթակի» հրապարակած ձայնագրությունը, ըստ որի Հրազդանի դպրոցներից մեկի տնօրենն ասում է, որ Հրազդանի քաղաքապետի թեկնածու Սեւակ Միքայելյանի նախընտրական հանրահավաքին պատրաստ է մոտ 100 մարդու ներկայություն ապահովել, ուղարկվել է Կոտայքի դատախազություն՝ դրանում առկա հանգամանքները ստուգելու համար: Այս մասին «Հայկական ժամանակ»-ին տեղեկացրին ՀՀ գլխավոր դատախազության հանրային կապերի բաժնից:

Այսօր Հանրապետության մի շարք համայնքներում քաղաքապետի արտահերթ ընտրությունների քարոզարշավի վերջին օրն է: Արդեն հոկտեմբերի 21-ին կկայանան ընտրությունները: Կարող ենք ասել, որ քարոզարշավը բավական ակտիվ էր ընթանում բոլոր քաղաքներում, սակայն վերջին շրջանում թեկնածուներից ամենաքնարկվածը Հրազդանի քաղաքապետի թեկնածու Սեւակ Միքայելյանն է՝ ՔՊ վարչության նախագահ, պատգամավոր Սասուն Միքայելյանի որդին: Քննարկումները հիմանակնում ծավալվում են Միքայելյանի քարոզարշավի ընթացքում եղած խախտումների եւ վարչական ռեսուրսների չարաշահման շուրջ: Մասնավորապես երեկ «Իրազեկ քաղաքացիների միավորման» «Փաստերի ստուգման հարթակը» հրապարակած ձայնագրությունը բուռն քննադատությունների առիթ դարձավ:

Բացի այս ձայնագրությունը՝ ըստ մամուլում տարածված տեղեկությունների՝ Սեւակ Միքայելյանն իր քարոզարշավի ընթացքում խախտել է Ընտրական օրենսգրքի մի շարք կետեր:

Նախ՝ Միքայելյանի նախընտրական քարոզչական պաստառներից փակցվել են նաեւ հասարակական տրանսպորտային միջոցների վրա, ինչն արգելվում է ՀՀ ԸՕ հոդված 21-ի երկրորդ կետի երկրորդ մասի համաձայն:

Հաջորդը՝ Սեւակ Միքայլեյանի նախընտրական շտաբներից մեկը տեղակայված է եղել համայնքապատկան շինության ներսում՝ Ջրառատի թիվ 6 համայնքային գրադարանում, իսկ գրադարանի մուտքի մոտ փակցված է եղել «Սեւակ Միքայելյանի նախընտրական շտաբ» գրությամբ ցուցանակ: Սա եւս արգելվում է ՀՀ Ընտրական օրենսգրքով:

«Հայկական ժամանակ»-ը ՀՀ Կենտրոնական ընտրական հանձնաժողովի նախագահ Տիգրան Մուկուչյանից տեղեկացավ, որ երեկ նախընտրական քարոզարշավի ընթացքում եղած խախտումների վերաբերյալ տեղեկությունները ստանալուց անմիջապես հետո տեղական ընտրական հանձնաժողովը կատարել է շրջայց: Շրջայցի արդյունքում հայտնաբերվել է նշված երթուղին, որի վրա փակցված են եղել Սեւակ Միքայելյանի քարոզչական պաստառները: Դրանք անմիջապես վերացվել են.

«Ամբողջական շրջայցի ընթացքում հայտնաբերվել են նաեւ ոչ թույլատրելի վայրում, օրենքի խախտումով փակցված այլ պաստառներ, որոնք պատկանել են երկու թեկնածուներին էլ: Այդ պաստառները եւս վերացվել են»,-ասաց Մուկուչյանը:

Ըստ Ընտրական օրենսգրքի՝ ընտրական հանձնաժողովները հսկում են նախընտրական քարոզչության սահմանված կարգի պահպանումը։ Թեկնածուների կողմից այդ կարգի խախտման դեպքում ընտրական հանձնաժողովը դիմում է իրավասու մարմիններ՝ դրանք կանխելու նպատակով կամ կիրառում նախազգուշացում խախտում թույլ տված թեկնածուի նկատմամբ` տալով խախտումը վերացնելու համար ողջամիտ ժամկետ, որը չի կարող գերազանցել 3 օրը։ Ըստ այդմ, ինչպես մեր զրույցում հայտնեց ԿԸՀ նախագահը, խախտումներն անմիջապես վերացվել են եւ դրա մասին տեղեկացվել է կենտրոնական ընտրական հանձնաժողովին:

Ինչ վերաբերում է Սեւակ Միքայելյանի՝ գրադարանի շենքում տեղակայված շտաբին՝ ԿԸՀ նախագահն ասաց, որ տեղական ընտրական հանձնաժողովի պահանջով գրադարանի շենքի մուտքից հեռացվել է նախընտրական ցուցանակը. «Բացի այդ՝ թեկնածուներին մեկ անգամ եւս պարզաբանվել են օրենքի պահանջները, որպեսզի բոլոր կանոնները պահպանվեն: Այսօր եւս նախատեսվում են նման շրջայցներ, եւ խախտումները անմիջապես կվերացվեն»,-մեր զրույցում ասաց Տիգրան Մուկուչյանը՝ հավելելով, որ տեղական ընտրական հանձնաժողովը եւս ուսումնասիրում է վերոնշյալ ձայնագրությունը, եւ խախտումներ հայտնաբերելու դեպքում անմիջապես վարույթ կիրականացվի: