Գրիպի դեմ պատվաստվողները շատացել են. «Մուրացանում» պատվաստանյութն արագորեն սպառվել է

Երեւանում գործող բուժհաստատությունները, սուր շնչառական վարակներով (ՍՇՎ) պայմանավորված, աշխատում են գերծանրաբեռնված ու խստացված ռեժիմով: Միջանցքներում հիվանդ ու նրանց ուղեկցող մարդկանց բազմություն է, բժշկական անձնակազմի ու այցելուների մեծ մասը շրջում են բժշկական դիմակներով՝ պաշտպանվելու հնարավոր վարակներից:  

Մասնավորապես «Մուրացան» հիվանդանոցային համալիրում հիվանդների մեծ հոսքին նախապատրաստվել են անցած տարեվերջին՝ կանխատեսելով գրիպի սեզոնին ավանդաբար բնորոշ ակտիվացումը, ինչպես նաեւ առողջապահության նախարարությունից ստանալով համապատասխան ցուցում:

«Հաշվի առնելով հիվանդների մեծ հոսքը՝ անհետաձգելի բուժօգնության ծառայությունում ավելացվել է աշխատողների քանակը՝ ավելի օպերատիվ բուժսպասարկում իրականացնելու համար: Մեր ունեցած ռեսուրսներով ավելի ամրացրել ենք այդ ծառայությունը: Բացի դրանից, ստեղծել ենք լրացուցիչ մահճակալներ՝ ի հաշիվ մեծահասակների բաժինների: Սահմանափակել եւ հետաձգել ենք պլանային հիվանդների ընդունելությունը, որպեսզի կարողանանք հրատապ բուժօգնության կարիք ունեցողներին սպասարկել: Խոսքը վերաբերում է երեխաներին, որովհետեւ մեր հիվանդանոցը հիմնականում մանկական ուղղվածություն ունի»,- ասաց հիվանդանոցի գխավոր բժիշկ Բագրատ Բավեյանը: Խստացվել է նաեւ սանիտարահիգիենիկ պայմանների պահպանումը, սահմանափակվել են տեսակցության ժամերը:

Նրա խոսքով, ՍՇՎ-ով հիվանդացության ցուցանիշներն այս տարի մոտ 10 տոկոսով գերազանցում են նախորդ տարվա ցուցանիշներին, բայց նույնական են երեք տարի առաջվա պատկերի հետ: Միեւնույն ժամանակ վերջին երեք օրերի ընթացքում նկատվում է բուժօգնության դիմողների թվի նվազում:

«Տոնական օրերին, իհարկե, շատ ծանրաբեռնված աշխատել է հիվանդանոցը, դիմելիությունը շատ բարձր է եղել, օրական մոտավորապես 150 հիվանդ, բայց կարողացել ենք բոլորին համապատասխան բուժօգնություն ցուցաբերել թե՛ ամբուլատոր, թե՛ ստացիոնար կարգով: 25-30 տոկոսը հոսպիտալացվել են, մնացածը բուժօգնություն են ստացել ամբուլատոր պայմաններում: Արդեն վերջին օրերին դիմողների թիվը բավական նվազել է, երեկ եղել է 90 հիվանդ, հոսպիտալացվել է մոտ 20 տոկոսը: Այսինքն՝ նախորդ երկու-երեք օրերի ընթացքում երեսուն տոկոսով նվազել է հիվանդանոց դիմողների քանակը: Իհարկե, չենք կարող վստահաբար ասել՝ վաղը, մյուս օրը էլի նվազո՞ւմ, թե՞ ավելացում կլինի: Ընթացքը ցույց կտա, եւ եթե մեկ շաբաթ նույն տենդենցը պահպանվի, կարող ենք նաեւ եզրակացություն անել, որ ընդհանուր հիվանդացությունը գնում է դեպի նվազում»,- նկատեց Բավեյանը:

«Մուրացան» հիվանդանոց դիմողների մեծ մասը մինչեւ 5 տարեկան երեխաներ են: Բարեբախտաբար չկան այնպիսի հիվանդներ, որոնց վիճակը ծայրահեղ ծանր է՝ պայմանավորված սուր շնչառական վարակներով ու դրանց բարդություններով եւ որոնք կարիք ունեն արհեստական շնչառության սարքի:

Իսկ թե սուր շնչառական վարակների դեմ բուժում ստացող հիվանդների քանի տոկոսի մոտ է առկա գրիպի A տեսակի H1N1 ենթատեսակը («խոզագրիպ»), հայտնի չէ: Դրա վերաբերյալ նմուշառում այստեղ չի արվում: «Դա արվում է ռեֆերենս լաբորատորիայում: Կան ծրագրի մեջ ընդգրկված հիվանդանոցներ, որոնք իրականացնում են այդ հետազոտությունը, նմուշառում են անում եւ ուղարկում, բայց մենք չենք անում: Մենք այդ ծրագրում ընդգրկված չենք: Եթե ունենանք շատ արտառոց, ծանր դեպք, բնական է մենք էլ կարող ենք ուղարկել, չի մերժվի, բայց դա նպատակ չէ, որ բոլոր դեպքերում պարտադիր պետք է որոշել ու ըստ դրա կողմնորոշվել բուժման ընթացքում»,- ասաց գլխավոր բժիշկը: Բուժման սկզբունքը կապված չէ գրիպի ենթատեսակի հետ, իսկ «Տամիֆլյու» դեղը ցուցված է կիրառել հիվանդության բարդացման բոլոր դեպքերում՝ անկախ H1N1-ի առկայությունից:

Ուշագրավ է, որ «Մուրացանի» հիվանդանոցային համալիրի պոլիկլինիկայում այս տարի շեշտակիորեն աճել է գրիպի դեմ պատվաստվողների քանակը: Գլխավոր բժշկի՝ ամբուլատոր գծով տեղակալ Ռենա Հարությունյանից տեղեկացանք, որ եթե նախկինում ստանում էին 200 դեղաչափ պատվաստանյութ, որը հազիվ էր սպառվում, ապա գրիպի ընթացիկ սեզոնում (նոյեմբերի վերջից) արդեն պատվաստվել է 450 մարդ: «Հիմա պատվաստվողների քանակը շատ է ավելացել: Բնակչությունը կամավոր է գալիս: Նախորդ տարիներին շատ դժվար է եղել վակցինացիան, ոչ մեկը չէր ուզում գրիպի դեմ պատվաստում ստանալ, բայց այս տարի, հատկապես Նոր տարուց հետո հաճախելիությունը շատացել է բոլոր պատվաստումների համար, իսկ գրիպի դեմ՝ առավել եւս»,- նշեց նա:

Մեր այցելության պահին գրիպի դեմ պատվաստանյութ պոլիկլինիկայում չկար: Ռենա Հարությունյանն ասաց, որ սովորաբար ստանում են ամեն ամսվա 15-16-ին: Հերթական խմբաքանակն այս անգամ ինչ-ինչ պատճառներով ուշացել է, եւ հիվանդանոցի աշխատակիցներն իրենք են գնացել առողջապահության նախարարության համապատասխան ստորաբաժանումից բերելու այն: Գլխավոր բժշկի տեղակալն, ի դեպ, արդեն 4-րդ տարին է, որ պատվաստվում է գրիպի դեմ եւ չի հիվանդանում՝ չնայած գործի բերումով մշտապես շփվում է վարակակիրների հետ:

«Հիմա մեծերն էլ, փոքրերն էլ, ընտանիքներով գալիս են պատվաստվելու: Դրան երեւի թե ավելի շատ նպաստել է նախարարի տրամադրվածությունը պատվաստումների նկատմամբ: Իր կողմնակից լինելը շատ մեծ ազդեցություն է ունենում բնակչության վրա: Իմ կարծիքն է դա»,- ասաց մեր զրուցակիցը:

Գրիպի դեմ պատվաստումն անվճար է: Պատվաստում ստանալուց հետո մեկ ամսվա ընթացքում օրգանիզմում ձեւավորվում է իմունիտետ, որը պահպանվում է 6-12 ամիս: Հետաքրքրական է, որ հիվանդանոց դիմած բոլոր երեխաների ծնողները, ում հետ մենք զրուցեցինք, ասացին, որ նրանք չեն հաճախում մանկապարտեզներ:

Տպել
1302 դիտում

Մեր ընթացիկ խնդիրը հայեցկարգային եւ գաղափարական առումով Հայաստան-Սփյուռք սահմանները վերացնելն է․ վարչապետ

Թող 98թ․-ից առաջ միլիոններ կուտակեին, առյուծներ քշեին. Փաշինյանը՝ Քոչարյանի եւ Սարգսյանի շնորհավորական ուղերձների մասին

Լինելով ԱԱԾ տնօրեն՝ նա հայտարարություն է անում գերագույն հրամանատարի դեմ․ սպայի պատվին դրանից մեծ անարգանք չկա․ վարչապետ

Աղմկոտ միջադեպի գործով Վայոց Ձորի մարզպետի օգնականը կալանավորվել է

«Հյուսիս-Հարավ»-ի գործով մեղադրյալ, «Մուլտի Գրուպ» կոնցեռնի տնօրենը 20 մլն դրամ գրավի դիմաց ազատ է արձակվել

Կդադարեցվի Ծաղկաձորի մի շարք օբյեկտների եւ Արագածոտնի մի շարք գյուղերի գազամատակարարումը

Արարատի մարզում աղջկա համար վիճաբանությունն ավարտվել է դանակահարությամբ. 2 անձ տեղափոխվել է հիվանդանոց. Shamshyan.com

Կրակել են կարմիրգրքյան Սեւ արագիլի վրա, որից Հայաստանում ընդամենը վեց զույգ կա. Նաիրա Զոհրաբյան

Մանվել Գրիգորյանը պաշտոնը դադարեցնելիս 6 անշարժ գույք եւ 9 ավտոմեքենա ավելի է ներկայացրել, քան պաշտոնը ստանձնելիս

Վարչապետ Նիկոլ Փաշինյանն արդեն Լոս Անջելեսում է

Կապանում 3 կգ-անոց գազի բալոնից տեղի է ունեցել գազի արտահոսք՝ հրդեհի բռնկմամբ․ մի քաղաքացի այրվածքներ է ստացել

Այսօր ցրտել է, սակայն առաջիկա օրերին զգալի տաքանալու է․ Գագիկ Սուրենյան

Հրշեջ-փրկարարները մարել են մոտ 59.5 հա խոտածածկ տարածք ընդգրկող 47 հրդեհ

Մեղադրանք է առաջադրվել «Վերածնունդ» միջազգային մրցույթ-փառատոն» ՀԿ նախագահին

Մարտի մեկը պետք է քննություն անցնի, ես կարծեմ 2009-ին ցուցմունք չեմ տվել. Խաչատուր Սուքիասյան

«Ամուլսարի հանքի շահագործմանը փայլուն եմ վերաբերում». Խաչատուր Սուքիասյան

Պետք է զարգացնենք հայոց պետականության նվիրական արժեքը. Արման Թաթոյան

100 փաստերը չեն տալիս ելակետային տվյալներ, որպեսզի համեմատություններ անցկացվեն. Վարդանյան

Փոխվարչապետ Ավինյանն Ուրբասեր ընկերության պատվիրակության հետ քննարկել է բիզնես և ներդրումային միջավայրի հարցեր

ՀՀ պաշտպանության նախարարն ընդունել է Բելառուսի զինված ուժերի գլխավոր շտաբի պետին