Բողոքի ակցիա կենդանաբանական այգու տնօրենի դեմ. ով է ուղղորդում ցույցերը

Երեւանի կենդանաբանական այգու նախկին եւ ներկա աշխատակիցների բողոքի ակցիան շարունակվում է: Այս անգամ նրանք հերթական բողոքի ակցիան իրականացրեցին Երեւանի քաղաքապետարանի դիմաց։ Ակցիայի մասնակիցները պահանջում են կասեցնել այգու տնօրեն Ռուբեն Խաչատրյանի լիազորությունները, կառավարման խորհուրդ ստեղծել եւ անցկացնել տնօրենի ընտրություններ:

Կենդանասերների նախաձեռնող խմբի համակարգող Արմեն Ումրշատյանի գլխավորությամբ ակցիայի մասնակիցներին Երեւանի քաղաքապետարանում ընդունեց քաղաքապետարանի մշակույթի վարչության պետի ԺՊ Գոշ Սարգսյանը:

Ակցիայի մասնակիցները պահանջում են, որ կենդանաբանական այգում ստուգումներ իրականացվեն: Խմբի համակարգող Արմեն Ումրշատյանը հայտնեց, որ իրենք երեք հիմնական պահանջ ունեն.

Առաջին՝ կենդանասերներին նորից չեն ներգրավել Երեւանի քաղաքապետարանի աշխատանքներում, եւ մեր կողմից բարձրացված բազմաթիվ հարցեր անտեսվում են:

Երկրոդ՝ Երեւանի կենդանաբանական այգու տնօրենի լիազորությունների դադարեցում, քանի որ նա, անտեսելով բազմաթիվ հորդորները՝ հանդարտվել եւ ուսումնասիրել իրավիճակը, շարունակում է հեռացնել աշխատակիցներին։ Այս պահի դրությամբ եւս երկու աշխատակից ստացել են ծանուցում:

Երրորդ՝ Երեւանի քաղաքապետարանը չի ձեռնարկում բավականաչափ միջոցներ՝ Երեւանի կենդանաբանական այգու խախտումները հայտնաբերելու ուղղությամբ:

Արմեն Ումրշատյանն ընդգծեց, որ տրվել են հանձնարարականներ. «Դեռեւս 2018 թվականի օգոստոսի 31–ին դիմում ենք ներկայացրել վերահսկող ծառայություններին եւ իրավապահ մարմիններին, եւ այս պահի դրությամբ դեռեւս որեւէ քայլ չի արվում։ Մենք նորից ասում ենք, որ կենդանասերները անտեսված են։ Եվ եթե արձագանք չգտնվեց Երեւանի քաղաքապետի կողմից, քաղաքապետարանի աշխատակազմի կողմից այս երեւույթների դեմ, եւ կենդանասերները անտեսվեն, մենք շարունակելու ենք ցույցերը»:

Բողոքի ակցիա իրականացնողները պնդում են, թե իրենց մեջ պաշտոնի ակնկալիքներ ունեցողներ չկան: Նշում են, որ կան բազմաթիվ մասնագիտական խնդիրներ, որոնց տնօրենը չի տիրապետում, կամ տիրապետելով՝ «օրենքի սահմաններում» պատժելու ճանապարհներ է փնտրում այն անձանց նկատմամբ, որոնք որեւէ հարց են բարձրաձայնում. «25 տարի փիղ խնամող աշխատակցին պարտադրում է, որ օձեր խնամի: Հրաժարվել է, անմիջապես գործից հանել են: Այս դեպքում վտանգվում է ե՛ւ մարդկանց կյանքը ե՛ւ կենդանիների առողջությունը»:

Կենդանասերները փաստում են, որ բազմաթիվ աշխատակիցներ հեռացվել են խոսքի ազատության համար. «Տեղափոխեց ինձ օձերի բաժին, ապա կուխնյայի բաժին, հաջորդ օրը գիշերը սմենի կանգնեմ: Էդ մարդը ուզում է ինձ մի վնասի բերի, որ պրծնի ինձնից: Սա արդեն 7 տարի է, ով ձայն է հանել, հեռացվել է»:

Աշխատակիցներից մեկը նշում է, որ կենդանաբանական այգում  70 հոգի աշխատող կա, 21-ը աշխատում են կենդանիների հետ, որոնց էլ եւս 12 հոգի են հսկում եւ դրա դիմաց գումար ստանում. «Ասում ենք՝ ինչի՞ եք ցուրտ ու մութ տարիներից դժվարությամբ պահած բազմացրած կենդանիներին սատկացնում, հետո այլ կենդանիներ բերում տեղը լցնում: Նման բաներ բարձրաձայնելու համար մեզ աշխատանքից ազատում են»:

Կենդանաբանական այգու աշխատողներից մեկը, որը 20 տարուց ավելի է՝ այնտեղ է աշխատում, նշում է, որ Ռուբեն Խաչատրյանը տարբեր պատճառաբանություններ է օգտագործում՝ իր մտադրություններն իրականացնելու համար: Աշխատող աղջիկներից մեկի աշխատանքային գրաֆիկն է փոխել, պահանջել, որ յուրաքանչուր շաբաթ մեկ օր մնա գիշերային հերթապահ, հստակ իմնալով, որ չի ցանկանա աշխատել ու կգնա: Հայտնեցին, որ կենդանասերների նկատմամբ արդեն երեք քաղհայց կա, տարբեր զրպարտություններով:

Երեւանի քաղաքապետարանից ցուցարարներին հայտնեցին, որ Ռուբեն Խաչատրյանը հրավիրվել է քաղաքապետարան՝ պարզաբանումներ տալու:

Երեւանի քաղաքապետարանի աշխատակից Գոշ Սարգսյանը հայտնեց, որ Երեւանի քաղաքապետ Հայկ Մարությանի հանձնարարությամբ ստեղծվել է ուսումնասիրող հանձնախումբ, որն արդեն ներկայացրել է իրենց առաջարկությունները. «Խնդիրը շատ լուրջ ուսումնասիրության կարիք ունի, որովհետեւ բարձրաձված են բազմաթիվ հարցեր, դրանց հստակ պատասխանելու համար անհրաժեշտ են ուսումնասիրություններ: Մենք չենք պաշտպանում որեւէ մեկի շահը»:

Գոշ Սարգսյանը հայտնեց, որ ուսումնասիրությունները երկու օր առաջ են ավարտվել: Երեւանի քաղաքապետարանը կենդանաբանական այգու հետ կապված եկել է որոշակի եզրահանգման, հարցը ավագանու փետրվարի 12–ի նիստում կդրվի քննարկման: «Հետայսու Երեւանի կենդանաբանական այգին ունենալու է 11 անդամից բաղկացած կառավարման խորհուրդ՝ երկուսը կենդանաբանական այգու աշխատակիցներ, մնացածը՝ հասարակական սեկտորից»,-եզրափակեց Գոշ Սարգսյանը:

Հ.Գ. Նկատենք, որ Ռուբեն Խաչատրյանի պաշտոնավարման ընթացքում Կենդանաբանական այգին անճանաչելիորեն փոխվել է՝ դրական իմաստով: Թե ովքեր են ուղղորդում աշխատակիցներին ու ինչ նպատակով, թերեւս բացահայտվի նաեւ դատարանում, զրպարտության քաղհայցերի քննության ժամանակ: