ՀՀ հավաքականների մարզիչները կվերապատրաստվեն «Ռեալում» կամ «Ատլետիկոյում». Մելիքբեկյան (թարմացված)

ՀՀ ֆուտբոլի ազգային հավաքականների մարզիչները վերապատրաստում կանցնեն իսպանական թոփ ակումբներում՝ հավանաբար «Ռեալում» կամ «Ատլետիկոյում»: Այսօր՝ դեկտեմբերի 27-ին, լրագրողների հետ հանդիպման ժամանակ Հայաստանի ֆուտբոլի ֆեդերացիայի գլխավոր քարտուղար Արմեն Մելիքբեկյանը հայտարարեց, որ նրանք ամենայն հավանականությամբ Իսպանիա կմեկնեն հունվարին: Նա նշեց, որ մասնագետները նման հնարավորություն կստանան ՀՖՖ նորանշանակ տեխնիկական տնօրեն իսպանացի Խինես Մելենդեսի օգնությամբ: Մելիքբեկյանը խոսեց իսպանացի հայտնի մասնագետի հետ պայմանագիր կնքելու, ՀՖՖ նոր ղեկավարության վերջին 3 ամիսների աշխատանքի եւ առաջիկա ծրագրերի մասին:

-Մեր գլխավոր ձեռքբերումը իսպանացի մասնագետների ներգրավումն է, առաջին հերթին, իհարկե Խինես Մելենդեսի մասին է խոսքը: Նա հունվարին ժամանելու է ՀՀ, մշտական բնակություն է հաստատելու իր 2 մարզիչների հետ, որոնցից մեկը պատասխանատու է լինելու մարզչական կրթության դասընթացների, մյուսը՝ մանկապատանեկան թիմերի հետ աշխատանքների համար: Շատ մեծ հույսեր ենք կապում Մելենդեսի հետ: Նրա առաջարկած ծրագիրը բավական լայնածավալ է: Դա պահանջելու է նաեւ մեր կողմից մարդկային ռեսուրսներ, մեծ ծավալի աշխատանք: Զբաղվելու ենք ամեն ինչով, սկսելու ենք մանկապատանեկան ֆուտբոլի մրցաշարերի վերակազմակերպումը: Նաեւ մարզչական դասընթացների նոր մոտեցումներ ենք մշակելու, եւ Մելենդեսը նաեւ աշխատելու է ազգային բոլոր հավաքկանների հետ՝ 14-ից մինչեւ 21 տարեկանների եւ ընդհանուր մարզչական շտաբ է ձեւավորելու: Սովորաբար այդ մոդելը կիրառվում է Իսպանիայում, երբ յուրաքանչյուր թիմ ունի իր գլխավոր մարզիչը, բայց բոլոր մարզիչները համատեղ են աշխատում, միմյանց օգնում են, հավաքականներից մեկի մարզիչը մյուսի օգնականն է. օրինակ, 17-երի մարզիչը 19-երի օգնականն է... աշխատում են ընդհանուր ծրագրով, որը ղեկավարում է տեխնիկական տնօրենը:

Բացի դրանից՝ բավական մեծ ծավալի վերլուծություն ենք կատարել, թե ինչ կատարվում մեր ֆուտբոլային տնտեսությունում: Վերլուծությունը ել ավելի խորությամբ է ցույց տալիս խնդիրները. դա մարզերում ֆուտբոլի առկայությունն է կամ չառկայությունը, այսպես ասենք, որովհեեւ ՀՀ-ում ընդամենը 29 բնակավայր ունենք, որտեղ խաղում են կազմակերպված ֆուտբոլ: Դա շատ փոքր տոկոս է կազմում 1% կամ մի փոքր ավելի: Սա շատ վատ ցուցանիշ է: Հիմնականում ֆուտբոլը կենտրոնացած է Երեւանում: Այդ ուղղությամբ հիմա շատ ակտիվ քայլեր ենք ձեռնարկելու: Սկսելու ենք ենթակառուցվածքներ ստեղծել մասսայական ֆուտբոլի համար: Արդեն ՀՖՖ նախագահ Արթուր Վանեցյանն ասել է, որ մենք սկսում ենք Վայոց Ձորից: Իհարկե բնակչությամբ գիտենք, որ ամենափոքր մարզն է, բայց նաեւ միակ մարզն է, որտեղ ոչ մի բնակավայրում կազմակերպված ֆուտբոլ չեն խաղում: Այնտեղ 10-12 20x40-ի վրա արհեստական խաղադաշտ ենք կառուցում տարբեր համայնքերում: Հետագայում այդ ծրագիրն անցնելու է Գեղարքունիք, որտեղ կառուցելու ենք 20 մարզադաշտ: Հուսանք, որ 2019 թ. ընթացքում Վայոց Ձորում եւ Գեղարքունիքում մեր ծրագրերը կավարտենք:

Նոր մոտեցում ենք դրսեւորելու նաեւ ներդրողների հանդեպ, որոնք ուզում են ակումբ ունենալ: Մենք առաջարկելու ենք մասնակցել ենթակառուցվածքների շինարարությանը: Փորձելու ենք խրախուսել մարզերում ներդրումներ անել, ֆուտբոլային դպրոցներ կառուցելիս ֆեդերացիան նաեւ այնտեղ կառուցելու է դաշտեր անհատ ներդրողների ակումբների համար: Առաջին փորձը կա, արդեն բանակցություններ ենք վարում Գորիսի հետ: Այնտեղ ֆուտբոլի դպրոց կառուցելու ցանկություն կա, եթե կառուցվի, ՀՖՖ այնտեղ կկառուցի 1 արհետսկաա խաղադաշտ: Նմանատիպ այլ ծրագրեր էլ ունենք: Ընթացքում կտեղեկանաք:

-Ինչո՞ւ Արմեն Գյուլուդաղյանցի հետ չկնքվեց կարճաժամկետ պայմանագիր նրա աշխատանքին գնահատական տալու համար:

-Ես ընդհանարպես չգիտեմ մարզիչներ, որոնք պատրաստ են 2 ամսով պայմանագիր կնքել: Դա վատ ձեւ է, իմ կարծիքով, որովհետեւ նշանակում է, որ դու հենց սկզբից չես վստահում մարզչին: Մենք վստահել ենք Գյուլբուդաղյանցին նշանակելիս: Մենք շարունակելու ենք համագործակցությունը նրա հետ: Ընդհանուր առմամաբ ամբողջ տեխնիկական տնօրինությունը եւ բոլոր հավաքականների մարզչական շտաբերը, բոլորը համատեղ աշխատելու են՝ բոլորը բոլորի հետ: Նաեւ տեխնիկական տնօրեն Խինես Մելենդեսի օգնությամբ ազգայի հավաքականների մարզիչների համար հետաքրքիր ծրագիր ենք մշակում: Հավանաբար հունվարին մեկնելու են Իսպանիա եւ թոփ ակումբներից մեկի հետ՝ դա կլինի «Ատլետիկո Մարդիդը» կամ «Ռեալը», որտեղ կանցկացնեն մարզումային ցիկլը՝ 1 շաբաթ, քննարկումներ կլինեն, հանդիպումներ կլինեն նաեւ այնտեղի մարզիչների հետ: Ամեն դեպքում մենք դրական ենք տրամադրված:

-Ասել եք, որ 5 տարվա ընթացքում կառուցելու եք 700 դաշտ: Ստացվում է տարեկան 140, ամսական էլ՝ 11 դաշտ: Իսկապե՞ս կարող եք ամսական 11 դաշտ կառուցել: Եթե այո՛, ապա որտե՞ղ:

-Խոսքը ոչ թե ստանդարտ, այլ փոքր դաշտերի մասին է: Եթե մոդելը ունենանք, շատ արագ կառուցվող բան է: Առաջին տարին է դժվար լինելու: Միայն մարզերում ենք նման դաշտեր կառուցելու: Եթե ընդամենը 29 բնակավայրում են ֆուտբոլ խաղում, ապա տեղ հաստատ կա: Նախ օգտագործելու ենք ՖԻՖԱ-ի ու ՈՒԵՖԱ-ի ներդրումային ծրագրերի գումարները, ապա մեր հովանավորներից կամ մարքետինգից ստացած գումարները: Այդ աշխատանքներն էլ են ընթանում: Ինչ վերաբերում է 1 ամսում 11 դաշտ կառուցելուն, տարբեր մարզերում են կառուցվելու, պարտադիր չէ, որ շինարարը մեկը լինի:

-Քանի՞ տարվա պայմանագիր ունի Խինես Մելենդեսը: 

-Պայմանագիրը կնքվել է 1+1 սկզբունքով. 1 տարի՝ եւս 1 տարով երկարաձգելու հնարավորությամբ: Պայմանավորվածությունն այն է, որ 2 տարի կաշխատի, հետո կողմերը կորոշեն՝ արդյոք ցանկանում են շարունակել:

-Ըստ Ձեզ՝ այդ ժամանակահատվածը կբավականացնի՞ արդյունք ցույց տալու համար:

-Սովորաբար հիմքը դնելու համար 2 տարին բավարար է, բայց ռեալ լավ ծավալների հասնելու համար մեզ 4 տարի հարկավոր կլինի: Սկսենք քչից, հետո կհասկանանք:

-Ի՞նչ իճակում են «Միկա» եւ «Հրազդան» մարզադաշտերը:

-«Հրազդանի» մասին շատ է խոսվել: Եվ ես, ե՛ւ ֆուտբոլի դեպարտամենտի ղեկավարը հարցազրույցում ասել ենք այդ մասին: Այսօրվա դրությամբ այնտեղի խոտածածկը չի համապատասխանում ստանդարտներին: 2012 թ. ՀՖՖ-ն ստանդիոնը հանձնել էր բավական լավ վիճակում: Այն ՈՒԵՖԱ-ից ստացել էր 3-րդ կատեգորիա: Այն ժամանակ 3-րդ կատեգորիայի ստադիոններն անգամ ազգային հավաքականների խաղեր կարող էին ընդունել: Հետագայում ՈՒԵՖԱ-ն խստացրեց պահանջները: Հիմա այնտեղ հնարավոր կլիներ անցկացնել ՀՀ առաջնության հանդիպումներ, Եվրոպա լիգայի որակավորման փուլի հանդիպումներ, անգամ 21 տարեկանների հանդիպումներ, եթե այդ ստադիոնը բերվեր այն վիճակին, որը կար 2012 թ.: Բայց այն բանից հետո, ինչ ներդրումներ են արվել ՀՖՖ կողմից, «Հրազդանը» չի խնամվել եւ հասել է այս վիճակին: Այն մասնավոր սեփականություն է, այնտեղ սննկացման գործընթաց կա: Ստադիոնը ՀՖՖ-ին չի պատկանում, որպեսզի մենք որոշակի գործունեություն ծավալենք;

Ինչ վերաբերում է «Միկային», բանակցություններ վարում ենք սպորտի նախարարության հետ: Բայց դեռեւս ընթացքում է: Ժամկետներ չեմ կարող ասել, բայց այնտեղ միտք ունենք գոնե խոտածածկը փոխելու եւ հարմարեցնելու ՀՀ առաջնության ստանդարտներին:

-Հաշվի առնելով մեր պայմանները՝ խաղադաշտեր, ստադիոններ, ըստ Ձեզ՝ օպտիմալ տարբերակը ո՞րն է, քանի՞ թիմով պետք է անցկացվի ՀՀ առաջնությունը:

-Ցանկությունը մեծ է, որ որքան շատ թիմ լինի, այնքան լավ, բայց թիմերը պետք է ունենան ստադիոններ, ենթակառուցվածքներ: Ներկայումս ՀՀ առաջնությունում թիմերի մի մասը խաղում է այն ստադիոններում, որոնք պատկանում են ՀՖՖ-ին: Այս դեպքում պետք է նաեւ թիմերը մեզ ասեն՝ որտեղ են ցանկանում խաղալ: Խաղալու տեղ պետք է լինի: Այդ հարցը քննարկվելու է: Դուք գիտեք, որ հաջորդ մրցաշրջանից նաեւ Արմավիրի ստադիոնն է պատրաստ լինելու, եւ Արմավիրում էլ հնարավոր կլինի խաղալ: Ներկայումս չեմ կարող ասել օպտիմալ թիվը: Հուսամ՝ 10 թիմ կլինի: Իհարկե, եթե տեղ գտնենք խաղալու եւ արտոնագրված ստադիոններ ունենանք, որպեսզի առաջնության խաղեր անցկացնենք, լավ կլիներ նաեւ 12 թիմ:

-Ի՞նչ նորություններ կան «Ազգային» ստադիոն կառուցելու ծրագրից:

-Ծրագիրը կա, բանակցություններն ընթանում են: Դա շատ արագ չի լինում: Մենք ցանկանում ենք կառուցել «Ազգային» ստադիոն, որն ՈՒԵՖԱ-ի կողմից ընդունված կլինի, եւ հարմար կլինի ազգային հավաքականի հանդիպումների համար: «Հրազդանի» օրինակով ասացի, որ, եթե նախկինում թույլատրվում էր ազգային հավաքականների խաղեր անցկացնել 3-րդ կատեգորիաների ստադիոնում, ապա հիմա՝ ո՛չ: ՈՒԵՖԱ-ն խստացնում է պահանջները: Եթե մի օր էլ այնքան խստացնի, որ «Հանրապետականը» չհամապատասխանի, շատ դժվար կլինի: Մեզ օբյեկտիվորեն պետք է «Ազգային» ստադիոն: Համոզված ենք, որ տոմսերի վաճառքի, մարքետինգային ճիշտ քաղաքականություն վարելու դեպքում չեմ ասում՝ միշտ 100%-ով կլցնենք, բայց 30-հազարանոց ստադիոնը բավականաչափ կարող է լեցուն լինել:

-Ե՞րբ պատրաստ կլինի:

-Նախ պետք է ավարտվեն ներդրողների հետ բանակցությունները: 2-րդը, նախագիծը պետք է մշակվի, տեղական ինքնակառավարման մարմինների հետ բանակցվի: Ցանկություն կա, որ նախագիծն ամբողջովին պատրաստ լինի 2019 թ. եւ հասկանանք՝ երբ կարող ենք սկսել: Հիմա ժամկետներ չեմ կարող ասել:

-Նշմարե՞լ եք ստադիոնի տեղը կամ կա՞ ստադիոն, որի հիման վրա կկառուցեք:

-Որեւէ ստադիոնի հիման վրա շատ դժվար է կառուցել, որովհետեւ ստանդարտներն անընդհատ... եթե այսօր ստադիոն կառուցենք պետք է փորձենք կանխագուշակել՝ 2-3 տարի անց ինչ կլինի, որովհետեւ ստադիոնները շատ արագ են հնանում եւ պահանջներն ավելանում: Տեղը չենք նշմարել: Դեռ բանակցում ենք ընհանուր գումարի վերաբերյալ, 5 տիպային նախագիծ ենք ստացել՝ ինչ ստադիոններ կան եւ ինչ գումարների մասին է խոսքը, հիմա ուսումնասիրում ենք: Այդ առումով աշխատաքներ կատարվում են:

-Վերջերս ՀՖՖ նոր կազմը հանդիպեց ՖԻՖԱ-ի եւ ՈՒԵՖԱ-ի ղեկավարներին: Իչնպե՞ս եք գնահատում այդ հանդիպումները:

-Հանդիպումները դրական եմ գնահատում: Կարծում եմ՝ պարոն Վանեցյանի գնահատականն էլ նույնն է: ՈՒԵՖԱ-ին եւ ՖԻՖԱ-ին հետաքրքրում է յուրաքանչյուր ֆեդերացիայի նոր ղեկավարության դիրքորոշումը: Մարզային զարգացման մեր դիրքորոշումը, թե ինչպես ենք գումարները ծախսելու, ՈՒԵՖԱ-ին եւ ՖԻՖԱ-ին բավականաչափ գոհացնում է: Մեր ծրագրերը հավանության արժանացան: Խոսել ենք 3-րդ եվրագավաթի մասին, համերաշխության գումարների ծավալների ավելացման մասին: Մենք էլ բավական գոհ ենք այդ հարցերում ՈՒԵՖԱ-ի դիրքորոշմամբ եւ աջակցում ենք նրանց:

-Երբ գործկոմի կազմը որոշվեց, խոսակցություններ սկսվեցին, թե ինչ են այնտեղ անելու առողջապահության նախարարը, տարածքային կառավարման եւ զարգացման նախարարը, սոցիոլոգը.... կմանրամասե՞ք՝ ինչ են արել:

-Այդ 3 մարդիկ մեծ ծավալի աշխատանք են կատարում մեզ հետ: Առողջապահության նախարարի հետ ամսական 2 անգամ հանդիպում ենք: Քննարկում են մարզական բժշկության խնդիրները, ապահովագրության խնդիրները: Հույս ունեմ, որ 2019 թվականից մեր ազգային հավաքականների ֆուտբոլիստները կունենան ապահովագրական փաթեթներ: Նույնը վերաբերում է տարածքային կառավարման նախարարության ներկայացուցիչներին, որոնք կան գործկոմում: Մեծ աշխատանք ենք անում մարզերում, համայնքների հետ, այցելում ենք համայնքներ: Նրանք լուրջ աջակցում ենք, օրինակ, հենց այն հարցում, որ այդ փոքր դաշտերը սկսենք կառուցել: Ամեն դեպքում գործկոմի նիստերի ժամանակ լուրջ քննարկումներ են ընթանում տարբեր հարցերի շուրջ:

-Հայտնի՞ է՝ ովքեր են լինելու 17 եւ 19 տարեկանների հավաքականների մարզիչները:

-Այդ հարցը հիմա տեխնիկական տնօրենի հետ քննարկում ենք: Բոլոր հարցերի պատասխանները հունվարին կտրվեն: Մի քան կարող եմ ասե՝ մենք ունենալու ենք մինչեւ 18 տարեկանների հավաքական նույնպես, ինչը երբեւէ չի եղել, նկատի ունեմ այն բանից հետո, ինչ ՈՒԵՖԱ-ն փոփոխեց, դարձրեց 17, 19 տարեկանների: 18 տարեկանների հավաքականն ընկերական հանդիպումներ է անցկացնելու, որովհետեւ մրցաշարեր չկան իրենց համար: Պրակտիկան չկորցնելու համար տեխնիկական տնօրենը պարտադիր է համարել մինչեւ 18 տարեկանների հավաքական ունենալը: Շատ լայն շրջանակի մասին ենք խոսել: Նոր տեխնիկական տնօրենը դեռեւս ուսումնասիրում է, բայց այդ մասին հունվարի վերջում կխոսենք:

-Արդյո՞ք իրատեսական է, որ 2019-20 առաջնությունում պրոֆեսիոնալ լիգա ունենանք:

-Երբ նոր էի եկել ֆեդերացիա, կարծում էի՝ պորֆեսիոնալ լիգայի հետ կապված աշխատանքները շատ արագ կարող են կազմակերպվել, բայց հիմա արդեն այդ կարծիքին չեմ: Միտքը կա, եւ համարում եմ, որ դա պարտադիր է, բայց 2019-20 թթ. հաստատ չի լինի, որովհետեւ այդքան էլ հեշտ գործընթաց չէ, եւ վերագնահատելով այն, ինչ ունենք հայաստանյան ֆուտբոլում, կարծում եմ՝ դա դեռ հնարավոր չէ, բայց պետք է տեսլական ունենալ:

-Ի՞նչ ակնկալիքներ ունենք 2019 թ. ՀՀ-ում կայանալիք Եվրոպայի մինչեւ 19 տարեկանների առաջնության եզրափակիչ փուլից: Ի՞նչ կտա այդ մրցաշարը:

-Մեզ համար կարեւորագույն մրցաշար է: Տեսաք՝ 1 մինի-մրցաշար արդեն անցկացվեց, որը փորձ էր մեզ համար: Բավական դրական ենք գնահատում անացկացումը: Ամեն ինչ առանց խնդիրների եւ շատ հարթ անցավ: Մեզ համար դա շատ լավ փորձ է, որ  հետագայում էլ հավակնենք նման մրցաշարեր անցկացնելուն: Շատ կարեւոր է, որ կազմակերպչական առումով ամեն ինչ լավ անցնի: Համոզված եմ՝ այդպես էլ կլինի, եւ նաեւ հույս ունենք, որ ՀՀ հավաքականն էլ մինչեւ այդ ավելի մարտունակ կլինի եւ կկարողանա ավելի լավ արդյունքներ գրանցել: