Հանրապետական կուսակցությունում անհամբեր սպասում են Սերժ Սարգսյանի որոշմանը

Հանրապետական կուսակցությունում հապաղում են քննարկել մանդատների համար Կենտրոնական ընտրական հանձնաժողով ցուցակ ներկայացնելու եւ կառավարությունում ու Ազգային ժողովում պաշտոնյաների փոփոխության հարցը:

Իշխանություններին այդ հարցում մի փոքր «օգնեց» ապրիլի 2-ի խորհրդարանական ընտրությունների արդյունքները վիճարկելու վերաբերյալ Սահմանադրական դատարան Կոնգրես-ՀԺԿ դաշինքի ներկայացրած դիմումը, որն այդ գործընթացը հետաձգեց երկու շաբաթով:

Բայց այս ընթացքում ՀՀԿ-ի պատգամավորական եւ նախարարական թեկնածուների «շաքարը» հուզմունքից բարձրանում-իջնում է: Համենայնդեպս, այդպես են կատակում ՀՀԿ-ականներն իրենք: Ճիշտ է, մոտավորապես հայտնի է, թե ովքեր են մանդատ ստանալու, բայց որոշների դեպքում դա մազից է կախված: ՀՀԿ-ի համամասնական ցուցակի առաջին հնգյակը մանդատ չի ստանա, քանի որ այլ պաշտոններ է ստանալու: Վիգեն Սարգսյանը, Արփինե Հովհաննիսյանը, Արմեն Ամիրյանն ամենայն հավանականությամբ վերանշանակվելու են նախարարական իրենց պաշտոններում: Տարոն Մարգարյանը քաղաքապետ դառնալու հույսով նորից մասնակցում է Երեւանի ավագանու ընտրություններին, իսկ Արա Բաբլոյանի դեպքում տեղեկություններ են շրջանառվում, թե նորից նախարար կամ դեսպան կնշանակվի:

Կարծիք կա, որ ցուցակի 6-րդ հորիզոնականը զբաղեցնող Արմեն Աշոտյանը կնշանակվի Ազգային ժողովի նախագահ, քանի որ ուժեղացված լիազորություններով միակ ներկայացուցչական մարմնի ղեկավարի պաշտոնում ցանկանում են նշանակել լեզուների տիրապետող եւ արտաքին հարաբերություններում փորձ ունեցող մեկին: Այս դեպքում շրջանառվում է նաեւ Էդուարդ Շարմազանովի թեկնածությունը: Մամուլում գրվել է նաեւ Կարեն Կարապետյանի անունը (Տաշիր), սակայն վերջինիս հայտնվելը սույն պոստում քիչ հավանական է համարվում, քանի որ նա լիարժեք վերահսկելի չէ Սերժ Սարգսյանի համար: ԱԺ փոխնախագահի պաշտոնին հավակնողները նույնպես սրտատրոփ սպասում են, թե այդ տեղը ունենալու բախտ կվիճակվի՞ իրենց: Նույնը վերաբերում է նաեւ ԱԺ մշտական հանձնաժողովների նախագահների եւ փոխնախագահների պաշտոններին: Հատկապես նախագահների մի մասը՝ Արտակ Զաքարյանը, Արտակ Դավթյանը, Արա Բաբլոյանը, Հովհաննես Սահակյանը դուրս են գալիս ԱԺ-ից եւ գործադիրում պաշտոն են զբաղեցնելու, իսկ նրանց փոխարեն հավակնորդների մեծ խումբ կա: Արդեն հրապարակել ենք, որ կրթության եւ գիտության հանձնաժողովի նախագահի պաշտոնը կզբաղեցնի Մարգարիտ Եսայանը, արտաքին հարաբերությունների հանձնաժողովի նախագահի պաշտոնը Սամվել Ֆարմանյանն է ցանկանում ստանալ: Նույն ոճով պետաիրավականի նկատմամբ հավակնություններ ունեն Միհրան Պողոսյանը, Գեւորգ Կոստանյանն ու Հրայր Թովմասյանը, թեեւ առաջինի դեպքում դա քիչ հավանական է համարվում:

Ամեն դեպքում, ՀՀԿ-ն այս խորհրդարանում թեեւ նորից մեծամասնություն է կազմում, բայց ավելի քիչ՝ 55 մանդատ է ստանալու: Այնպես որ նրանց մի մասը կարող են ոչ թե շարքային պատգամավոր լինել, այլեւ ԱԺ նախագահ, փոխնախագահներ, հանձնաժողովի նախագահներ ու փոխնախագահներ, ինչի համար այդ կուսակցությունում կենաց ու մահու պայքար է սկսվել: Նրանք առանձին-առանձին փորձում են հանդիպել Սերժ Սարգսյանին եւ նրանից նման պաշտոն խնդրել: ՀՀԿ-ում մեկ այլ մրցակցության թեմա է նաեւ միջազգային կառույցներում պատվիրակության անդամի ու հատկապես ղեկավարի պոստերը: Այդ առումով պատգամավորների համար գայթակղիչ է հատկապես ԵԽԽՎ-ում ՀՀ պատվիրակությունը, որտեղ բոլորը ձգտում են, քանի որ տարին առնվազն չորս անգամ առնվազն 4-5 օրով պետության հաշվին Ֆրանսիայի Ստրասբուրգ քաղաքում լինելու հնարավորություն են ունենում: Այս պատվիրակությունն ամենայն հավանականությամբ կպահպանի իր հին կազմը` բացառությամբ ՀԱԿ եւ «Հայկական վերածնունդ» կուսակցությունների ներկայացուցիչներ Լեւոն Զուրաբյանի եւ Մհեր Շահգելդյանի, քանի որ այդ ուժերն այս ընտրություններին ԱԺ չեն անցել: Բայց պատվիրակության ղեկավարի համար, ասում են, պայքարում են Սամվել Ֆարմանյանն ու Հերմինե Նաղդալյանը, եթե վերջինս մնա ԱԺ-ում:

Մանդատ կստանան ու պատգամավոր կդառնան նաեւ 13 ընտրատարածքներում առավելագույն ձայներ ստացած երկու կամ երեք թեկնածուներ: Բայց ՀՀԿ-ից հերքում են, թե վերը նշված թեկնածությունների դեպքում հաստատված որոշումներ կան: ՀՀԿ ԳՄ անդամ Սամվել Նիկոյանը մեզ հետ զրույցում պնդում էր, որ կուսակցությունում դեռ նման քննարկումներ չեն եղել, քանի որ ՍԴ-ն պետք է Կոնգրես-ՀԺԿ դաշինքի դիմումը քննարկի ու որոշում կայացնի: Իհարկե, կուսակցության ԳՄ-ն կամ ավելի շուտ Սերժ Սարգսյանը կարող են այդ հարցին ավելի վաղ անդրադառնալ, բայց քանի որ ՍԴ-ն երկու շաբաթ հավելյալ ժամանակ է տալիս, այդ պահը հնարավորինս ձգձգում են՝ սթրեսի ու ահուսարսափի մեջ պահելով ցուցակի անդամներին: Հատկապես որ տարիներ շարունակ տեղեկություններ են շրջանառվել, թե այդ թեկնածուները նախընտրական ցուցակում ընդգրկվելուց առաջ մանդատից հրաժարվելու դիմում են ներկայացնում կուսակցություն: Շատերը երաշխիք չունեն, որ այդ դիմումներն իրենց անունից ԿԸՀ չեն ներկայացվի: «ՀՀԿ-ի դեպքում դա սուտ է: ՀՀԿ-ում այս ամբողջ տարիներին ես տեղյակ եմ եղել ցուցակներից եւ փաստաթղթերի հավաքման գործընթացից, նման բան չի եղել»,- բարկացավ Սամվել Նիկոյանը:

Նրանից փորձեցինք նաեւ տեղեկանալ` արդյոք նորից խորհրդարան կբերե՞ն գեներալներ Մանվել Գրիգորյանին ու Սեյրան Սարոյանին: Չէ՞ որ նրանք ընդամենը կոճակ են սեղմում, իսկ այս խորհրդարանն ավելի լուրջ լիազորություններով է օժտված: «ԱԺ-ն ներկայացուցչական մարմին է, իսկ ձեր նշած գեներալները մեր արցախյան հաղթանակած պատերազմի խորհրդանիշն են: Ես չգիտեմ, թե ինչպիսին է լրատվամիջոցների վերաբերմունքը նրանց նկատմամբ, բայց յուրաքանչյուր պարկեշտ մարդ պետք է հպարտանա, որ նրանք լինելու են ներկայացուցչական մարմնում»,- ասաց Նիկոյանը:

Իշխանությունները հատկապես Մանվել Գրիգորյանին իրենց մոտ են պահում եւ ԱԺ բերում, որպեսզի նրա միջոցով կարողանան ազդեցություն ունենալ «Երկրապահ կամավորական միության» 40 հազար անդամների վրա: Իսկ ռեյտինգային եւ համամասնական ցուցակում ընդգրկված որոշ օդիոզ դեմքերի ՀՀԿ-ն ԱԺ կբերի՞, թե՞ նրանց կառաջարկի ինքնաբացարկի դիմում ներկայացնել եւ գնալ բիզնեսով զբաղվելու: «Մեր ռեյտինգային եւ համամասնական ցուցակներում նման մարդիկ չկան: Մեր ցուցակներում առաջադրվել են շատ պարկեշտ եւ ժողովրդի կողմից հարգված մարդիկ: Դա են վկայում նրանց բերած ձայները: Նրանց գնահատականը ոչ թե մամուլը, այլ ժողովուրդն է որոշում: Իսկ ժողովուրդը դա իր ձայներով արդեն որոշել է»,- նորից բարկացավ Նիկոյանը: