Հրապարակումը վնասում է ընկերության գործարար համբավին, պատրաստ ենք տալ բաժանորդային աջակցություն. ՎիվաՍել-ՄՏՍ

«Հայկական ժամանակ»-ն այսօր գրել էր, որ արդեն երկար ժամանակ է՝ բազմաթիվ քաղաքացիներ են ահազանգում, բողոքում վերջին շրջանում ՎիվաՍել-ՄՏՍ-ի կողմից տրամադրվող ինտերնետ կապի ծառայությունների որակից, մասնավորապես՝ «BIT1» ինտերնետ ծառայությունից:

Հրապարակմանն ի պատասխան, պարզաբանում է ներկայացրել ՎիվաՍել-ՄՏՍ-ը, որը ներկայացնում ենք ստորեւ.

«Հայկական ժամանակ» օրաթերթի հարգելի խմբագրություն 

Սույնով ցանկանում ենք պարզաբանում ներկայացնել օրաթերթի առցանց տարբերակում տեղ գտած՝ «Յիրիկյանի սաղ բարեգործությունները մենք ենք անում. բողոքներ ՎիվաՍել-ՄՏՍ-ից, ինչ է առաջարկում ընկերությունը» 30.10.18 հրապարակման առնչությամբ:  

Հոդվածում հիշատակվող բաժանորդի՝ Վահե Բաբուչիևի վերաբերյալ տվյալներ «Հայկական ժամանակ»-ը ՎիվաՍել-ՄՏՍ ընկերությանը չի ներկայացրել՝ այն բաժանորդների շարքում, որոնց մասին ընկերությունը տեղեկացվել էր լրագրողի կողմից: Ընկերության աշխատակիցը կապվել էր բաժանորդների հետ ու մանրամասն ներկայացրել BIT ծառայությունից նրանց օգտվելու հետ կապված մանրամասները։ Նշված բաժանորդներին ՎիվաՍել-ՄՏՍ-ի համապատասխան համակարգից SMS ծանուցումներն ուղարկվել են ժամանակին՝ ներառյալ ծառայության ավտոմատ երկարացման հնարավորության մասին, սակայն բաժանորդներն այդ հնարավորությունից չեն օգտվել։  

Բաժանորդների համաձայնությամբ՝ նրանց կողմից ծառայության օգտագործումը ուսումնասիրելուց հետո նրանց առաջարկվել է անցում կատարել «Y» սակագնային պլանի։ Ընկերության աշխատակիցը բացատրել է, որ բաժանորդների կողմից ինտերնետի այդօրինակ սպառման ծավալները կարող են բավարարվել «Y» սակագնային պլանի առաջարկած պայմաններով, այն է՝ ամենատարածված 5 մեսինջերներով շփվելու համար ինտերնետի անսահմանափակ տրամադրումով։ 

Չենք բացառում, որ Վահե Բաբուչիևը նույնպես առնչվել է հրապարակման մեջ ներկայացված խնդրին, այն է՝ սոցիալական ցանցերով հաղորդակցության առանձնահատկություններով պայմանավորված, տվյալների ներբեռման կամ վերբեռման ընթացքում, BIT ծառայության շրջանակներում տրամադրված 200 ՄԲ ինտերնետի սպառվելուն պես, ավտոմատ կերպով, մեգաբայթերը սկսել են հաշվարկվել բաժանորդի կողմից ակտիվացված սակագնային պլանով նախատեսված՝ ինտերնետի սակագներով։ Ձեր կողմից բաժանորդի վերաբերյալ տվյալներ տրամադրելու դեպքում, և վերջինիս համաձայնությամբ, այս դեպքում նույնպես, մենք պատրաստ ենք ուսումնասիրել բաժանորդի կողմից BIT ծառայության օգտագործման մանրամասները, նրան նույնպես տրամադրել անհրաժեշտ բաժանորդային աջակցություն։ Բաժանորդներին որակյալ ծառայությունների մատուցումը և նրանց գոհունակությունն առաջնահերթ կարևորություն են ներկայացնում ընկերության համար։ 

Միևնույն ժամանակ, հարկ ենք համարում նշել, որ ձեր վերոհիշյալ հրապարակումը, ներառյալ՝ վերնագիրն ու հրապարակման մեջ տեղ գտած որակումները, հանիրավի վնասում են ՎիվաՍել-ՄՏՍ-ի գործարար համբավին՝ փորձելով ՎիվաՍել-ՄՏՍ-ի սոցիալական պատասխանատվության առաքելությունը կապել կոմերցիոն գործունեության հետ, ինչը չի համապատասխանում իրականությանը։ 

Ընկերությունը մինչ օրս ավելի քան 29 միլիարդ դրամ է ներդրել Հայաստանի տարբեր ոլորտներում իրականացվող կորպորատիվ պատասխանատվության ծրագրերում, օգնելով սահնանամերձ բնակավայրերին, իրականացնելով բնակարանաշինական, առողջապահական, բնապահպանական, մշակութային, IT ոլորտի, կրթական, և այլ ծրագրեր։ 

Մեր վրդովմունքն ու տարակուսանքն ենք հայտնում առ այն, որ միտումնավոր կերպով փորձ է կատարվում բաժանորդների հետ կապված հարցերը (որոնց, ի դեպ, ՎիվաՍել-ՄՏՍ-ը պատշաճ արձագանքել է և այդ մասին խմբագրութայնը տեղեկացրել) օգտագործել ընկերության գործունեությունը վարկաբեկելու նպատակով։ 

Հիմք ընդունելով վերոհիշյալը՝ նախ խնդրում ենք տրամադրել Վահե Բաբուչիև օգտատիրոջ/բաժանորդի տվյալները, որպեսզի կապվենք նրա հետ և տրամադրենք բաժանորդային անհրաժեշտ աջակցություն, ինչպես դա արեցինք այլ բաժանորդների դեպքում, և ապա՝ հեռացնել խնդրո առարկա հրապարակումը կամ՝ հրապարակել սույն պարզաբանումը։ 

Շնորհակալություն: