Բոգոյի մտերիմները Կենտրոնական ավտոկայանից հանում են նրա իրերը (լուսանկարներ)

Քիչ առաջ քրեական հեղինակություն Նորագյուղցի Բոգոյի (Ռուբեն Կոստանյան) մտերիմները Կենտրոնական (Կիլիկիա) ավտոկայանի 2-րդ հարկում տեղակայված Կոստանյանի ստեղծած հյուրանոցի եւ սենյակի իրերն էին հանում:

Մի քանի օր առաջ ՀԺ-ն գրել էր, որ Կոստանյանը տարիներ շարունակ պետական շինություն հանդիսացող Կենտրոնական հավաքակայանի ներսում՝ 2-րդ հարկում, «սեփական» սենյակ եւ հյուրանոց է ստեղծել՝ ապօրինի:

«Հայավտոկայարան» ՓԲԸ-ի գործադիր տնօրեն Աշոտ Մնացականյանի խոսքով՝ այդ տարածքները վարձակալված չեն եղել, քանի որ նման պայմանագրեր չկան: Ոստիկանության 6-րդ վարչությունը երեկ գնացել էր Կենտրոնական ավտոկայան ոչ միայն «զավթված» տարածքը ազատելու, այլեւ գործողություններ են իրականացնում՝ պարզելու համար, թե արդյո՞ք ավտոկայանի հարակից շրջաններում գործող տնտեսվարողները հոսանքն ապօրինի են օգտագործել, քանի որ Կենտրոնական ավտոկայանում շարունակաբար վճարել են հարյուր հազարավոր դրամների հասնող հոսանքի վարձ։

«Հայավտոկայան» ՓԲԸ-ն ունի 27 ավտոկայան եւ 5 ենթակարգավարական կետ, դեկտեմբեր ամսին հոսանքի համար ընդհանուր վճարվել է 2 մլն 400 հազար, որի ուղիղ կեսը կազմել է կենտրոնական ավտոկայանի հոսանքի ծախսերը։ Սա նշանակում է, որ չարաշահում միանշանակ կա»,- նշում է Մնացականյանը: Մնացականյանը նախընտրեց սպասել, որպեսզի քննությունից հետո պարզվի, թե ինչ է եղել: Թե որքանով է սրա հետ առնչվում Կոստանյանը՝ քննությունը կպարզի: Բայց հստակ է, որ նա գրեթե 2 տասնամյակ, չունենալով ոչ մի պաշտոն ավտոկայանում, այնտեղ ունեցել է անձնական սենյակ եւ մի քանի սենյակներ, որոնք որպես հյուրանոց են ծառայել: Կենտրոնական ավտոկայանի նախկին տնօրենը եղել է Կոստանյանի եղբայրը՝ Աշոտ Սիմոնյանը (Կոստանյանն իր ազգանունը՝ Սիմոնյան, փոխել է):

Գրեթե 1 ամիս է՝ ինչ Կենտրոնական ավտոկայանի տնօրեն է նշանակվել Ռոման Համբարձումյանը: Նա աշխատանքներ է իրականացնում, որպեսզի Կենտրոնական ավտոկայանը կարգավորվի: Սակայն այդ ամենին զուգահեռ օրեր առաջ՝ Մարտի 1-ի լույս 2-ի գիշերը, ժամը 02:30-ին այրել են Համբարձումյանի «Լեքսուս» մակնիշի ավտոմեքենան: Համբարձումյանը դեռեւս չգիտի, թե ո՞վ է այրել, քանի որ դեռեւս փորձաքննությունը չի ավարտվել, սակայն նշում է, որ թշնամիներ չի ունեցել:

- Պարոն Համբարձումյան, ձեր նշանակումից հետո կտրուկ փոփոխություններ են տեղի ունենում այստեղ, ի՞նչ եք բացահայտել այս կարճ ժամանակահատվածում:

- Դեռ ուսումնասիրում ենք՝ քանի գծեր ունենք, քանի ավտոբուսներ ունենք: Իրավապահ մարմինները զբաղվում են, սպասենք, տեսնենք՝ ինչ դուրս կգա այս ամենի արդյունքում:

- Այս ընթացքում ձեր ավտոմեքենան այրվեց, սա կապ ունի՞ ձեր 1-ամսյա գործունեության հետ:

- Չեմ կարող ոչ մեկի հետ կապել: Մեքենան անսարքություն չի ունեցել: Ես սկզբից մտածում էի, որ անսարքությունից կլինի, քանի որ մտքովս չէր անցնում, որ այսպիսի թշնամանք կարող է ինչ-որ մեկն ունենալ: Իրավապահներն արդեն ասում են, որ ոչ՝ ինքն իրեն չի եղել, դե որ այրել են, թող պարզվի, ես էլ տեսնեմ, թե ինչի համար:

- Երբ արդեն տնօրեն եք նշանակվել եւ նկատել եք, որ ներսում հյուրանոց է եղել, ո՞րն է եղել ձեր արձագանքը:

- Այնպես չի, որ այն որպես հյուրանոց աշխատել է: Ժողովուրդն աջ ու ձախ խոսելով՝ ասել են, որ հյուրանոց կա: Ես ինչ այստեղ տնօրեն եմ, փակ են եղել այդտեղ դռները: Հիմա, թե այդտեղ աշխատել է նախկինում, թե չի աշխատել, չեմ կարող ասել:

- Հանրությանն էլ հայտնի է, որ այստեղ տարիներ շարունակ իշխել է Նորագյուղցի Բոգոն՝ Ռուբեն Կոստանյանը: Այս ընթացքում հանդիպե՞լ եք նրան:

- Ես չգիտեմ՝ իշխելը որն է: Մարդիկ այստեղ ապրել են 15-20 տարի, գծեր են ունեցել՝ օրինական: Երեւի, որ այդքան տարի այս շենքում են եղել, դրա համար էլ այս ընթացքում ինչ կարողացել, արել են: Այստեղ մի անգամ բարեւել ենք իրար՝ ծանոթացել ենք, նա բարձրացել է իր գրասենյակ:

- Նորա՞լ է, որ նա այստեղ գրասենյակ է ունեցել:

- Եթե այստեղ աշխատել է, գծեր է ունեցել, նորմալ է, որ ունենա գրասենյակ: Հիմա, եթե դա գրանցված է, գրանցված չի՝ իմ խնդիրը չէ, ես նոր եմ եկել եւ պետք է պարզեմ դա: Բայց մեր գլխավոր տնօրենն էլ է ասում, որ մենք պայմանագրեր չունենք:

- Որոշ ժամանակ առաջ այստեղ էր նաեւ տրանսպորտի, կապի եւ տեղեկատվական տեխնոլոգիաների նախարար Հակոբ Արշակյանը: Նա ֆիքսեց, որ տարածքը ոչ բարվոք վիճակում է գտնվում՝ հատկապես զուգարանները: Ե՞րբ այս ամենը կբարեկարգվի:

- Արդեն աշխատում ենք այդ ուղղությամբ: Հենց հիմա զուգարանները վերանորոգման փուլում են: Մեկ շաբաթից արդեն տղամարդկանց զուգարանը պատրաստ կլինի, հետո կանցնենք մյուսին: Կտուրն էլ ենք վերանորոգելու, ներսը տաքացնելու ենք:

- Նշում են, որ Կոստանյանը վարորդներին ճնշել է, ուղեւորահոսքի վրա է ազդել: Այժմ կա՞ն նման բաներ:

- Չէ, հանգիստ է: Անպայման աշխատում ենք, որպեսզի ոչ մի խնդիր չլինի: Վարորդների հետ շփվում ենք, բուժքրոջն ասում եմ, որպեսզի պարտադիր ստուգի, որպեսզի վարորդները հարբած չլինեն: Մի փոքր ժամանակ էլ անցնի, ամեն ինչ լավ կլինի: Հաջորդ անգամ, որ գաք, կտեսնեք փոփոխությունները: